Bible Iyansi ƐBƐLYƆ 1

Un'kaan akà

Bɛbɛlyɔ

Nsɛmà

Un'kaan akà Bɛbɛlyɔ wà umwɛy wà bwɛl anà wà ndöŋ uboo a nkwà akün. Mbuur kàsön wa bàyöb anki. Bàmbɔɔn bàfàsi naa un'klistɔ mwɛy Un'yudà kàsön wa. Wa akwen mupà aklistɔ bàdiimà mbwo ngwal anà mutà làkwikilà aba mpi. Abà, wa wàmumɛɛy ba nsöönà a isal a Klistɔ unsà indiir byanswà iler ngwɛɛl a mɔ̈ɔ̈.

Un'dim a ndaa

Nsɛmà a un'kaan mwɛy yàbwɛlàbwɛl imɛɛyà nkääl ipepey ya imɛɛy a Nzam amu Mwan ande (1.1-4), ndaa yan'lääb yàŋàkaab ngyääl yweel yà kölàköl.

Ngyääl yàtàtwɛb yàmuswaŋ uteer a Yɛsu. Nde kà nà wà udu akyeey (1. 5,2.1) anà wàŋàsöön Mɔsɛ (3.1, 4.13) anki, wɛɛ nde wà undweer a ngaŋ kà un'lwaaŋ a Mɛlkisɛdɛk (4.14 7.28). Yumwɛy ayi: Nde kàkäb nde ŋakwo asànaa ibɔɔn, waa kàbulà mfurbo u nkwà mwɛy yàkün (8.1,10.18).

Ngyääl yàyweel (10.19, 13.19) yà mupà baar ngwal mukal uboo a lää (10.19, 39). Aŋàlàkwikilà bà itaan, fà Abɛl anà Abàlam, bàfawal asànaa mbaan a làkwikilà. Yà ubwaŋ sye musà ileer akà Yɛsu ntɔn muyöb mukaŋ mpem unsà nsii asànaa nde (12.1, 13). Mutsülà, yà ubwaŋ muleŋ duu uboo itɔŋ anà mukɔɔn adiimà kab a ngway a Nzam (12.14,13.19).

Un'kaan awà ban'may a nsaak anàmbɔr.

Fà itaan, baar bàkäl anà kerker naa un'kaan awà Pɔl kàsön. Lwom ntsüü awa, un'kaan awà wanswà wà nsöön anà in'kaan ande. Itàkal naa kà nà kàsön wa, nde wà mbuur ayöb Ingɛlɛki ubwaŋàbwaŋ. Nde wa kàsön kusà a mbul 70. Nde wa kàsöön aklistɔ bàkäl unsà lingyoomà anà bàleŋà mupiy làkwikilà a ndüümà aba. Ba babeelà « Bɛbɛlyɔ », taaŋ lumwɛy ntɔn mfa a mfuur a ngyamàkà a « nkwà itaan », nkwà a Sinay. Ba kà Ayudà anki, wɛɛ ba bàkyàyöb Ndaa Aŋàsɔn ubwaŋàbwaŋ, ndaa ayà bàyɛɛ din mbalà mbɔɔn.

Kà ikal a ibɔɔn mbɔɔn byà ndwà a Nzam a Yɛlusàlɛm, un'söön kàkiir « ibɔɔn » imwɛy mpɛl kyà Yɛsu, nsab a Ngweel a mɔ̈ɔ̈ ana yà mɔ̈ɔ̈ uboo a « nkwà akün ». Ungö apan, ngyamàkà mwɛy yà ubem isàtɛn naa Klistɔ wà « undweer a ngaŋ, mɛsà a ibɔɔn anà ibɔɔn ». Mulab nsɛmà a un'kaan awà, indiir byanswà Nzam kàtɛn amu mwan ande Yɛsu. Ya yan'bwà balàbal asanaa naa nsɛmà a Làsaŋ aŋàbwaŋ kàsön Ywan (Ywan 1.1,18). Yɛsu Klistɔ wà ndaa a Nzam « mwɛy mpɛl anà yipepey » anà Nzam « undiir asin wàtɛn watɛy » (Ywan a Kulunsi, 1587). Mbiilà u ngyee a ndaa ayi yà ngyee ikɔ̈ɔ̈n ntsüü, taaŋ lumwɛy yà mpay, ya bweel taaŋ lanswà.

