Bible Iyansi 1 TƐSALƆNIKÀ 1

Un'kaan atàtwɛb akà

Atɛsalɔnikà

Nsɛmà

Un'kaan wàtàtwɛb awà akà aklistɔ a Ikööŋ a Tɛsalɔnikà, làbuŋ a Masɛdwan, amu ɛwà Ɛzɛ, ntööm Pɔl kàsön unsà un'tüüb anà Silavɛ anà Tumatɛ. U tàtwɛb, Pɔl kàlɔŋ baar a Tɛsalɔnikà mutiin inswem, mukal anà ukwen ba a ba, musal ntɔn indiir aba byà mfun. Ungö, nde kàbaal naa baar in'kyɛɛl bàfàkwà kusà a mfurà a Mwol bàyapiy anki, ba bàkyer asàwiyà uboo akü utaaŋ usàmɛnà Klistɔ kusà a Mwol a imwol ande kyanswà. Nde kayɔɔb sye naa Yɛsu asàyà kà imburà, wɛɛ ba twon ban'kal u nkyɛl. U ntsüü, nde kabaal naa mɔ̈ɔ̈ aba uboo a Ikööŋ akal aben. Kiin a ndaa kàtɛn Pɔl akà ba yà naa: « Bɛ, làläb isal abɛ. »

Mbɔr

1 Mɛ Pɔl, Silàvɛ anà Tumàtɛ.

Bi ban'pà mbɔr akà Ikööŋ a Atɛsalɔnikà akyà kyà Taa Nzam, anà kyà Mwol Yɛsu Klistɔ, wɛy kab a ngway anà duu màkäl anà bɛ.

Mɔ̈ɔ̈ anà làkwikilà a Atɛsalɔnikà

2 Bi ifàyɔn anki mufuur an'tɔɔn akà Nzam ntɔn bɛ banswà mpal ifàlatà bi din uboo a ngyamàkà abi. 3 Bi ifàyɔbà kusà a Taaràbi Nzam isal ufàtwey nde làkwikilà abɛ, akyà ukwen abɛ, anà kyà muküünà ifàfà unsà làkyän abɛ amu Mwol abi Yɛsu Klistɔ. 4 Bi ikyàyöb, atɔŋ ukwen Nzam, naa nde kàlasɔ̈ɔ̈l. 5 Ntɔn, mpal kàlakyään bi Làsaŋ Aŋàbwaŋ, làkäl anki u ndaa mpɛl, wɛɛ sye unsà ngwal a Dweelà In'kyɛɛl, anà kam aŋàkwo. Bɛ làkyàyöb naa ifà abi byàkäl aben uboo a bɛ, ntɔn ubwaŋ abɛ. 6 Apan bɛ, bɛ làläb nkääl abi anà yà Mwol, mukyey Ndaa uboo mpay aŋàdiir, anà un'sak kan'fà akà Dweelà In'kyɛɛl. 7 Abun, bɛ làkyàbulà mbaan ntɔn aŋàlàkwikilà banswà u bul a Masɛdwan anà Akayi. 8 Kyakin, fà akà bɛ, kà nà ndaa a Mwol mpɛl anki yàpää amu Masɛdwan anà amu Akayi, wɛɛ anà làsaŋ a làkwikilà abɛ amu Nzam làkyer apää ntsü yanswà, waa bi undiir afàtɛn watɛy. 9 Ntɔn ba ŋakwo bàmutà imbäl naa bɛ bi liwɛl abɛn mpal kàyi bi akà bɛ, anà bɛ làwɛy abɛn itɛk ntɔn musyääl Nzam a mɔ̈ɔ̈ anà wàndandaa, 10 anà làdilà Mwan ande kan'fà du, Nde akwà kàwiyà uboo a akü, Yɛsu awà kitsuuŋà u nkyɛl a Nzam ayà tsütsü muyà.