Bible Iyansi KƆLƆSAY 1

Un'kaan akà

Akɔlɔsay

Nsɛmà

Kɔlɔsay làkäl bul mwɛy là Azi Minɔ̈ɔ̈r, ŋàbà bàfàbel naa Türki, tsütsü a Ɛfɛsɔ kà isii a kilɔmɛtrɛ nkam yweel. Ikaswaŋà naa Pɔl bul alà kàtöl anki akà ikikye. Ɛpafras, un'nsi Kɔlɔsay nde ŋakwo, umwɛy uboo a asyääl ande, kàkäl mbuur atàtwɛb musyen Làsaŋ Aŋàbwaŋ kwo.

Abun, Pɔl kàkäl mbuur a bɔlokà mbalà yumwɛy u Lɔmà. Ɛpafras kàyi mukun'kyään naa baar a Kɔlɔsay bàbilà uboo a an'lɔɔŋ a akyään a an'lɔɔŋ akün. Akyään abà bàyilɔŋà naa muyöb Nzam anà muwà mɔ̈ɔ̈, bàtàkömà bàngwal a an'dweelà, ukyey nkyɛɛy anà nswɛɛŋ a ngwalàngwal, unsà ndaa iler isa adyà, man ... Pa bun'kyään ndaa a mpay ayi, ntööm kàsöön baar a Kɔlɔsay mukayɔɔb naa mɔ̈ɔ̈ ufàpà Nzam amu Yɛsu Klistɔ wàŋàkwo mbɔɔn a mbɔɔn. Nde waa katööm mbalà yumwɛy a Tishik anà Ɔnɛsim. Un'kaan awà wàŋàkab itiir itär:

Itiir atàtwɛb kyàmuswaŋ ikɔ̈b a Klistɔ: nde wà udu a ngwal a an'dweelà yanswà, anà nde mpɛl awà Mfum a Ikööŋ.

Itiir kyàyweel: ntööm wàmusà baar a Kɔlɔsay unsà igyɛɛŋ ntɔn ibii a baar asin bàmuyipay akà ba.

Itiir kyà ntsüü kyàmuswaŋ nkääl a mɔ̈ɔ̈ akün yan'kwo mukal unsà un'tüüb anà Klistɔ, uboo a ikööŋ a Klistɔ kyaŋakwo, uboo a bɔr itàkal uboo a baar banswà.

Ntsülà yàmuswaŋ akyeey a mbɔɔn a mbɔɔn anà mbɔr aŋàsɔn u kɔɔ a ntööm ŋakwo.

An'lɔɔŋ an'be man'kwo màsɔɔm ifà anà isin a paŋà làmwɛy anà lumwɛy. Wɛɛ ma mun'tüüb mwɛy: ma màfàpà aklistɔ mpiim unsà làkwikilà aba amu Klistɔ mwɛy. Kyakin, ntääŋ a un'kaan akà baar a Kɔlɔsay yà ndaa mwɛy yipepey: ya ifàtɛn ngwalngwal ikɔ̈b a ngyee a Klistɔ, nde mbuur afàbeen asɔ a an'dweelà.

Mbɔr

1 Pɔl, ntööm a Yɛsu Klistɔ, unsà ukwen a Nzam, anà un'tɔŋ Tumàtɛ awà tsütsü apà mɛ, mɛ an'pà mbɔr 2 akà aŋin'kyɛɛl abà u bul a Kɔlɔsay abà atɔŋ abi unsà un'tüüb aba amu Klistɔ: wɛy kab a ngway anà duu a Nzam, Taaràbi, màkäl anà bɛ!

Ngyamàkà a an'tɔɔn

3 Bi ifuur an'tɔɔn akà Nzam, Taar a Mwol abi Yɛsu Klistɔ, unsà ngyamàkà mpa ifàyɔn bi mupà akà nde ntɔn bɛ. 4 Bi kàwem làkwikilà abɛ amu Yɛsu Klistɔ anà ukwen làbà bɛ abà ntɔn aŋin'kyɛɛl banswà. 5 Bya byan'fà unsà làkyän alà u du ntɔn bɛ, làkyän làyöb bɛ u mbwo a ndaa a ndandaa ayà Làsaŋ Aŋàbwaŋ alà làkɔlà akà bɛ. 6 La làpää u mɛɛn manswà, waa làbör imbɛŋ, ifà imwɛy sye ufàkyer nde amu bɛ fà ilä làwɛl bɛ anà làyöb bɛ kab a Nzam unsà ndandaa ande, 7 asànaa naa kàlalɔŋ Ɛpafras. Nde wà un'baay a isal ifàkwen bi, un'syääl a lää wà Klistɔ. 8 Nde mbuur kikyään naa ukwen nà Dweelà we abà uboo a bɛ.

