Bible Iyansi ZYAK 1

Un'kaan a

Zyak

Nsɛmà

Un'kaan a Zyak we anà un'lwaaŋ a nswɛɛŋ mwɛy bàpɛ « akà iköŋ a baan a Nzam bàpää u mɛɛn. » Zyak kan'sɔn akà aklistɔ ntɔn muswaŋ nkääl a ube aba ba a ba anà baar mpa abà Ayudà.

Itiir a ndaa abyà uboo byimwɛy ungö a imwɛy ukɔɔn alab un'lwaaŋ aŋàbwaŋ. Zyak wàmutɛn utàtwɛb ndaa iler an'yeerà: ma màfàfà akà Nzam anà ma bàfàlɔm akà nde unsà làkwikilà lanswà. Unsà ya yanswà, an'lwɛŋ amà mà ntɔn làmbwà anà un'naaŋ, nsii anà ndɛb, an'lɔɔŋ aŋàbwaŋ mà Nzam u mbwo isal. Un'söön a un'kaan awà wàmutɛn unsà muküünà ntɔn un'kɔl aŋàyɔŋ awà uboo a Ikööŋ. Ungö, nde wàmuswaŋ isin a ndaa akyà ban'kwo baar muyöb unsà un'kaan ande awà asànaa: un'tüüb awà uboo a làkwikilà anà isal. Uboo a itiir a ndaa a ifà ifà, nde wàmuswaŋ ube ufàkyer làlem. Ungö, nde wàmuswaŋ an'yeerà a ndandaa uboo a isin a ndaa. Nde wà munyääŋà unsà muküünà baar bàfàtwaal an'sye, anà bàfàkyey uyɔl ntɔn mutsüül atɔŋ aba nsaŋ, anà nde wàmutɛn unsà muküünà ntɔn aŋun'naaŋ, ntɔn an'kyeey bàfàmɛɛy ba baar a isal aba. Mumay, nde wàmuswaŋ nkääŋ a mpem, ngyamàkà, muküünà.

Ndɔ̈ɔ̈m kan'sà un'kaan awà akà aklistɔ yuleŋ: kà mukyey Làsaŋ Aŋàbwaŋ là Yɛsu anki, wɛɛ làkwikilà làmɛnà mbwo asin. Ntɔn, « làkwikilà làkɔ̈ɔ̈n isal làŋàkwà. »

Mbɔr

1 Mɛ Zyak, un'syääl a Nzam anà Mwol Yɛsu Klistɔ, an'pà mbɔr akà in'sɛŋ myàkwem aŋiyweel myàpää u mɛɛn manswà.

Mpay anà làkyän

2 Atɔŋ amɛ, làwɛl unsà mpem aŋàbwaŋ nsii yanswà ifàlayeel, 3 ntɔn bɛ làkyàyöb, isàkal naa làkwikilà abɛ làngwal kusà a nsii, nsii ayi ifàlabuul bàŋàtsim mbɔɔn. 4 Wɛɛ, wɛy naa muküünà abɛ usyäl ubwaŋàbwaŋ, ntɔn bɛ làkäl bàŋàmaay anà bàŋàkwo, ukɔɔn too.

5 Isàkal naa umwɛy uboo a bɛ an'yeerà matɛy, wɛy nde ulɔ̈m ma akà Nzam awà afàpà akà baar banswà u mpem aŋàbwaŋ ukɔɔn an'pɛl. 6 Wɛɛ, wɛy nde ulɔ̈m anà làkwikilà, ukɔɔn asà nkyɛɛr. Ntɔn mbuur afàsà nkyɛɛr wà asànaa ibɔ a an'dà a ngyäl ufàsɛn un'pöb. 7 Mbuur a tub awà twon kan'si naa nde asàwal undiir akà Mwol, 8 ntɔn nde wà bölà a bölà anà we amà an'kyän mɔ̈ɔ̈l unsà ndaa ande yanswà.

