Bible Iyansi ISAL 1

Isal a Antööm

Nsɛmà

Un'kaan a Isal a Antööm wà ndääb a un'kaan a Lukà wàtàtwɛb. Uboo a un'kaan wàtàtwɛb awà Làsaŋ Aŋàbwaŋ, nde kàsam ndaa yanswà kàkyer Yɛsu mpal kàkäl nde u mɛɛn tii mpal kàbeenà nde du. Unsà un'kaan wàyweel wà nde akasamà isal a Yɛsu bàsàlab Antööm. Ntɔn Yɛsu bàfàfun'man anki u mii, wɛɛ nde wuboo a alɔŋki u mbwo a Dweelà In'kyɛɛl.

Làsaŋ Aŋàbwaŋ a Yɛsu làbilà uboo a un'sɛŋ a Ayudà u mbwo a ntööm Petɔlà asànaa u Yɛlusàlɛm, itàkal akà baar mpa abà Ayudà u mbwo a Pɔl asànaa u Antyɔsha, u Kɔlintɔ, u Filipe.

Uboo a un'kaan awà bàsön sye ndaa a nkyeen a Pɔl yisal, nköör ande u Yɛlusàlɛm anà ntööl ande u Lɔmà.

U nsɛmà, Ikööŋ kyàmɛn mpay mbɔɔn, wɛɛ kya kyàyɔ̈n anki muleŋ mutoo uboo a ya u mbwo a Dweelà In'kyɛɛl.

Unsà un'lwaaŋ ndaa ayuboo un'kaan awà:

- nsɛmà a Ikööŋ atàtwɛb, u Yɛlusàlɛm, ungö a mbeenà a Yɛsu du (1.1-8.3)

- upay Làsaŋ Aŋàbwaŋ u nsi yanswà (8.4-12.25)

- anà u mɛɛn a ntsü a Mɛditɛranɛ tii u Lɔmà (13.1-28.31).

Làsaŋ alà làpää u mɛɛn manswà bàyöb u taaŋ alan u mbwo a an'lɔɔŋ anà ntɛɛn a Antööm. La là Làsaŋ a Yɛsu kàkäl u Palestin. Dweelà In'kyɛɛl làfàbay alɔŋki mubääb anà nde taaŋ lanswà unsà Ndaa anà nsyääl ande.

Ndaa bàkyään uboo un'kaan a Isal a Antööm ifàswaŋ mbwo akà Ikööŋ mukyer isal ande: Upay Làsaŋ Aŋàbwaŋ a Yɛsu Klistɔ akà baar banswà u mɛɛn.

Dweelà In'kyɛɛl bàbön mupà Antööm

1 Un'sam Tyɔfil,

Uboo a un'kaan amɛ wàtàtwɛb, mɛ kasam indiir byanswà kàsɛmà Yɛsu mukyer anà mulɔŋ 2 tii ilä bun'sɛɛn ba ungö mupà nswɛɛŋ u mbwo a Dweelà In'kyɛɛl akà Antööm kàsɔ̈ɔ̈l nde. 3 Yàlɔ̈m naa ungö a nkweel ande, nde kàyamɛnà nde ŋakwo akà ba ntɔn mukaswaŋ unsà mbwo yà ifà ifà naa ndandaa nde wà anà mɔ̈ɔ̈. Nde kàyàmɛnà akà ba ilä an'kwem an'nà mukakyään indiir a Imwol a Nzam. 4 Ilä mwɛy nde kàkäl mudyà anà ba, nde kaswɛŋ ndaa yi: « Twon lan'lwomà u Yɛlusàlɛm, wɛɛ làdil ilää kàpɛ Taa, kab a ngway kàlakyään mɛ. 5 Ntɔn Ywan kàyadümà kà an'dà, wɛɛ bɛ, bɛ bàyàladümà unsà Dweelà In'kyɛɛl ungö a ilä ikikye. »

Yɛsu kan'beenà du

6 Apan, baar bàyàköŋ apà nde bun'fuul naa: « