Bible Iyansi ƐBƐLYƆ 3

Yɛsu kan'söön Mɔsɛ

1 Kyakin, atɔŋ in'kyɛɛl, bɛ baar làbye anà kab unsà làbeel a du, làsi an'kyän abe amu Yɛsu awà ntööm anà undweer a angaŋ a làkwikilà ifàkyään bi. 2 Nde wà lää akà mbuur kun'si, asànaa kàkäl Mɔsɛ, udu a ndwà a Nzam yanswà. 3 Yàmɛnà naa làkoo a Yɛsu làŋàsöön là Mɔsɛ, asànaa un'tööŋ a ndwà, we anà ibyääl aŋàsöön ndwà ya ŋakwo. 4 Abun, ndwà yanswà ye anà un'tööŋ aya, kyekà Nzam wà un'tööŋ a indiir byanswà. 5 Kyekà Mɔsɛ kàkäl un'syääl a lää u ndwà a Nzam yanswà, ntɔn mutà imbäl a indiir kàlàtɛn Nzam ungö. 6 Wɛɛ Klistɔ wà lää asànaa Mwan, kà un'tswe a ndwà a Nzam. Ndwà ande ya yà bi, isàkal naa bi ban'kaar kam anà làkyän amu nde abyà ifàswaŋ bi ngaal.

Duu a Nzam ntɔn aŋàlàkwikilà

7 Kyakin, asànaa utɛnà Dweelà In'kyɛɛl:

« Ŋàbà, isàkal naa bɛ lan'wem ndaa ande,

8 twon lan'bäm mpem abɛ asànaa utaaŋ bun'mbäär,

ilä bun'sii u nsye ipɔl.

9 Akun ankaa abɛ ban'leŋ un'swey anà bàkyer an'sii,

itàkal naa ba bàkyàman isal kàkyer mɛ 10 mbul an'kwem an'nà.

Kyakin kàwem mɛ nkööl ayin nkyɛl,

waa mɛ kàtɛn naa: "mpem aba yàmubwà ndwaŋ taaŋ lanswà,

ba bàkwen anki muyöb undiir kàdilà mɛ akà ba."

11 "Kyakin, uboo a nkyɛl amɛ, mɛ kàdi kyän naa:

Ba bàsàbilà anki kà ikal a ngyöör kàlɔ̈n mɛ ntɔn ba!" »

12 Atɔŋ, làkäl kà igyɛɛŋ, wɛy akà umwɛy uboo a bɛ ukɔ̈ɔ̈n akal anà mpem a mbe mpa aye anà làkwikilà ayà ikun'syeenà mutɔn Nzam a mɔ̈ɔ̈. 13 Wɛɛ, ilä byanswà, làpɛɛl ngwal bɛ a bɛ, itàkal naa taaŋ mbɔɔn ban'kwo mutɛn naa « ŋàbawà », ntɔn akà umwɛy uboo a bɛ man'be màkɔ̈ɔ̈n un'kur musà mpem ande bwoor. 14 Kyakin bi ibàŋàtüüb a Klistɔ, isàkal naa bi kan'kaar tii u ntsüü, kam alà kun'si bi u nsɛmà.

15 Kyakin, bàtɛn naa:

« Isàkal naa ŋàbawà bɛ lan'wem ndaa ande,

twon lan'bäm mpem abɛ asànaa bàkyer ataaràbɛ umpal bun'pɛ ba ngö. »

16 Abun, bànà bàmbäär Nzam, ungö bàwem ba ndaa ande? Nkye kà baar banswà kàtwey Mɔsɛ u Ngipiti anki? 17 Anà bànà nde kàwem nkyɛl mbul an'kwem an'nà? Nkye kà baar bàkyer man'be anki, waa bàkü u nsye ipɔl? 18 Abun, bànà nde kàdyeel kyän, mutɛn naa: « Ba bàsàbilà anki kà ikäl a ngyöör kàlɔ̈n mɛ ntɔn ba. » Nkye kà akà baar bàtön mukun'kyey anki? 19 Bi kan'man naa baar abà bàkwe anki mubilà kà ikal a ngyöör ntɔn ba bàkäl anki anà làkwikilà amu Nzam.