13
Baanabas Yoom Sool Yoom Kingke Ben Nongkobiiwe Winiwen
1 Anam andiwendan Antiok aom doriib kuu profesidaniib kedmengkandidaniib kui. Yi aombed kuu Baanabas yoom Saimon yaningko maa Kadbinmo yoom Lusius Sairinman yoom Manaen (Erod Antipasiib ibmo kainiwenman) yoom Sool yoom kui.
2 Kwane, yi kuu animan korondekoriwa, kurikurimo kamiiwa, Kingkin Karadmombed yi yaa yedmoon, “Baanabas yoom Sool yoom kuu ne deme awini dowad kingkime.” andoon.
3 Kwanandoona, yi ika animan koronde kurikuri kamekorib, Baanabas yoom Sool yoom ari kuu yi dingki nongkobekoriwa kurikuri kerunde be nongkobiiwe winiwen.
Dudbi Saipurus Yaa Winiwen
4 Kwane, yi ayoob kuu Kingkin Karadmombed ben nongkoboona karamok anuk yiri wene Selusia taun nandekorib, parai motodbed Saipurus dudbi yaa yaniwen.
5 Kwane wene Salamis taun aom aomne wene Yuudan yi kurikuri ambib maa maa kuyaom God ye weng dakmenmo yariwen. Yoon Maak, ye kwangkon ye yoom winiwen, yi deme yaa awandimaan.
6 Kwane, dudbi kumundin kuyaom kuu yarekoriwa, Pafos taun aom aomdiriwen.
Kwane kuyaa kuu Yuu ye karub yowangkimiiwa dudi god yi weng wengambere dakmiyiiwa awinoonman yaningko Baa-Yesu wedmeniwen.
7 Ye kuu dudbidan yi korok Seegius Paulus yeyiib doreen. Kwane, korok kuu inamen indengandengman kowe, Baanabas yoom Sool yoom yaa minime ye weng yuk keendoon, amborom kuu God ye weng wengambaranded kowe.
8 Miniiwe, dakme doriiwe yowangkimman (Gurik wengbed yaningko kuu Elaimas) kumbed, yi ayoob yaa bon kerundekore korok yaa God ye weng wunekarem ande kamoon.
9 Kwane, Sool yaningko maa Pool kumbed Kingkin Karadmombed ibnenoonkob, Elaimas yaamo kerenomberene yedmoon,
10 “Eb kuu Seten ye mingki kere, inamen yorokmo korem ye bonman kii! Kwane, eb kuu dudanabi mimim koremiib birandi mimim koremiib ye karub. Eb kuu God ye anam andi ye kiwaan kuu monmarandamimaab kuu deerewandaneewoo?
11 Kowe, kibirebya kee, Yariman ye aromkonombed eb kuu indob tutnaneena aron yenayiib awingyab ye nambiri kuu wedmaabban.” andoon.
Kwane, erebnariyiibban wiiwiibbed kande kebenuune kumun keroone awerendobene karubbed ma nen kinban wonok ande onmoon.
12 Kwane, korok kuu wedmekore, binangke Yariman ye kedmengkandi weng yaa anam andoon.
Antiok Taun Pisidia Aom Winiwen
13 Pool yoom ye yoom winiwendan yoom kwane Pafos domonde parai motodbed wene Peega taun Pamfilia aom winiwen. Kwane, kuyaambed Yoon Maak kuu yi domonde Yerusalem aom ika wonoon.
14 Kwane, yi kuu Peega domonde Antiok taun Pisidia aom winiwen. Kwane, Sabat aron ari kuu Yuudan yi kurikuri ambiwoom aomne wene dibiriiwe,
15 kwane Moses ye amowiib Yuu profesidan yi wengiib God Ye Weng aombed kimingkiwen. Kwane kurikuri ooniwendanbed yedmiwen, yi yaa, “Angkodmia, yiib kuu ma ongkandi amun ye wengiib keroka, dakmime.” andiwen.
16 Kwane, Pool yaro dorene dingki kankoone yedmoon, “Israeldaniiwa ambibkin yenadan God yaa une bumangkimaiwiiwa, ne weng yaa wengambirime.
17 Kurin kurin kuu Israeldan yi Godbed nub awoya yiri kuu kingkekore, Idyip aom dobiriwen kuu yembed amun kerundoona muubniwen. Muubniiwe, Godbed yaromkono darewoobbed Idyip aombed bin yaro monoon.
18 Kwane, weeb 40yiib amboon aom dewenebiwen kuu wabkad keriwen kumban, amun amunmo kamenaboon, yi yaa.
19 Kwane, ambibkin ediib kuu yembed yeene monmarekore, ye karuwa nimaya yaa okad bangkandoone yi okad kereen.
20 Kukwane wonoon ye weeb kuu weeb 450yiib.
“Kuye yoman kuu Godbed wengyundandi wengambiridan kingkoona, yimbed Yuudan oonendimaib. Oonendimaib kwane yimin ari kuu profesiman Samuel kuu doboroon.
21 Kwane, kuye aron yaambed Yuudanbed kingiib kerok andiib kowe, Godbed Kis ye mingki Sool kuu amyenimbon Benjamin yaambed kondoona, weeb 40yiib yembed korok kere oonoon.
22 Kumban Godbed Sool kuu dankarekore, Dewid kondoona, yembed king keroon.
“Kwane, Godbed Dewid ye dowad dakmoon, ‘Yesi ye mingki Dewid kuu wedmaan kuu nembed dowaken ye karub keroon, amborom kuu ye kuu nembed komo komo kame ande yedmimain kuu kwanimaan kowe.’ andoon.
23 God ye weng kunduk yedmoon kwane Dewid ye awoya ari yaambed, Bobni Yaa Burudande Bindi Ye Karub Yesu kuu Godbed Israeldan yaa kondoon.
24 “Yesu ye deme andowindo yaron kuu Yoon Baptaismanbed Israeldan yaa yi ambarakmi yaa, ‘Deerewande korondime, mene baptais kerime.’ ande dakmoon.
25 Kwane, Yoon kuu God ye weng dakmi dowan kere weneen yaambed yedmoon, ‘Yiibbed meeniib kuu ne kuu kane? Yiibbed meenme meedmiib ye karub kuu nemban oo! Ye kuu ne yoman mananeen kui. Nembed ye yonkad nong dudmungki deme kuu yiminban, amborom kuu yaningko kuu ambab ari kowe.’ andoon.
26 “Angkodmia, Abraham yawo awo aridan kui! Ambibkin yenadan God yaa une bumangkimaib kui! Godbed nimakarub baneen ye weng kuu nub yaa monoon kii.
27 Yerusalemdaniiwa yi korok korokiiwa kuu Sabat korem ari God Ye Weng kimingkenib dakmembirimaib kumban, Godbed Kinoona Monoonman Yesu kuu wedmene yikaadkerindo kerekorib, wunekariwen. Wunekariwen kowe, ye yaa komo keraneen God Ye Weng kumaom unyemanbed wongkoon kuu anam id keroon.
28 Ye kuu ma ambarakmindo kumban, Pailet yaa nenkone ye kuu aye kowi yeman andiiwe aye kowoon.
29 Komo God Ye Wengbed komo dakmoon kuu ye yaa kwane kame dowan kerekoriwa, at ming ari kuu biande mangkiwen.
30 “Kwane bobnoon kumban Godbed nenkoone wadkeri konoona demboon.
31 Kwane, ye yoom anuk kuu Galelimbed wene Yerusalem ari yarebiwendan yaa kuu yembed aron yemoon kuu angkadaraana wedmenimo kamiwen. Kwane, yimbed anam yi kerebiri indowiib wedmeniwen kowe, ye weng kanwene dakmimaib, nub weng mimodan yaa.
32 “Nub kuu Godbed nub awoya anuk yaa weng kunduk kondoon kuye weng kibireb kee dakmuub.
33 Nub kuu yi awoya ari kowe, weng kunduk kee kondoon kuu Yesu nenkoonoona ika demboon kumbed nub dowad anam id keroon. Kwane, Yook ayoob aombed yedmoon kuu,
‘Eb kuu ne Dana,
kibikee eb Ambe keraan kii.’ kwane wongkoon kui.
34 “Ye kuu bobnoon yirimbed Godbed nenkoonoon kowe ma deendaanban. Kukuu ye weng kuu God Ye Weng aombed yembed dakmoon,
‘Dewid yaa karadmo ye weng kunduk anam nongkobaan
kwane kabdaniin.’ kwane wongkoon kui.
