126
Wama siuri ma indati wamo ama ine raen
1 Ransyerano Israel ukiny dai arono wanya usea no Yavaro Amisy no Yerusalem.
Arono AMISY Po Israel wansapaya munijo aroo rai indamu wamakare tantuna no Yerusalem rai,
wakoe! omamo maisyare wanakimarive wemaisy, weye ana kove so nande wansai.
2 Arono naije, anayanambe ntairijo wansanuga rai,
muno wansananibe, wangkinyo ransyerane rai.
Muno no susye kotare raito vatane wo raura ware:
‘‘Ana mbe anainambe somamo AMISY Wepi Po rave mai.’’
3 Tugae, AMISY Po ana mbe anainambe rave wansai to,
omi mbewaramo wansanayanambe.
4 Reama AMISY, reamare Nyo anakotare raveramu ngkovo reansai maisyare arono wusyine wemaisy akato,
maisyare maru pape maje ti mana sapa anoko Negep njam akato wemaisy.
5 Vatano po anare rayanyum ti siuri raija poyov,
arono mare nsin to yamo gwain ananibe rautan.
6 Vatano kumbaro anare rai ti siurija amingkaru ntende,
indati gwain ananibe arono apa ingkuja ntairi ama ine rai ti nin ndautan.