11
AMISY Wepi darino wansaora
1 Masmur Daud po ratoe. Nto irati akari po vatano matayao ukiny maugavo ransyerane rai ai.
Risyamo rigaugambe AMISY Ai,
weti mbe animaibe nyo inaura dea nyare:
‘‘Winyare mpaya kakai rai, weamo nyo pepake ratonami
indamu nto nanto nte no unate warae!’’
2 Weye vatano mamune po apae raivit,
po atoe rantiki te no kaumudi rai,
indamu po vatano beto Amisye Ai atapo.
3 Ranivara ananyao mo kawasae wansaokaisye rataka doyadi,
weamo vatano ubeta AMISY Ai ubeta ri mamaundi.
4 AMISY no no Apa Yavaro ndandinite rai,
AMISY tuna no Apa kursijo ntiti rai no Manunggara.
Ami ntamijo vatano mine so mai tenambe,
Po vatane mayasiro mavabe muno Po matauno awa ana udave rai.
5 AMISY Po vatano beto Ai pe vatano mamune pe
yanuga rayasir tenambe.
Opamo pari jirati vatano bekero ivuinye rai ai.
6 Po mangke tanamo nsundive
muno tanamo ama kijao ranavane ngkakai rasui vatano mamune mai,
muno Po ovaro mamoane ratutiro mai ti mo manen;
omirati mangke Po ratayao mansamarom.
7 Weye AMISY Apa ana be muno Apa ana dave mamai dave,
muno muiny irati vatano ubeta Apa ananyao raije mai,
wenawamo indati wo amune raen.