35 Angkon Dewidbed kwananeen ande yedmoon, God yaa,
‘Eb kuu eb Karadkonoman korondaawa,
bobkonombon dem aom deendaanban.’ kwane wongkoon kui.
36 Kedi, Dewid kuu God ye deme awine dowan kerekore, ye bobnoon kuu kanwene ye awoyayiib mangkiwen yaa kanwene mangkiwen kowe, ye id kuu deendoon.
37 Kumban Godbed Yesu bobnoon yirimbed nenkoonoon kuu ma deendindo.
38 “Angkodmia! Kwani kowe, ne dowaken kuu yiib yiibkaadkerime. Yesu yaambed ambarakmi yaa kuu are nonondandaneen kuye weng kee dakmuub kei.
39 Kowe, Moses ye amobbed ambarakmi yaambed yiib ben obon kerundindeban, kumban yiib kuu Yesu yaa anam andaniib kuu yembed ambarakmi yaambed ben obon kerundaneen.
40 Ongme meenime! Profesidanbed weng kee daandiwen kuu yiib yaa anam id keraib!
41 ‘Damangkanidan! Yiib wedmibka meenime kumban duknime,
amborom kuu yiib doriib yaron yaa kuu kami mamaa ongmaniin,
kumban anam andaibban kowe.
Kuye weng kuu karub maambed yiib yaa yedmendaneen kwangkon
anam andaibban keraniib.’ kwane wongkoon kui.” andoon.
42 Kwane, Pool yoom Baanabas yoom kurikuri ambiwoom yere wanandamiiwe yedmiwen, “Sabat maa ari kuu mene weng kee ika daandime.” andiwen.
43 Kwane, kurikuri dowan kere, nimakarub yemoon Yuudaniib Yuu keriwendaniib kuu Pool yoom Baanabas yoom yaa winiiwa, ongkande daandiwen, “God ye mimyob dowaken kabamoon kondoon aombed kwane dobirime.” andiwen.
Poolbed Yuudanban Yaa Weng Amun Kanwonoon
44 Kwane, Sabat aron maa kuu taundan kumundin areb kuu kwane menebe wengamborok miniwen.
45 Kwane, nimakarub ku nedbiwen kuu yemoon kowe, Yuudanbed dowakeniibban kerenib wungkandi darewoob kerekorib, Poolbed ongki weng ku dakmeen yaa noriniib wengberenib amkidbiwen.
46 Kwane, Pool yoom Baanabas yoom arudkonomo inandunde yedmiwen, “Kiwaan amun kuu God ye weng yiib yaadin dakmuwen kui. Kumban yiib kuu wedmendandenib kwane wadkeri aron korem korem kuu korondiwen kowe, Yuudanban yaa wenuub.
47 Yarimanbed nub yaa kwanime ande yedmendoon kuu,
‘Yuudanban yi dowad,
eb ongmaanka nambiri kerewen.
Kwanaan kuu eb yaambed okad yimin yimindan yaa kuu
bobni yaa kuu burudande bindaniin.’ kwane wongkoon kui.” andoon.
48 Kwane, Yuudanban kuu kwane wengamberekoriwa, kubenib Yariman ye weng kankooniwen. Kwane kane kane Godbed wadkeri aron korem korem kandi ye dowad kinoon kuu anam andiwen.
49 Kwane, God ye weng kuu ambibkin kemaom kuu derendaroon.
50 Kumban Yuudanbed wene God yaa kurikuri kerimaib ye nima aningkoyiiwiib taun aom doriib ye karub aningkoyiiwiib yaa kwane daandiwen, “Pool yoom Baanabas yoom kuu arewadan kowe, yi yaa manmo kerem.” ande kamiiwe, kwane kamekorib, taun kuyaom kuu ben angka kirariiwa winiwen.
51 Kwaniiwa, taundan yi inamen arewa wedmi yeman kuu yi indob ari Pool yoom Baanabas yoombed yi yon dabderem yiri ingkud wangkiiwa kiroboona, kwane taun maa Ikonium aom winiwen.
52 Kwane, anam andiwendan taun aom doriib kuu kubi dowakeniib dobaraiwe Kingkin Karadmombed yi yaa ibnendimaan.