139
Amisye Po sya anakotare raen bintabo muno Opamo no no rui rui vayave
1 Masmur Daud po ratoe. Nto irati akari po vatano matayao ukiny maugavo ransyerane rai ai.
Sya AMISY, Winyo rinayasiro mavabe muno Nyo rinaen.
2 Risya ana syo rave mamo Winyo raen bintabo;
Wino no munijo ntiti weramu winanto risya ana syo ratantona rai tenambe to.
3 Winami ntami rinai arono syo anakere raijar muno arono inaneme mpaya anakere rai;
Winyo sya ana idave raen tenambe.
4 Weye tugae, AMISY, syana syo ayao inta raura rainyamo
Winyo raeno wusyimbe to.
5 Winyo rinayan kijani,
muno Winya vambunine mo rinayaranande.
6 Winya ana ndaene mamo ntiti rave rinakivan,
weti vatane risyamo mamaisyo seo rai jewen.
7 Nai rui rui rati syoroto ri umba Winya no no we jewen e?
Nai rui rui vayave syoroto ri Winyamo no no sya wuisy!
8 Ranivara risyare to seo no naumo warae, Winyamo no no we;
ranivara risyare syakasyo niki no amanija ama uga waraya, Winyamo no no we.
9 Ranivara ribadirir ti syo uma seo ri rakivan,
muno syui ti to nanto no nawanane ama marano uma pasyo ri rai,
Winyamo no no we,
10 naije tavon Winyo rinaugav mavabe
naije tavon winanem ngkov vambunine mo rinasopan kobe.
11 Ranivara syare kaumure mo inatatuv mo rinangkokaibe,
muno varo mo rinavare rakanive ta, yara kaumure bo ntami,
ti syo rakarae syare Winyo rinaene ramu.
12 Yara ana tugae mamo kaumuro namije mo rinangkokaibe Amisye Winya ana ndaene raije ramu,
weye Winyo namane raen maisyare sansimane ntami, muno kaumure maisyare vare ntami.
13 Amisy, Winyirati Nyo inanuga muno rinanasine ranari tenambe vintabo;
Nyo rinanari mavabe arono rino no ingkoa ranobon.
14 Risyo nararimbe weye Winyo rinanarije mamo
mbe anainambe muno mamai dave.
Kotaro Winyo ranari tutudi mamo mbe anainambe,
muno risyo raen omamo tugae rave.
15 Risya pae mamo ngkokaibe Nai jewen
arono rinanari no varoro ngkokaibe rai,
arono Winyo rinanari no ingkoa ranobon.
16 Amisy winami ntami rinai arono ta ribe manave no ingkoa ranobon.
Risya masyoto rikovo rai tenambe
omamo Winyo ratoe Nya bukuge raija ntuna to.
Masyote umaso mainyamo Nyo rapatimu to
arono umaso inta mana mamai dainy.
17 Wakoe! Sya Amisy, Winya ana datantona mamo risosobe rinanto raiji,
ama manui ma ratore kakai!
18 Ranivara risyare idator, omamo mo nayavo mayano warave rakivan.
Risyo Winya ana datantona ratora ntoa rui kai, rimamaisye jeweno rai vintabo,
yara Winyamo ntuna rinautan tutir.
19 Syare Amisy Winyo vatano mamune maubaisy indamu mansaumandi,
muno vatano wo mavuge rave maeparo marambe rinai.
20 Onawamo wo mamune ratantona Nai,
wayarurijabe muno ubesea umarovave Nai.
21 Sya AMISY, vatano manuga mamuno Nai onawamo inanuga mamuno mai,
muno syonae vatano ube marovave Winaije mai.
22 Rinanuga mamuno mai rave tugae,
muno rimarovave irati mansai tavon.
23 Sya Amisy, syare Winyo inanuga rakewar asyo indamu winanto inanuga rai;
Syare Winyo inayasiro mavabe indamu winanto sya ana syo ratantona rai tenambe.
24 Nyo inanuga raen ayao kakaije inta no rinaija rako?
Syare Winyo rinaugav mavabe to no unanuijo kovo nuge nuganui rai.