Bible Iyansi 2 KƆLINTƆ 6

1 Ntɔn bi ibà abaay ande, bi kàmàlalɛɛl mukɔɔn awal kab a ngway a Nzam a bunàbun. 2 Ntɔn nde an'tɛn naa:

« Utaaŋ aŋàbwaŋ, mɛ kàkyer awem,

kilä a ngweel a mɔ̈ɔ̈, mɛ kàkyer abay. »

Le, apanà là taaŋ aŋàbwaŋ. Le, apanà kyilä a ngweel a mɔ̈ɔ̈.

3 Bi ikwen anki, itàkal kaben, mubööl mbuur kyà, ntɔn bàkɔ̈ɔ̈n apɛl isal abi. 4 Wɛɛ akà bi, unsà ya yanswà, bi iswɛɛŋà bi ŋakwo naa ndandaa bi ibà asyääl a Nzam

u mbwo a muküünà mbɔɔn

amu mpay mbɔɔn,

amu an'kyà,

amu bɔɔmà aŋàdiir,

5 amu iki,

amu an'bɔlokà,

amu lingyoomà,

amu yɔ̈ɔ̈n,

amu nkɔ̈ɔ̈n a twaal,

amu nkiin a isaa,

6 u mbwo a pɛɛl,

u mbwo a ngyööb,

u mbwo a nkääŋ a mpem,

u mbwo a ubwaŋ,

u mbwo a Dweelà In'kyɛɛl,

u mbwo a ukwen a ndandaa,

7 u mbwo a ndaa a ndandaa,

u mbwo a ngwal a Nzam,

inwään abi byànwään anà byigyɛɛŋ,

yà mukyer ndaa a balàbal u mii a Nzam,

8 amu làkoo anà nsaal,

amu in'tswe anà nsyäŋà,

bàfiwal asànaa aŋatwee,

kyekà bi ibà bàndandaa, 9 bàfiwal asànaa biyöb anki,

kyekà bàkiyöb ubwaŋàbwaŋ,

bàfiwal asànaa akü,

kyekà bi ibà anà mɔ̈ɔ̈,

bàfiwal asànaa baar abuntaaŋàmbar,

kyekà bi kàkü anki, 10 bàfiwal asànaa aŋangyɛb,

kyekà taaŋ lanswà bi ibà kun'sak,

bàfiwal asànaa aŋàlàmbwà,

kyekà bi ifàkyer aŋin'naaŋ mbɔɔn,

bàfiwal asànaa bi undiir watɛy,

kyekà bi ibye anà indiir byanswà!

11 Atɔŋ a Kɔlintɔ, bi kàyäm anà bɛ u nsaay yanswà, bi kàladuub mpem abi kölàköl. 12 Bi kàladübà anki mpem abi, wɛɛ bɛ lidüüb mpem abɛ. 13 Apanà sye, mɛ in'tɛn a bɛ asànaa akà baan amɛ, bɛ sye làduub mpem abɛ kölàköl!

Igyɛɛŋ akà baar mpa abà Ayudà

14 Twon lan'tüüb anà baar bàkɔ̈ɔ̈n làkwikilà. Un'tüüb nà kan'kwo mukäl uboo a balàbal anà ube? Un'tüüb nà uboo a pɛɛlà anà làpib? 15 Nkwà nà ayà uboo a Klistɔ anà Bɛlyar? Isam nà akyà uboo a ŋàlàkwikilà anà mbuur mpa awà ŋàlàkwikilà? 16 Undiir nà wun'tüüb uboo a idwà a Nzam anà bànzam a itɛk? Ntɔn bi, bi ibà idwà a Nzam a mɔ̈ɔ̈ asànaa kàtɛn Nzam ŋakwo naa:

« Mɛ in'sàkal anà in'sàlyaŋ uboo a ba,

mɛ in'sàkal Nzam a ba, ba bàsàkal un'sɛŋ amɛ. »

17 Kyakin,

« Làtoo uboo a baar aban, làkäl ukɔl,

twon lan'ba akà undiir mwɛy wàŋingyäy,

waa mɛ in'sàlawal.

18 Mɛ in'sàkal taa ntɔn bɛ

waa bɛ làsàkal baan abaal anà bakaar ntɔn mɛ. » Mwol aŋangwal yanswà.