Bible Iyansi 2 PETƆLÀ 1

Un'kaan wàyweel wà

Petɔlà

Nsɛmà

Un'kaan a Petɔlà wàyweel bàtöm anki itàkal akà Ikööŋ a bul làmwɛy, itàkal naa akundweer a isal mwɛy, itàkal naa akaklistɔ bàpää u mɛɛn. Waa wun'kaan a un'sɛŋ anà waa sye wasànaa kyän a dweelà. Ndaa a ngwal awa yà ntɔn munwaan a baar bàfiipay ngyɛb an'lɔŋ a nsöön a Làsaŋ, làsaŋ aŋàbwaŋ là Nzam. Ndaa a mfun Ungö a mbɔr a nsɛmà, indiir itär bye muyilääb. Wàntàtɛr wàmuŋyɛm unsà ndaa iler làbɔ̈ɔ̈n bàwɛl akà Nzam anà unsà imbäl a baar abà bàmɛn Mwol. Wàyweel mutɔn a ngwal isal a alɔɔŋ a loor bàfàkwaar mbwo a ndaa ndandaa anà yà balàbal. Wàtär utɔn ndaa mwɛy unsà ntɛn a ba: ba bàfàtɛn naa ngyeel a Klistɔ isàkal anki. Petɔlà kàfuur naa isàkal naa ya yan'kyer itaan, yàntɔn nkääŋàmpem a Nzam. Mbɔr a ntsü yàmupà un'kanà anà ngwal akà baar awà bàtöm waa anà akun'tääŋ a un'kaan awà wanswà. Mɛɛn màkɔ̈ɔ̈n anki akà ikikye anà baar bàfàkɔ̈ɔ̈n a kwaar Làsaŋ. Un'kaan a Petɔlà wàyweel wà un'kaan a ndaa: waa wàmupà un'kanà akà aklistɔ mukyà usà unsà ngyööb a Mwol, ntɔn mukɔɔn a tɔɔmà ndwaŋ umbwo a an'lɔŋ aŋàtà mbeen anà màbɔɔmà. Asöön itàkal atääŋ a biblɛ bamwɛy bàfàtɛn naa un'kaan awà wà ntööm Petɔlà kusà a ukwà nde u mbul wà an'kwem an'syaam aŋinà ungö a Yɛsu Klistɔ. Itàkal naa abà, undiir kan'söön uboo awa, yà ngyeel a Mwol. Ngö a nsööŋ a ngyeel a Mwol ayi, wà undiir mwɛy akà baar mpa abà Ayudà anà aklistɔ binkye mubɛy ya. Abun, un'kaan wàmuyɔɔb naa ngö a nsöŋ umii a Mwol kà ndaa a ngwal anki, wɛɛ nkääŋ a mpem ande ayà yaay bàpɛ akà baar banswà ntɔn muwal mɔ̈ɔ̈ anà musɔɔm nkääl. Un'kaan awà, wàmusà an'kyän unsà in'kaan a Nkwà itaan asànaa Nkwà akün. Abà yàkäl ndaa a ngywoolà a ntabwey a Mwol, amu ya Petɔlà wàŋàtà din.

Mbɔr

1 Mɛ Simɔn Petɔlà, un'syääl anà ntööm a Yɛsu Klistɔ.

An'söön baar abà bàwɛl làkwikilà aŋàbwaŋ asànaa bi unsà balàbal a Nzam abi anà Un'tswää a mɔ̈ɔ̈ Yɛsu Klistɔ. 2 Wɛy kab a ngway anà duu màkäl mbɔɔn anà bɛ, u mbwo a ngyööb a Nzam anà Yɛsu, Mwol abi!

Làbeel anà nsɔ̈ɔ̈l a Nzam

3 Abun, ngwal a du yipɛ kab aya yanswà yà ndöŋ ntɔn mɔ̈ɔ̈ anà inzaam, ntɔn bi iyöb mbuur kibel unsà làkoo ande ŋakwo anà ngwal ifàsal. 4 Kyakin, bi kàwɛl an'kab a ntal akölàköl amà bipɛ ilää, ntɔn, u mbwo a ma, bɛ làwɛl kab unsà inzaam, bɛ baar bàlagyɔɔr unsà làbiin ufàdii ilään a mɛɛn.

