118
Kangkamambe Amisye Ai, weye Po anasineko raunande wansai no marova rai
1 Kove raura AMISY Ai, weye Opamo ko dave!
Tugae, Apa muinye no tawan ntoa nuge nuganui.
2 Koveamo vatano Israel wapo raura wapare:
‘‘Tugae, Apa muinye no tawan ntoa nuge nuganui.’’
3 Koveamo syeno susyo Harun wapo raura wapare:
‘‘Tugae, Apa muinye no tawan ntoa nuge nuganui.’’
4 Koveamo vatano wapo AMISY asyanive wapo raura wapare:
‘‘Tugae, Apa muinye no tawan ntoa nuge nuganui.’’
5 Arono rino irati ana nsosobe ama uga rai, syo AMISY anonae,
umba Po sya ana danajo raveti mamaisy, ti Po inapaya irati ana nsosobe rai.
6 AMISY Po marimbe rinai, weti rijanive ramu,
vatano arepi indati po ana ngkakai inta raveti nande rinai jakato?
7 AMISY Po marimbe rinai, Po sopambe rinai,
sya marova nawamo inami ntami maijo Po mataoponi.
8 Koveamo nggaugambe AMISY Ai,
wemi ngkov akato irati nanaveano vatane mansamene rai.
9 Koveamo nggaugambe AMISY Ai,
wemi ngkov akato irati nanaveano vatano akokoe mine so mansamene rai.
10 Susyo wantatukambe Amisye Ai wo rinawariki wanui rave,
weramu tugae, tamo AMISY obom risyo mapinde.
11 Wo inakijaniri tenambe ti maroyaro rinai,
weramu tugae, tamo AMISY obom risyo mapinde.
12 Maroyaro rinai maisyare anyivane inta mangkato rinai,
weramu kavuratawe Po mao bintabo maisyare taname inta mansanano insumai kanene rai ti mewen to wemaisy.
Tugae, tamo AMISY obom risyo mapinde.
13 Maroyaro rinai mangkebe ti kavintare wo rinapinde kobe,
weramu AMISY Po sopambe rinai.
14 AMISY Opirati sya vambunine nsawa Ai Pije, muno rikiny syo ararimbe Pije,
Wepi Po rinapaya irati marova mai to.
15 Amisye Apa kawasae umananibe muno ukinyo ransyerano anasineko rai no awa randumo una ri raito anyi, ware:
‘‘AMISY Apa vambunine mi mo ana makokoive so rave wansai!
16 Anemo vambunine mi mo anasineko raunande wansai,
AMISY Apa vambunine mi mo ana makokoive so rave wansai!’’
17 Risyamo indati rikakai jewen, yara rikov tutir,
indati syo AMISY Apa ana dave ravovo.
18 AMISY Po inanepati mangkebe,
weramu Po inaugavo wene raronto ramu.
19 Syare unsanda akoe sisa no Yavar Amisy rausiso rinai,
indamu risiso no ama uga,
muno syo kove raura seo AMISY Ai.
20 Unsanda akoe umaso mirati vatane wo raisisa indamu ubeaje AMISY Ai,
vatano ubeta Ai obo nawirati mamaisyo wo raisisa.
21 Syo kove raura seo Winai, weye Winyo sya ana danajo raveti mamaisy,
muno Winyi Nyo rinapaya irati marova mai to.
22 Oramo vatano wo yavare ranari wonayo rai, ti wo ramauta vayave,
omirati oramo manasyin dave Amisye Po ratayao indamu yavare rauseo nteto rai, mo raijar matuve.
23 Ana somamo AMISY Apa ana dave ma,
tugae, wamo raenamo nsinam dave.
24 Masyote so mirati AMISY Po rapatimu wansai,
ti waderamu wansananibe muno wansanayanambe masyoto unumeso rai!
25 Reama AMISY, reambeke dave reamare Nyo reansapaya irati kakai rai!
AMISY, reambeke dave reamare Nyo anasineko raude reansai!
26 Kove ngkov irati Napi de tamo Amisye rautane Ai!
Nai Yavaro Amisye ama uga so, reamo AMISY anajo indamu Po kove raugaje wasai!
27 AMISY Opirati wama Amisye Pije,
Opamo Po kove raugaje wansai to, maisyare vare mbaro wansai wemaisy.
Wade! Wapo kaipe wao raijaro wasaneme rai, indamu wambovambe,
tewa oram anakotare rameseo Amisye Ai rakijani.
28 Winyirati sya Amisy, syare syo kove raura seo Nai,
sya Amisy, Winyirati syo nabumbundi.
29 Kove raura AMISY Ai, weye Opamo ko dave!
Tugae, Apa muinye no tawan ntoa nuge nuganui.