Yawa MASMUR 121

121

AMISY Opirati Po wansayaranande tutir

1 Ransyerano vatano Israel ukiny dai arono wanya usea no Yavar Amisy no Yerusalem.

Syo unate so ranyanyube anyi,

indati arepi de po rinasopan?

2 De ti po rinasopane pamo AMISY,

Opirati Po naume muno mine so ranari tenambe.

3 Opamo aneme mpaya nai jewen, ti nto ntemaje ramu,

Opamo ami maomombe ramu ti Po nayaranande tutir.

4 Tugae, Amisy Po vatano Israel mansayaranande Opamo,

ami maomono intai jewen muno niki intai jewen.

5 AMISY Opirati Po nayaranande tutir,

AMISY Opirati tuna nautan* indamu darino naora.

6 Weti indati uma apa mamoano masyote yasyine mo nanene jewen,

muno embae ama vare mo anakotaro ngkakai raugavo nai jewen.†

7 Indati AMISY Po nayaranande ti anakotaro ngkakai inta nande nai jewen,

muno Po nya njayaisye so rayaranande tutir.

8 AMISY Po nayaranande tutir arono winto no rui rui vayave,

nai unumeso ntoa nuge nuganui.

* 121:5 tuna nautan: Ayao Ibrani maisyare so: ‘‘tet no nanem ngkov,’’ omamo mbe rarorombe Opamo tuna nautan. † 121:6 Embae mamo arono wusyinoe vatane inta wanave ware mo wanene raugavo vatane mai.