Bible Iyansi MALAKƆ 1

Làsaŋ Aŋàbwaŋ kàsön

Malakɔ

Nsɛmà

Un'kaan Malakɔ wà bàfàtɛn sye naa Ywan kàsön wa. Nde kàkäl kàlak a Petɔlà anà un'baay a Pɔl. Akà baar abà bàbɔ̈ɔ̈l nde kàwɛl indiir mbɔɔn byà mfun ntɔn musɔn Làsaŋ Aŋàbwaŋ lànde.

Aŋuyɛnà mbɔɔn bàfàsi naa nde wa kàsön u Lɔma ntsü a mbul 63 a 68. Nde wa kàsön ntɔn baar mpa abà Ayudà.

An'kyän ande manswà nde kàsi unsà isal a Yɛsu.

Ndaa ayuboo un'kaan awà ayi:

- 1.1-13: Ngyöön a isal a Yɛsu, mbuur afwel, ndüümà anà ndɛb ande

- 1.14-3.12: Nsɛmà a isal u Ngalilɛ, alɔŋki bàtàtwɛb, impà byàtàtwɛb, an'tɔɔn atàtwɛb, nswɛɛŋ mpa bàmɛɛy, ibyääl mpa bàyee

- 3.13-6.6 Kiin a isal u Ngalilɛ, nsɔ̈ɔ̈l a antööm kwem aŋiyweel, ntöön yan'söönà anà mbaaŋ, indiir impà byà ikɔ̈b, nswɛɛŋ a nkääŋ a mpem anà ukɔɔn amɛɛy, mpem a bwoor

- 6.6-8.26 Ngweel a isal u mii a baar u Ngalilɛ, Antööm bàkwem aŋiyweel.

An'lɔɔŋ a Ywan Un'düümà

(Màt 3.1-12; Luk 3.1-18; Ywn 1.19-28)

1 Nsɛmà a Làsaŋ Aŋàbwaŋ là Yɛsu Klistɔ, Mwan a Nzam: 2 Uboo a un'kaan a ŋangɔɔm Yɛsay bàsön naa:

« Le, mɛ an'tɔm un'kyeey amɛ kusà a ngye

ntɔn mulɔn mbwo angye.

3 Ndaa mwɛy yàmusà in'kwɛŋ u nsye a ipɔl:

Làlɔ̈n mbwo a Mwol,

làsuub myäy ande. »

4 Apan Ywan Un'düümà kàkàmɛnà u nsye a ipɔl, muyilɔŋ baar mubuul mpem anà muwal ndüümà, ntɔn badwääl nkul a man'be. 5 -Itiir a Yuday kyanswà anà baar a Yɛlusàlɛm banswà bàkyeenà akà nde, bàkyeyà man'be aba, waa nde kàfadümà u Yɔrdan.

6 Ywan kàkäl aŋàbwaar ipfɛy a in'kà a ntsür bàfàbel naa shamo anà un'kab a iban a ntsür kyàŋàkwam u lɔŋ ande. Nde kàdyee mpay anà bwey a nsye. 7 Nde kàkyäänà naa: « Mbuur kàman'söön u ngwal wàmuyà ungö a mɛ. Mɛ in'kwo anki munye ntɔn mutsuuŋ in'siŋ a idyaar ande. 8 Mɛ, mɛ kàladümà kan'dà, wɛɛ nde, nde ayàladümà u Dweelà Inkyɛɛl. »

Ndüümà anà ndɛb a Yɛsu

(Màt 3.13-4.11; Luk 3.21-22; 4.1-13)

9 Yàmɛnà naa kà ilä abin Yɛsu kàfü Nasàlɛr u Ngalilɛ. Ywan kun'dümà u Yɔrdan. 10 Pa kàtoo nde kan'dà, nde kàmɛn du làmudubà. Dweelà kàyàtyà udu a nde asànaa nkokà. 11 Ndaa yàfü du, yàtɛn naa: « Ngye awà Mwan amɛ wà nkween. Mpem amɛ yanswà ye amu ngye. »

12 Kà imbürà, Dweelà kun'siinà u nsye a ipɔl. 13 Kwo, Satanà kun'lwɛb ilä an'kwem an'nà. Nde kàkälà anà ntsür a ndwaŋ, akyeey bun'syäälà.

Isal a Yɛsu u Ngalilɛ

(Màt 4.14-22; Luk 4.14-15; 5.1)

14 Ungö bàyälà ba Ywan, Yɛsu kàkyen Ngalilɛ. Kwo nde kàkyäänà Làsaŋ Aŋàbwaŋ là Nzam anà mutɛn naa: 15 « Taaŋ lan'kwo, Imwol a Nzam kyan'tol tsütsü. Làbuul mpem abɛ! Làsi làkwikilà amu Làsaŋ Aŋàbwaŋ! »

16 Umpal kàkäl nde mulyäŋ kà un'kɔɔl a ɛwà a Ngalilɛ, nde kàmɛn Simɔn anà Andrɛ, un'tɔŋ a Simɔn, bàmutɔɔm an'kwen aba kà ɛwà: ba bàkäl alɔ̈ɔ̈b a nsö. 17 Yɛsu kàtɛn a ba naa: « Yàlan'läb, waa mɛ in'yàlabuul alɔ̈ɔ̈b a baar. » 18 Apan sye, ba bàsàwɛy an'kwen aba, waa bun'läb. 19 Kàsin nde ikye, nde kàmɛn Zyak mwan a Zebeday anà un'tɔŋ ande Ywan. Ba bàkäl uboo a bwaar aba mulɔn an'kwen. 20 Apan sye, nde waa kabel. Ba bàsàwɛy taaràba Zebeday uboo a bwaar anà baar a isal, waa bun'läb.

Baal kàkäl anà dweelà a làbe

(Luk 4.31-37)

21 Yɛsu anà alɔŋki ande ban'bilà u Kapɛrnawum. Apan sye, ilä a saba, nde kàbilà u ndwà a nköŋ a Ayudà, waa kàlɔɔŋà. 22 Baar bàkäl mubem an'lɔɔŋ ande, ntɔn nde kàlɔɔŋà asànaa mbuur awe anà ikɔ̈b, wɛɛ kà asànaa alɔɔŋ a in'kɔɔn anki. 23 Kyekà uboo a ndwà a nköŋ a Ayudà akun, mbuur mwey kàkäl anà dweelà a làbe, nde kàsi in'kwɛŋ: 24 « Yɛsu, un'nsi Nasàlɛr, ininà ngye akwen akà bi? Nkye ngye ayi ntɔn muböŋ bi? Mɛ in'kyàyöb naa ngye awà nà: ngye awà Ŋun'kyeel a Nzam! » 25 Yɛsu kun'swɛŋ a ngwal naa: « Kal a duu! Too uboo a mbuur wà! » 26 Dweelà a làbe waa làtoo, lun'nini, làmuyisà un'kwɛŋ a kölàköl. 27 Baar banswà bàkäl mubem, waa bàsyeelà mbaaŋ ba a ba naa: « Ndaa nà ayi? An'lɔɔŋ akün màŋàyɔl a ikɔ̈b! Nde wàmuswaŋ an'dweelà an'be a ngwal, ma sye màmukun'wem! » 28 Làsaŋ a nde làpää agyägyä kà itiir a nsi a Ngalilɛ kyanswà.

Yɛsu kan'kɔɔr abɛy mbɔɔn

(Màt 8.14-17; Luk 4.38-41)

29 Pa bàtoo ba u ndwà a nköŋ a Ayudà, ba bàkyen anà Zyak anà Ywan u ndwà a Simɔn anà Andrɛ. 30 Kyekà ukwà a Simɔn wun'kaar kàkäl aŋàbɔ̈ɔ̈n ntɔn nde kàkäl anà làbwey a mpye. Apan sye, ba bàsam Yɛsu ntɔn nde. 31 Nde kàsin tsütsü, kun'käär u kɔɔ, waa kun'mbaar. Làbwey a mpye waa làtoo, nde waa kàsɛmà mukasyääl.

32 Làsisye, ungö a miinà a taaŋ, ba bun'twäälà baar an'kyal banswà anà baar bàkäl anà an'dweelà an'be. 33 Bul lanswà làyàköŋ u munàmbwo. 34 Yɛsu kàkɔɔr baar mbɔɔn bàkäl anà an'kyal a ifà ifà. Nde kàtwey sye insɔŋà mbɔɔn. Nde kàwɛy anki mbwo akà insɔŋà musà ndaa. Ntɔn mya, mya myàkyun'yöbà.

Yɛsu kan'lyaaŋ u Ngalilɛ

(Luk 4.42-44)

35 Ututu tutu, Yɛsu kàsubà nde, kàtoo u ndwà, waa kàkyen u mpey. Akun nde kàkäl muyamà. 36 Simɔn anà baar bamwey bàkäl anà nde bàkyer akun'leŋ. 37 Utaaŋ bun'mɛn ba, ba bàtɛn a nde naa: « Baar banswà bàmuyaleŋ. » 38 Yɛsu kafuur naa: « Tsweenà ikal asin, kan'bul a tsütsü, ntɔn mɛ in'kàkyään sye Làsaŋ Aŋàbwaŋ kwo. Mɛ, mɛ kàtoo ntɔn la. » 39 Nde waa kàyilyaaŋà u Ngalilɛ wanswà mulɔŋ uboo a ndwà a nköŋ a Ayudà anà muböŋ insɔŋà.

Yɛsu kan'pööŋ ŋukyal a bay

(Màt 8.1-4; Luk 5.12-16)

40 Yàmɛnà naa ŋukyal a bay mwɛy kàsin apà nde, kàbü an'köm, waa kàtɛn naa: « Kya ngye akyàkwen, ngye an'kwo an'pöŋ. » 41 Yɛsu kun'wɛm ngyɛb mbɔɔn, kàsɛn kɔɔ, kun'bä, waa kàtɛn naa: « Mɛ an'kwen, pɔŋà! » 42 Umbalà mwɛy bay waa làlwomà, nde waa kàpɔŋà. 43 Apan, Yɛsu kun'fuur ndwà ande, 44 ungö mukun'pà nswɛɛŋ yi: « Twon an'sam ndaa ayi akà mbuur mwɛy. Wɛɛ ngye, kyɛn kamɛnà akà ngaŋ, waa akàpà an'kab a mpööŋ asànaa kàlɔ̈m Mɔsɛ, ntɔn mukaswaŋ naa ngye an'kɔrà. » 45 Pa kàkyen nde, nde kàsɛmà mukyään u ndaa a ngwal anà mupay làsaŋ a ndaa ayi. Kyakin Yɛsu kàmɛn anki mbwo mukàmɛnà u mii a baar banswà kan'bul an'köl an'köl, wɛɛ nde kàkälà u nsà, u mpey. Waa baar bàfwee mper anà mper, bàyee akà nde.