9 Wɛy un'tɔŋ awà ŋàlàmbwà umɛn un'sak umpal kun'sɛɛn Nzam, 10 anà ŋun'naaŋ umɛn un'sak umpal kun'tyeey Nzam, ntɔn nde asàlyaaŋ asànaa iful a an'ywaŋ. 11 Ntɔn taaŋ lan'yàsɛnà anà ipar a mbaa a mwäänà ande, kyan'kuuŋ kite, iful akya kyan'bwà, anà ubwaŋ a kya ban'wà. Mbwo mwɛy sye usàkal ŋun'naaŋ unsà isal ande.

12 Un'sak akà mbuur afànwaan unsà nsii, ntɔn, isàkal naa nde kan'böŋ, nde asàwal mpà a mɔ̈ɔ̈ ayà bàbön mupà akà baar Bàfun'kwen.

Nzam anà nsii

13 Mbuur twon kan'tɛn, isàkal naa nde kan'bwà unsà ndɛb, naa: « Ndɛb amɛ yi yan'fà akà Nzam ». Ntɔn Nzam ukwe anki naa ube bun'lwɛb, anà nde ŋakwo ufàlwab anki mbuur. 14 Mbuur mbuur afàbwà u ndɛb a ngyööm a mpem ande ŋakwo, waa ya yun'syen anà yun'bwiy. 15 Ngyööm a mpem isàpfɛy, ya ifàbɔr man'be. Man'be màsàyɛl, ma màfàbɔr ukwà.

16 Atɔŋ amɛ bànkwen, twon lan'bwà ndwaŋ: 17 kab a ntal lanswà anà kab aŋàkwo lanswà màfàfà du, akà Taa a pɛɛlà. Amu nde nsɔɔmà yatɛy, itàkal naa taaŋ lan'nwaan anà nsöŋ. 18 Nde ŋakwo kàkwen mukipà mɔ̈ɔ̈ u mbwo a ndaa ande yàndandaa, ntɔn bi ikäl bàtàtwɛb unsà ikyeer ande byanswà.

Ngweem anà nsyääl a Ndaa a Nzam

19 Atɔŋ amɛ bànkwen, bɛ làkyàyɔb naa bɛ làbà aŋun'yɛnà. Wɛy naa akà mbuur mwɛy ukɔ̈ɔ̈n akal anà ulɛy muwem, wɛɛ nde ukäl anà ulɛy mutɛn anà muwem nkyɛl, 20 ntɔn nkyɛl a mbuur ifàkyer anki balàbal a Nzam. 21 Kyakin, làpiy làbiin lanswà anà un'fur a nkyɛl, làwɛl unsà làbɔ̈ɔ̈n lanswà ndaa a Nzam bàkön u mpem abɛ, ntɔn ya yan'kwo mukàlatswà mɔ̈ɔ̈.

22 Wɛɛ làsyääl ndaa, kà nà muwem ya mpɛl anki, naa tɛy bɛ làbàmukur bɛ ŋakwo. 23 Kyakin, isàkal naa mbuur kan'wem ndaa a Nzam, wɛɛ nde ya usyääl anki, nde wà asànaa mbuur akalerà unsà làman anà kan'man ntabwey ande asànaa awà nde. 24 Ungö kan'may nde muler, nde kan'kyà anà abwà adiimà naa nde kàkäl aben. 25 Wɛɛ mbuur afàsà mii ande ubwaŋàbwaŋ unsà Un'kɔɔn aŋàkwo, Un'kɔɔn a insaay, anà afàsyääl wa, kà nà uwem wa mpɛl anki, wɛɛ usyääl wa, mbuur awun asàkal mbuur a un'sak unsà ndaa usàkyer nde.

26 Isàkal naa mbuur mwɛy afàsi naa nde we anà inzaam, wɛɛ nde ufàkyekyekà anki ntɛɛn ande, nde afàkur mpem ande ŋakwo: inzaam ande kyà bunàbun. 27 Inzaam a ndandaa anà ikɔ̈ɔ̈n too u mii a Taa Nzam aki: ubay itii anà akweel adim unsà mpay aba, anà mukal unsà igyɛɛŋ ntɔn mukɔɔn abwà unsà làbiin a mɛɛn mà.