2
Keresu Yaambed Wadkeri Kondoon
1 Kumban yiib kuu anukbed yiib wabkad inameniib ambarakmiyiib kumbed yiib kingkin kuu bobnoon.
2 Kuyaron kuu yiib kuu okad kiri ye inamen arewa yaayiib ambid wedya ye oonimbon ye korok Seteniib ye yoman wenenib dobirimaib. Kuye awad arewambed kibikee wabkaddan yaa yi korok keroon kui.
3 Anuk kuu nub korem kuu yi yoom ibmo doburuwen, nub kuu id ye dowaken ye moom yaambed mikmone doberemberenub kuye inameniib meeni dowakeniib ye yoman winimaub. Kuyaron kuu nub kuu okad kiridanmo kowe, nimakarub yena areb God ye norin aom wunuwen kii.
4 Kumban mimyob keende kakman yemoon are nonondandi ye God kuu, ye mimyob dowaken miin darewoob kumbed
5 nub ambarakmi yaambed nub kingkin kuu bobnoon kumban yembed nub yaa wadkeri kondoone Keresu yoom doruub kii. Yiib kuu God ye kabamoon kondoon ye mimyob dowaken yaambed bobni yaa kuu burudande bindoon kii.
6 Kwane, Godbed nub kuu Keresu yoom ibmo benkoobene Yesu Keresu yaa Ewen ye oonimbon aom ben daboknoone diburuwen.
7 Godbed kwanoon kumbed kibikbed wene amaan ari kuu ye kabamoon kondoon ye mimyob dowaken korem burudandoon yembed awinoon kuu korokbendaneen. Kuye kabamoon kondoon ye mimyob dowaken kumbed Yesu Keresu yaa nub ben daboknoon kowe, nub yaa amun amun kamenaboon.
8 Amborom kuu ye kabamoon kondoon ye mimyob dowaken yaambed yiib kuu bobni yaa burudande bindoon kowe. Kee anam andi yaambed kui, yiibkarebban, Godbed munob kondoon kii.
9 Kuu yiib ambangki yaa kumbedban kowe, karub maa kanembed kerengkan keraanban.
10 Kedi, Godbed nub kuu amunmo ongmenaboon, nub kuu Yesu Keresu yaa ben daboknoon kumbed amun amun kami dowad ongmenaboon kii. Amun amun kami kee nubbed ambangkime andi dowad anuk yirimbed nekwoon.
Keresu Yaambed Mimo Keruwen
11 Kwanikob, meenime, Yuudan yi kuu yikareb “Nub kuu kad wanabiwendan.” andimaib. Kwane, yiib wooniwen kuu Yuudanban kumbed yiib yaa Yuudanbed “Yiib kuu kad wanabindodan.” andimaib. Kumban kad wadmi kuu no id yaa karub dingkimbed wadmimaib, Godbedban.
12 Meenime, anuk yiri kuu yiib kuu Keresu yaa daboknindo, Israeldan kerindeban, weng kunduk ye amob weng Abraham ye dowad ongmenaboon yaa kuu owoddan keriwen, yiib kuu Godbed nub dowad kwananeen ande meedmiyiibban, Godiibban okad kiri doriib kii.
13 Kumban Yesu Keresu ye umkan yaambed yiib kane kane ambab angkambed doriib kuu Keresu yaa ben dabokne God ye dia monoon.
14-15 Amborom kuu yembedmo kuu nub yaa yewenub kondi ye karub, Moses ye amob wengiib amowamob ongmiweniib kuu yembed mene at ming arimbed bobnoon kumbed nare wankaroon kowe, wedyiri wirine nare andokbe yeka yeka ayoob keroon kuu yembed ben mimo kerene neman kongenoon neman kongenoon kami ye kuuk wiriniwen kuu monmaroon. Kwamune kamoon ye inamen kuu ye yaambed karub ayoob areb keriwen kuu koronde karub yeeb mimo kere yewenubmo kerime ande ongmene,
16 keye karub yeeb ye id mimo yaambed karub ayoob areb kee God yaa kunum kerime andene, neman arud wandoon neman arud wandoon kamimaib kuu at ming arimbed dowan keroon.
17 Yembed mene yiib ambab doriibdaniib dia doriibdaniib yaa yewenub weng kedmengkandoon,
18 amborom kuu nuwa yiiwa ibmo Kingkin mimo yaambed Ambe God yaa wini ye kiwaan yembed ongmoon kowe.
19 Kwanekob, yiib kuu ambibkin maadanban, yiib kuu owoddanban, kumban yiib kuu God ye karuwa nimaya kere dabokne God ye ambibkindan kerenib, ye dana meed keriwen.
20 Kwane, God ye karuwa nimaya kuu ambib areb ongmoon. Yi dodkono kuu apasodaniib profesidaniib kui. Yi ambib kumundin amun yenbi ye dongka bot kuu Yesu Keresu, yembedmo.
21 Ye yaambed ambib id kumundin kuu yenbenabe mimo kere Yariman ye kurikuri boyambib karadmo kere daane weneen.
22 Kwane, yiib kangkon Yesu yaambed ambib areb yenbenabe weneen, God ye dobirimbon kere weniib, ye Kingkin yaambed kui.