Bible Iyansi ƐFƐSƆ 1

Un'kaan akà

Bɛfɛsɔ

Nsɛmà

Uboboo a mbul nkam atàtwɛb utaaŋ abi là, Ndwà a nkööŋ a aklistɔ yàbulà mbɔɔn agyägyä kà Azi Minɔ̈ɔ̈r, ŋàbawà bàfàbel Türki a Azi. Ikööŋ byàkäl un'tüüb umwɛy, wɛɛ Ikööŋ a Ɛfɛsɔ kyàkäl anà làkoo aŋàsöönà. Abun, ntööm Pɔl kàkyer mbul tär uboo a un'sɛŋ awà utaaŋ a nkyeen yàtär yisal ande (Màt 19.1-20.1). Un'kaan akà Bɛfɛsɔ kab là 3.1 anà u kab là 4.1, ntööm Pɔl kàkäl u bɔlokà mpal kàsöön nde baar a Ɛfɛsɔ. Undiir awun ban'sà ba un'kaan awà mbwo mwɛy anà in'kaan bàfàbel naa « isɔ », anà in'kaan kàsöön nde baar a Filipe, Filɛmɔ anà Kɔlɔsay.

Ngwal a an'lɔɔŋ ande ikaswaŋà naa yà ntɔn kab a atääŋ amwɛy lan'söön iköŋ a bul. Isin a ndaa kyan'kyän a mbul a in'tye a Nzam ikwen mà « mutüüb indiir byanswà abyà u du anà u mɛɛn kan'kɔɔ a mfum mwɛy, Klistɔ ».

Fà nsɛmà tii u ntsülà, an'lɔɔŋ a un'kaan awà màŋàkab itiir byeel byàkölàköl:

Kà itiir kyàtàtwɛb, ungö kan'man nde ubwaŋ a Nzam kàkyer nde akà bi u mbwo a Yɛsu Klistɔ, un'söön wàmukyään isin a ndaa, muswaŋ naa Nzam kàtüüb aben baar mpa abà Ayudà anà Ayudà un'sɛŋ mwɛy wa, un'sɛŋ ande.

Kà itiir kyàyweel, ntööm wàmulɔm akà atääŋ a in'kaan ande naa ba bàkäl uboo a un'tüüb awà unsà ubwaŋ a mɔ̈ɔ̈ akün, un'tüüb umwɛy anà Yɛsu Klistɔ. Abun, ya ibɔr ndaa a balàbal unsà un'tüüb abà ba awà anà baar bumwɛy, unsà iköŋ a aklistɔ, unsà bɔr, unsà Ikööŋ.

Muswaŋ un'sɛŋ a Nzam, ntööm wàmusyääl idiim, idiim itär: kyà ndür, Ikööŋ awà Yɛsu Klistɔ un'tswe, kyà ndwà awà Yɛsu Klistɔ un'kul a twɛrà. Kyakin, imɛnà naa un'tüüb watɛy isàkal naa aklistɔ mbääb a ndandaa anà yà ipepey yatɛy akà Mwol aba.

Mbɔr

1 Pɔl, ntööm a Yɛsu Klistɔ unsà ukwen a Nzam, akà baar abà u Ɛfɛsɔ abà bà Nzam anà bàlää amu Yɛsu Klistɔ:

2 Wɛy kab a ngway anà duu a Taaràbi Nzam anà Mwol Yɛsu Klistɔ màkäl anà bɛ.

Indiir aŋàbwaŋ kipɛ Nzam u mbwo a Klistɔ

3 Nsaak ikäl akà Nzam, Taarà Mwol abi Yɛsu Klistɔ! Nde kisaak mukipà nsaak a dweelà yanswà u du amu Klistɔ. 4 Kusà a nkyeer a mɛɛn, Nzam kisɔ̈ɔ̈l itaan mukal bànde u mbwo a Klistɔ, ntɔn bi ikäl bà in'kyɛɛl anà ikɔ̈ɔ̈n an'pɛl u mii ande. Unsà ukwen ande, 5 Nzam kilɔ̈ɔ̈n kusà mukal iywaaŋ nkà ande u mbwo a Yɛsu Klistɔ, mulab ukwen ande unsà ubwaŋ ande. 6 Abun, wɛy bi isyäŋà Nzam ntɔn kab a ntsà kipɛ nde amu Mwan ande wànkween.

