63
Amɨn kɨnda da Piŋkop gat egɨp do nandaŋek bɨsit agɨt
Dewit Juda mɨktɨmon mɨktɨm amɨn da arɨpmɨ dɨma egɨpmɨ uŋudon egek kap on mandagɨt.
1 Piŋkop, gak Piŋkopno.
Nak pi madepsi aŋek gak wɨsisat.
Nak mɨktɨm kɨbɨrɨ amɨn da arɨpmɨ dɨma egɨpmɨ tɨmon egek tapmɨmno mɨnisi aŋakwa amɨn da pakbi do aŋ uŋudeŋ wupno da gak do tepmɨsi nandɨsak.
Aŋek gɨptɨmno da gak gat egɨpdosi nandɨsak.
2 Telagɨ yutnon gandagɨm.
Tapmɨmgo madep gat ae tɨlɨmgo gat pɨndakgɨm.
3 Mɨktɨmon egɨp egɨp uŋun tagɨsi, mani uŋun yapmaŋek gak da nin do but dasi galak taŋ nimɨsal uŋun da wukwisi asak.
Do nak mango yaŋ aŋkɨsisat.
4 Nak si egɨpbeŋ bɨsapmon mango yaŋ aŋkɨsiŋ wɨgɨkeŋ.
Kɨsitno si paŋenagek gak do bɨsit aŋ aŋ abeŋ.
5 Amɨn da jap galagɨsi nelagɨ toŋ naŋek arɨpmɨ aŋ uŋudeŋ wupno galagɨsi nandɨsak.
Do nak kɨsɨk kɨsɨk kap yaŋek mango yaŋ aŋkɨsisat.
6 Nak dɨpmɨn potpot tamokon si pokdot bɨsapmon gakdosi nandaŋ egɨsat.
Kalbi nandak nandak gak dogɨn asat.
7 Gak paŋpulugokno egɨsal, do nak gak da pɨt kagagwan tagɨsi egek gak do kɨsɨk kɨsɨk kap yosot.
8 Wupno gak da kapmatjok gol awɨldak.
Aŋakwan kɨsitgo amɨnsi tet da nak tebaisi abɨdosok.
9 Amɨn nɨkba kɨmokgeŋ do nandaŋ amɨn, uŋun tasɨk tokdaŋ.
Uŋun kɨmakbi kokupgwan pɨgɨkdaŋ.
10 Uwalni da emat agak sɨbabaŋ dapba kɨmagakwa joŋ pɨŋan da gɨptɨmni nokdaŋ.
11 Mani kɨla amɨn madep nak naga Piŋkop do kɨsɨk kɨsɨk akdɨsat.
Ae Piŋkop yol do uŋun da manon da yaŋ teban tok awit amɨn, uŋun kɨsɨk kɨsɨk tagɨ ani.
Mani uŋun da top amɨn dakon gen kagani sopdɨsak.