Ukyà kwɛl

Un'kaan akà Bɛbɛlyɔ afàsà mfà a mfuur ikɔ̈ɔ̈n ntsüü uboo a nkwà itaan anà nkwà akün. Yɛsu wà ngaŋ unsà un'lwaaŋ a ifà asin wà Mɛlkisɛdɛk, wɛɛ kà asànaa Alɔn anki.

Nzam kàyäämà u mbwo a Mwan ande

1 Itaan, Nzam kàyäämà anà ankaa abi, mbalà mbɔɔn, u ntɛɛn yà ifà ifà, u mbwo a aŋangɔɔm. 2 Wɛɛ apanà, u paŋà a ntsüü ibà bi là, nde kàyääm anà bi u mbwo a Mwan awà kàsi nde ŋakwal a indiir byanswà, u mbwo a nde sye nde kàkyer mɛɛn manswà. 3 Mwan awà wà pɛɛlà a làkoo ande anà idiim muswaŋ naa Nzam wà aben, anà nde afàkaar indiir byanswà unsà ngwal a ndaa ande. Ungö mupöŋ man'be a baar, nde kàkàbwaay u du u kɔɔ a ibaal a Nzam aŋàsöön ngwal yanswà. 4 Mwan kàbulà wàŋàsöön akyeey, waa Nzam kun'pɛ ikɔb aŋàsöönà kyà ba.

Mwan a Nzam wàŋàsöönà akyeey

5 Kyakin, nde kàtɛn anki akà ikikye akà un'kyeey mwɛy naa:

« Ngye awà Mwan amɛ,

mɛ amàbɔr ŋàbà. »

Anà sye:

« Mɛ in'yàkal Taarànde

anà nde ayàkal Mwan amɛ. »

6 Wɛɛ, umpal ubiil nde nswɛm u mɛɛn, nde kan'tɛn naa:

« Wɛy akyeey a Nzam banswà bun'kömà. »

7 Ntɔn akyeey, nde kan'tɛn naa:

« Nde akyeey ande afabuul an'dweelà,

anà asyääl ande làlem a mbaa. »

8 Wɛɛ ntɔn Mwan, nde kan'tɛn naa:

« Kir angye là imwol, Nzam, làŋàsà ntɔn mbul a in'tye,

ngye imwol angye afàyaal a swalaa.

9 Ngye kàkwen balàbal anà kàyiiŋ ube,

kyakin Nzam, Nzam angye,

kàtsüül nde may a un'kyɔm

aŋàsöön atɔŋ angye. »

10 Nde an'fàtɛn sye naa:

« Inye, Mwol, u nsɛmà ngye kàsi in'bään a mɛɛn,

du là isal a an'kɔɔ angye.

11 Bya byàkyer asàkwà, wɛɛ ngye, ngye awe anà mɔ̈ɔ̈.

Bya byanswà byàsànün asànaa ipfɛy,

12 ngye asabwɛlà asànaa ufàbwɛlà kàzak,

ngye asasɔɔm asànaa ipfɛy.

Wɛɛ ngye, ngye awà ifà imwɛy, mbul angye isàwà anki. »

13 Nzam kàtɛn anki akà un'kyeey ande mwɛy naa:

« Bwaay u kɔɔ amɛ là ibaal,

tii mpal in'sàsà mɛ ayiiŋ angye

ungyɛl in'kɔl angye. » 14 Kyekà akyeey bà an'dweelà unsà isal a Nzam. Nde afatɔm musyääl baar bàsàwal kwal a mɔ̈ɔ̈.