9 Kyakin, akà bi, fà ilä kàwem bi abà, bi kàyɔ̈n anki muyamà ntɔn bɛ. Bi kan'lɔm akà Nzam mukàlapà, u mbwo a Dweelà ande, an'yeerà anà un'yɛnà ntɔn muyöb ukwen ande. 10 Abun, bɛ làsàkal anà nkääl aŋàkwo akà Mwol ntɔn mukun'pà un'sak taaŋ lanswà. Amu ya, bɛ làsàkyer ndaa aŋàbwaŋ, làsàbɔr mbɛŋ ifà ifà anà làsàkal u ngyööb a Nzam yà ndandaa. 11 Ngwal a làkoo ande isàlabuul bàngwal amu ya yanswà, ntɔn bɛ làkwe mukaŋ mpem u ndaa yanswà anà làsi muküünà tii u ntsüü unsà un'sak. 12 Làfuur an'tɔɔn akà Taa awà kàlasi bàŋàkwo muwal kab uboo a kwal a aŋin'kyɛɛl u pɛɛlà. 13 Nde kitsü mɔ̈ɔ̈ unsà ikɔ̈b a mpib anà nde kibiil uboo a imwol a Mwan ande wànkween. 14 Amu nde bi ibà aŋàbeen, man'be abi màŋàdwääl.

Imbuur anà isal a Klistɔ

15 Mwan awà wà idiim a Nzam mpa bàfàman u mii. Nde wà Mwan atàtwɛb u nkyeer yanswà, 16 ntɔn indiir byanswà bàkyer amu nde, u du anà u mɛɛn, abyà ifàmɛnà anà mpa byàfàmɛnà, An'kir Imwol, Amfum, Aŋikɔ̈b anà Aŋangwal, indiir byanswà bàkyer amu nde anà ntɔn nde, 17 anà nde wà kusà a indiir byanswà, amu nde indiir byanswà byà kà ikal abya. 18 Nde wà un'tswe a ndür ayà Ikööŋ, un'bään wàtàtwɛb uboo a akü, ntɔn muwal ikal atàtwɛb, amu indiir byanswà. 19 Ntɔn Nzam kàkwen naa inzaam ande kyanswà iyööl Mwan ande, 20 anà u mbwo a nde, nde ufuur un'tüüb ande anà indiir byanswà, u mɛɛn anà u du, musà duu u mbwo a an'kil a kulunsi ande amu nde anà ntɔn nde.

21 Kyekà, itaan bɛ làkäl angyey anà ayiiŋ a Nzam unsà an'kyän anà unsa isal abɛ byà ube. 22 Wɛɛ apanà, Nzam kan'fuur un'tüüb ande anà bɛ u mbwo a ndür a imbuur a Mwan ande yàkü ntɔn mukàlamɛɛy bàŋin'kyɛɛl kusà ande, ukɔɔn too anà an'pɛl. 23 Wɛɛ ilɔɔmà naa, u mbwo a làkwikilà, bɛ làkäl bàngwal anà bàŋàtsim, ukɔɔn akal bàŋàkaabà anà làkyän a Làsaŋ Aŋàbwaŋ alà làwem bɛ, alà bàkyään akà ikyeer kyanswà u mɛɛn, anà amu la, mɛ, Pɔl, akyàbulà un'syääl.

Isal a Pɔl ntɔn Ikööŋ

24 Mpalàbà, mɛ an'man un'sak unsà mpay an'fuur mɛ ayà ntɔn bɛ, ntɔn mɛ in'wàmukölà u ndür amɛ nkɔ̈ɔ̈n ayà u mpay aŋàsöön a Klistɔ, ntɔn ndür ande ayà Ikööŋ, 25 ntɔn kya, mɛ akyàbulà un'syääl u mbwo a buur kan'pɛ Nzam ntɔn bɛ: mukyään ubwaŋàbwaŋ ndaa a Nzam, 26 ndaa yàkäl ngyee fà itaan anà kàmɛɛy nde mpalàbà akà aŋin'kyɛɛl ande. 27 Nde kàkwen mukaswaŋ naa un'naaŋ a làkoo nà awà uboo a ngyee ayi ntɔn baar mpa abà Ayudà: Klistɔ amu bɛ, iswaŋà naa bɛ làbye anà làkyän muwal kab unsà làkoo a Nzam. 28 Nde awà bi ifàkyään, ifàweey anà ifàlɔŋ mbuur wanswà unsà an'yeerà manswà, ntɔn mubuul mbuur wanswà ukäl aŋàyɛl amu Klistɔ. 29 Kyakin in'fàsal mɛ anà in'fànwaan mɛ anà un'swey a ngwal ande awà afàsal a unkaak a ngwal amu mɛ.