KHUBUKULU YI KISALU KI YESU
3
Yowani Mbotiki mvuala Nzambi
(Malako 1.2-6 ; Luka 3.1-6 ; Yowani 1.19-23)
1 Mu bilumbu bina, Yowani Mbotiki wuyiza ayi wutona longa mu dikanga didi mu tsi Yuda.
2 Wuba longanga :
—Lubalula mavanga ! Bila kipfumu ki Diyilu kinefikimini.
3 Yowani, niandi bayolukila kuidi mbikudi Ezayi :
Mbembo yi mutu wulembo yamikina mu dikanga :
Lukubika nzila mu diambu di Pfumu !
Luludika minsolo miandi !
4 Yowani wuba vuatanga minledi mivangulu mu mika mi kamela, bosi nsinga kaba kanganga mu luketo wuvangulu mu nkanda wu bulu ; bidia kaba ndianga makhoko ayi niosi.
5 Batu batotukila ku Yelusalemi, mu Yuda dioso ayi mu yenda nlangu Yolidani baba nkuizanga kuidi Yowani.
6 Atu beni bu baba tambudilanga masumu mawu, Yowani wuba kuba botikanga mu nlangu Yolidani.
(Luka 3.7-9)
7 Vayi bu kamona Bafalisi ayi Basaduki bawombo baba nkuizanga ku botama, buna wuba kamba :
—A bana ba bikusa ; a nani wululubudi mu tina nganzi yoyi yeka kuiza ?
8 Monisanu mavanga mamboti mammonisa ti bukiedika lubaludi mavanga.
9 Lubika banza bu lulembo yindula mu mintima mieno : “Beto tuidi mu nkuna wu Abalahami !” Bila bukiedika ndikulukamba ti Nzambi lenda totula bana ba Abalahami mu matadi mama.
10 Lukeba : soka kikubimini mu kuanga mianzi mi minti. Woso nti wunkambu buta mimbutu mamboti, wela kuangu ayi wela viku ku mbazu.
(Malako 1.7-8 ; Luka 3.15-18 ; Yowani 1.24-28)
11 —Minu mu nlangu ndilembo lubotikila mu diambu di monisa ti lulembo balula mavanga ; vayi mutu wowo wulembo yizi wundutidi mu lulendo ; ndisi fuana ko mu nata zisapatu ziandi. Niandi wela lubotikila mu Pheve Yinlongo ayi mu mbazu.
12 Ayi simbidi vevolo mu mioko miandi, niandi wela kombula buangu kioki kela vevila ; wela lunda ble ku yilu banga vayi wela yoka biti ku mbazu yi kayilendi zima ko.
Yesu wubotama
(Malako 1.9-11 ; Luka 3.21-22 ; Yowani 1.29-34)
13 Yesu wubotuka ku Ngalili, mu kuenda ku ndambu nzadi Yolidani muingi bambotika kuidi Yowani.
14 Vayi Yowani wuzola kunkakidila ayi wunkamba :
—Minu mfueni botoko kuidi ngeyo vayi ngeyo kuidi minu wizidi !
15 Yesu wumvutudila :
—Buabu, bika bu bela bobo ! Bila bobo bufueti dedokosolo busonga boso. Mbadi Yowani wumbotika.
16 Yesu bu katumbu botoko, wutotuka mu nlangu. Mbadi Diyilu dizibuka mu diambu diandi ayi wumona Pheve yi Nzambi yikuluka va niandi banga dibembi.
17 Bosi mbembo yiba ku Diyilu yiwakana :
—Niandi niawu muanꞌama wu luzolo, khini yiwombo kakumbonisanga !