116
AMISY Po inapaya irati vambunino wene rai
Rinanuga no AMISY Ai, weye Po inanamote ranaun,
muno Po sya ana idawainto Ai raraniv.
Weye amarikoame rasakinav de sya ana danajo Ai rai,
weti arono ta rikove soamo Opirati syo awain.
Waijo wene mo inapapakai to,
wen akoe maisyare aviri mo inaman ti rijanivo rikakaiji,
mo rinaveti rinanuga so nseo majeve muno rinanimaumbe.
Umba syo AMISY Apa tame rawain, syare:
‘‘Sya Amisy, syare Nyo inapaya irati kakai so rai!’’
AMISY Opamo muiny dave muno moyar,
wama Amisye Opamo aemeno wansai rave.
Vatano wananepabe nawamo AMISY Po mansayaranande;
risyamo mayondi rave to, weramu Po inapaya irati kakai rai.
Koveamo rinanuga so ntanamanin akato,
weye AMISY bekobe rinai to.
Tugae, Po rinapaya wene rai to,
muno risyoyove mamo Po ransopi,
muno Po rinapaya ra vatane wo rinapinde jewen.
Weti indati syanya syararai tutir irati AMISY Ai,
no arono ta rikov no mine vone so.
10 Syo raura kai, syare: ‘‘Risyamo siuri mo rinatawanto rave,
weramu syanave no tawano Amisye Ai.’’*
11 Arono rijaniv, syo raura syare:
‘‘Vatan tenambe nawamo aarurijate nawa.’’
 
12 AMISY Opamo bekobe rinai rave to,
weti syo Apa kove rasakinav tai rui?
13 Indati syo kapi ntairi angguri rai raugavere AMISY Ai, syo kove raura seo Ai,
syo Apa tame rararimbe weye Po inapaya irati kakai rai to.
14 Syo sya urairijo ridaokae nande AMISY Ai raveti mamaisy,
no Apa kawasae mansamun tenambe.
 
15 AMISY animaumbe rave
arono vatano anuga no aije inta kakai.
16 Sya AMISY, risyamo Nya vatano syanapatambe Nai,
maisyare sya ingkoa manapatambe Nai wemaisy, ritavon syanapatambe Nai,
Winyi Nyo rinapaya vambunino wene rai to.
17 Syare syo maere raugav syo rameseo Nai, indamu syo kove raura,
muno syo AMISY Nya tame rararimbe.
18 Syo sya urairijo ridaokae nande AMISY Nai raveti mamaisy,
no Nya kawasae mansamun tenambe,
19 no AMISY Nya Yavare ama wanijate, no munijo Yerusalem ama yasyin.
AMISY ararimbe!
* 116:10 Ayao so ratoe akato no 2Kor. 4:13.