Bible Iyansi IMƐƐY 1

Imɛɛy a

Ywan

Nsɛmà

Un'söön a un'kaan wà ikɔb ande Ywan. Un'klistɔ kàsɔɔ nsi a ngwal waa kàkàbwaay kà isaŋ a Patmɔs. Nde wàmusam naa Dweelà In'kyɛɛl kàkyer un'wal kà « ilä a Mwol ». Nde kàbilà unsà lingyoomà a ndwɛy a isak isak, yà ifà ifà, anà yà ngwal. Wɛɛ u ntsüü, ya yàbulà yà duu. Ndaa a imɛɛy ayà uboo, yà muyöb nsim a baar.

Un'kaan awà wàŋàkab itiir isyaam: - 1.1-8: Isin a ndaa: Fà ngɔk atàtwɛb yà un'kaan bi kan'yöb naa kya kyà imɛɛy a Nzam, unsà ingɛlɛki apɔkalipsis ikaswaŋà naa "imɛɛy". Kya kyan'fà akà Yɛsu Klistɔ ntɔn un'tääŋ umɛn ubwaŋ aŋàkwo. - 1.9-3.22: Itiir kyàyweel kyàmuswaŋ imɛɛy mwɛy kyà ubem kyà « mwan a mbuur ». Ba bàmusɔn ndaa a Klistɔ akà Ikööŋ nsambwaar abyà u Azi minɔ̈ɔ̈r. - 4.1-11.18: Kà itiir kyàtär, Ywan bàmusyen du. Nde wàmuman idiim ibaŋ mbɔɔn. - 11.19-20.15: Itiir kyànà kyan'sɛmà u nduub a idwà a Nzam kyà du. Kya kyàmusɔn ikwàndwà a ube ifà ifà anà bàbɔɔmà. - 21.1-22.5: Kà itiir kyàtyeen, nsi akün yàŋàpɛɛlà anà yàŋàbay mbaa u mbwo a Nzam anà un'tö a un'kɔk. - 22.6-21: Ntsülà: baar banswà abà uboo a ndaa ayi, ban'tɛn naa: « Inye, wɛy ya iyi! »

Un'sak akà mbuur ataŋà un'kaan wà!

1 Un'kaan wà we anà imɛɛy kàwɛl Yɛsu Klistɔ. Nzam kya kun'pɛ ntɔn nde uswɛŋ akà asyääl ande ndaa ayà iyà benàben. Yɛsu ya kàkyään akà un'syääl ande Ywan u mbwo a un'kyeey ande. 2 Ywan wà mbäl a indiir byanswà kàmɛn nde: Ndaa a Nzam anà imbäl a Yɛsu Klistɔ. 3 Un'sak akà mbuur akataŋà anà akà baar bàweemà ndaa a ngɔɔm ban'sɔn uboo kwo anà bàfàkaar ya. Ntɔn taaŋ là tsütsü mukwo.

Mbɔr akà Ikööŋ nsambwaar

4 Ywan akà Ikööŋ nsambwaar abyà kà Azi:

Kab a ngway anà duu màkäl anà bɛ. Ma man'fà akà mbuur kàkäl, awà paa anà uyà, anà akà an'dweelà nsambwaar amà kusà a kir a imwol, 5 anà akà Yɛsu Klistɔ, mbäl afàkölà ndaa yanswà, nswɛm uboo a akü, mwol a amfum a mɛɛn.

Akà mbuur afikwen, nde kitwey uboo a man'be abi u mbwo a an'kil ande, 6 nde kibuul itsuŋ a angaŋ ntɔn musyääl Taarànde Nzam. Wɛy làkoo anà ngwal ikäl anà nde u mbul a in'tye! Yà abwɛy.

7 Le, nde wàmuyà uboo a un'böŋ. Baar banswà bàkyer asun'man, itàkal baar akwà bun'pfuul: in'sɛŋ myanswà myà mɛɛn isàsà un'saabà ntɔn nde. Inye, yà abwɛy.

8 Mwol, Nzam Aŋangwal, kan'tɛn naa: « Mɛ in'wà wàtàtwɛb anà wàntsüü, mbuur awà paa, awà kàkäl anà uyà. »

Ywan anà imanmii a Yɛsu

9 Mɛ un'tɔŋ abɛ Ywan, mbuur kàtüüb mbwo anà bɛ unsà ngyɛb, unsà imfum anà muküünà amu Yɛsu. Mɛ kàkäl kà isaŋ a Patmɔs ntɔn Ndaa a Nzam anà imbäl a Yɛsu. 10 Ilä a Mwol, Dweelà làkyer an'wal, mɛ kàwem ndaa a ngwal ungö a mɛ asànaa mfuŋ, 11 yàmutɛn naa: « Undiir wanswà amanà ngye, sɔn wa uboo a un'kaan anà tɔm wa akà Ikööŋ nsambwaar: akà Ɛfɛsɔ, akà Smirne, akà Pɛrgam, akà Tyatir, akà Sardɛs, akà Filadɛlfi anà akà Lawɔdisɛ. » 12 Mɛ kàkyer abulà ntɔn muyöb mbuur awà kàyäämà anà mɛ. Apan mɛ kàmɛn in'te a minà nsambwaar myà wɔl. 13 Uboboo a mya kàkäl anà mbuur mwɛy asànaa mwan a mbuur, akyàbwaar mvwɛl anà un'kab a wɔl aŋàbäm kà itɔl. 14 Un'tswe anà ntswe ande yàkäl yà pɛɛl asànaa ipfɛy a pɛɛl, asànaa mbul a pɛɛl. Mii ande myàkäl asànaa làlem a mbaa, 15 in'kɔl ande asànaa ishabà bàfàbel naa brɔnze aŋàyir a mbaa, ndaa ande asànaa làso a iwɔɔl. 16 U kɔɔ ande là ibaal, nde kàkäl anà mbwaar, mbwaar nsambwaar. Kɔm àŋàsye làyatoo u mun ande. Mun ande kàkäl asànaa taaŋ là paa in'ŋyäŋ u ngwal ande yanswà. 17 Mpal kun'mɛn mɛ, mɛ kàbü kà in'kɔl ande asànaa mbuur aŋàkwà. Nde kàsi kɔɔ ande là ibaal udu a mɛ, anà mutɛn naa: « Twon an'man bɔɔmà! Mɛ in'wà mbuur atàtwɛb anà wàntsüü, 18 anà wà Mɔ̈ɔ̈. Mɛ kàkyer akwà, wɛɛ le, mɛ in'we anà mɔ̈ɔ̈ a mbul a in'tye. Nsab a ukwà anà an'lɔŋ yà u kɔɔ amɛ. 19 Abun, sɔn indiir byanswà an'man ngye anà indiir isàyà ungö a bya. 20 Ngyee a mbwaar nsambwaar amɛn ngye u kɔɔ amɛ là ibaal anà in'te a minà nsambwaar myà wɔl ayi: mbwaar nsambwaar yà akyeey a Ikööŋ nsambwaar, in'te a minà nsambwaar myà Ikööŋ nsambwaar. »