5 Kyakin, làsi ngwal abɛ yanswà mukwɛy làkwikilà unsà nkääl aŋàbwaŋ, unsà nkääl aŋàbwaŋ, làsi ngyööb, 6 unsà ngyööb, nkääŋ a mpem, unsà nkääŋ a mpem, imbämdir, unsà imbämdir, inzaam, 7 unsà inzaam, un'tüüb a atɔŋ a atɔŋ, unsà un'tüüb a atɔŋ a atɔŋ, ukwen. 8 Ntɔn, isàkal naa bɛ làbye anà nkääl ayi yàmbɔɔn, ya iyàlasiinà musal anà muyɛl unsà ngyööb a Mwol abi Yɛsu Klistɔ. 9 Wɛɛ akà mbuur akɔ̈ɔ̈n bya, nde wà ikwàmii, nde akyer afàbàba: nde uyöb anki naa nde wàŋàpɔŋà unsà man'be ande mà itaan.

10 Kyakin, atɔŋ, fàlasye ngwal ntɔn mutà làbeel abɛ mpi anà nsɔ̈ɔ̈l abɛ. Abun, waa bɔɔmà abwà mpa bàkal akà ikikye. 11 Kyakin, waa mbiilà abɛ unsà Imwol a mbul a in'tye kyà Mwol anà Un'tswää a mɔ̈ɔ̈ abi Yɛsu Klistɔ isàkal yàŋàduub kölàköl.

12 Kyakin, mɛ in'wɛy anki mufàlayɔɔb indiir abi, itàkal naa bɛ bya làkyàyöb anà bɛ làbà aŋàtsim unsà ndandaa ayà bàlapɛ. 13 Wɛɛ mɛ in'sii naa yàbalàbal muwiy an'kyän abɛ u mbwo a ngyɔɔb amɛ umpal in'wà mɛ uboo a ipfey a ndür ki. 14 Ntɔn mɛ in'kyàyöb naa taaŋ muwɛy ipfey a ndür aki làmuyà u ntiin, asànaa kan'swɛŋ Mwol abi Yɛsu Klistɔ. 15 Wɛɛ mɛ, mɛ in'sàsà ngwal naa ungö a nkyeen amɛ, bɛ làyɔbà an'lɔɔŋ amà taaŋ lanswà.

Ndaa a aŋangɔɔm yan'kwo amu Klistɔ

16 Abun, kà ntɔn mulab nsim a ntwan anki waa bi kàlakyään ngyeel a Mwol abi Yɛsu Klistɔ unsà ngwal ande yanswà, wɛɛ ntɔn kàmɛn bi uteer ande u mii abi ŋakwo! 17 Ntɔn nde kàwɛl ibyääl anà làkoo akà Taa Nzam, umpal kàtɛn nde a nde unsà làkoo ande làkölàköl naa: « Wà, wà mwaan amɛ wànkwen, awà kàsi mɛ un'sak amɛ amu nde. » 18 Ndaa ayi yàfü du, bi ŋakwo kàkyer awem ya, umpal kàkäl bi anà nde u mɔŋ in'kyɛɛl.

19 Abun, bi ibye anà ndaa a bwoor yàŋangɔɔm. Bɛ làkäl anà iböŋ musà mii abɛ udu aya asànaa mwin afàlɛɛmà kà ikal a làpib, tii umpal làyaanà taaŋ anà uyàsɛnà mbwaar a tutu uboo a mpem abɛ. 20 Kusà aya yanswà, làyöb abà: akà mbuur mwɛy ukwe anki nde ŋakwo mutà itàkal mubaal ngɔɔm ayà uboo a Ndaa Aŋàsɔn. 21 Kyakin, ngɔɔm kà ifàfà anki akà ikikye unsà ukwen a mbuur, wɛɛ unsà ngwal a Dweelà In'kyɛɛl waa baar bàyäm kà ikↄb a Nzam.