Bible Iyansi IMƐƐY 5

Un'kaan anà un'tö a un'kɔk

1 U kɔɔ a ibaal a mbuur kan'bwaay u kir a imwol, mɛ kàmɛn un'kaan aŋàsɔn uboo anà u nsà, wàŋàbäm a inyɛm nsambwaar. 2 Apan, mɛ kàmɛn un'kyeey a ngwal wàmulaal in'kwɛŋ u ndaa a ngwal naa: « Nà kan'kwo mulwom inyɛm anà muduub un'kaan? »

3 Wɛɛ, itàkal u du, u mɛɛn anà u ngyɛl a mɛɛn, akà mbuur mwɛy kàkwe anki muduub anà muler un'kaan u boo. 4 Mɛ kàkyer alel mbɔɔn muman naa akà mbuur mwɛy kàmɛnà anki awà kan'kwo muduub un'kaan anà muler wa u boo. 5 Wɛɛ umwɛy uboo a andweer kàtɛn a mɛ naa: « Twon an'lel. Le, nde kàwɛl iböŋ, nde wà ntaamà a un'sɛŋ a Yudà, u mbil a David, nde asàduub un'kaan anà inyɛm awa byànsambwaar. »

6 Apan, mɛ kàmɛn un'tö a un'kɔk asànaa wàŋàdwa an'yàtoo u boboo a kir a imwol anà ikyeer inà anà u boboo a andweer. Wa kàkäl anà mbwaŋ, mbwaŋ nsambwaar anà mii, mii nsambwaar amyà an'dweelà nsambwaar kàtöm Nzam u mɛɛn manswà. 7 Un'tö a un'kɔk waa kàsin ntɔn muwal un'kaan u kɔɔ a ibaal a mbuur kan'bwaay u kir a imwol. 8 Mpal kàwɛl nde un'kaan, ikyeer inà anà andweer an'kwem mɔ̈ɔ̈l aŋinà bàbü an'köm kusà a un'tö a un'kɔk. Umwɛy umwɛy kàkäl anà isyäŋ anà an'kɔɔb a wɔl màŋàyɔl a may a usɔŋ. Ayi yà ngyamàkà a baar in'kyɛɛl. 9 Ba bàkäl mutɔl diim akün:

« Ngye an'kwo muwal un'kaan

anà muduub inyɛm awa.

Ntɔn ngye bàkyer adwa, waa u mbwo a an'kil angye,

ntɔn Nzam, ngye kàbeen

baar a in'sɛŋ myanswà, ndaa yanswà, mbil yanswà anà nsi yanswà.

10 Abun, ngye kàkyer imwol anà angaŋ ntɔn Nzam.

Ba bàsàyaal mbul a in'tye u mɛɛn. »

11 Ungö apan, mɛ kàmɛn anà kàwem ndaa a akyeey mbɔɔn anà ikyeer anà andweer bàŋàdiŋà kir a imwol. Ba bàkäl nkam a nsaab anà nsaab a nsaab. 12 Ba bàkäl mutɛn u ndaa a ngwal naa:

« Un'tö a un'kɔk awà bàdwä

kan'kwo muwal un'kanà,

un'naaŋ, an'yeerà anà ngwal,

ibyääl, làkoo anà nsaak! »

13 Apan mɛ kàfàwem indiir byanswà kàkyer Nzam u du, u mɛɛn, udu a ngyäl a kölàköl anà indiir byanswà abyà uboo kwo byàmutɔl an'diim naa:

« Akà mbuur kan'bwaay u kir a imwol anà akà un'tö a un'kɔk,

wɛy nsaak, ibyääl, làkoo anà ngwal byàkäl u mbul a in'tye! »

14 Ikyeer byànà waa byàtɛɛnà naa: « Yà abwɛy! » Andweer bàbü an'köm, waa bàkömà.