7 Amu nde, u mbwo a an'kil ande, bi kàkyàtoo unsà isɔ, amu nde, bàkidwääl ibii abi, mulab un'naaŋ a kab a ngway a Nzam, 8 alà kikääb nde làŋàsöönà, mukipà an'yeerà manswà anà un'yɛnà wanswà. 9 Nde kipɛ mbwo muyöb ngyee a ukwen ande, ngyee kàlɔ̈ɔ̈n nde kusà unsà ubwaŋ ande, amu Klistɔ, 10 ntɔn mukölà ya u taaŋ a ntsüü: un'tüüb amu Klistɔ, nkyeer yanswà ayà u du anà ayà u mɛɛn.

11 Amu nde sye, bi kàwɛl kab làbi unsà an'kyän a mbuur afàsyen bya byanswà unsà ukwen ande, bi bisɔ̈ɔ̈l kusà, 12 ntɔn musyäŋà làkoo ande, bi baar kàsi làkyän kusà amu Klistɔ!

13 Amu nde sye, bɛ làkyàwem ndaa a ndandaa, Làsaŋ Aŋàbwaŋ làfàlatswà mɔ̈ɔ̈. Amu nde sye, bɛ làsi làkwikilà anà bàlasi inyɛm a Dweelà In'kyɛɛl bàpɛ ilää, 14 mbööl a kwal abi tii u ntsuuŋ abi yà ntsüü ayà isàwal bi, ntɔn nsyäŋà a làkoo ande.

Ngyamàkà a Pɔl

15 Kyakin, mɛ sye, fà kàwem mɛ làkwikilà abɛ amu Mwol Yɛsu anà ukwen abɛ ntɔn aŋin'kyɛɛl banswà, 16 mɛ in'fàyɔn anki mufuur an'tɔɔn ntɔn bɛ, umpal in'fàlatà mɛ din u ngyamàkà amɛ. 17 Wɛy naa Nzam a Mwol abi Yɛsu Klistɔ, Taa aŋàlàkoo, kàlapɛ dweelà a an'yeerà anà là imɛɛy ntɔn bɛ lun'yöb ubwaŋàbwaŋ, 18 wɛy nde uduub mpem abɛ u pɛɛlà ande, ntɔn bɛ làyöb naa làkyän nà alà mwo unsà làbeel ande, naa un'naaŋ a làkoo ande wà aben, kwal ufàlakääb nde anà aŋin'kyɛɛl, 19 unkaak a ngwal a kölàköl nà nde we awà ntɔn ubwaŋ abi, bi aŋàlàkwikilà. Ngwal ande ayi, nde ya kàtwey unsà unkaak a ngwal ande wanswà, 20 nde ya kàpɛ akà Klistɔ mpal kun'wiiy nde uboo a akü, anà kun'bwääy u kɔɔ ande là ibaal u du, 21 udu a imfum kyanswà, ikɔ̈b kyanswà, unkaak a ngwal wanswà, imwol kyanswà anà ikɔb kyanswà ban'kwo mutà din, kà nà u mɛɛn mà mpɛl anki, wɛɛ sye anà u mɛɛn amà isàyà. 22 Inye, Nzam kàsi indiir byanswà ungyɛl a in'kɔl a Yɛsu anà nde kun'pɛ akà Ikööŋ ntɔn mukal un'tswe a indiir byanswà. 23 Ikööŋ kya kyà ndür ande, nde awà ufàyööl Nzam ŋakwo a barbar.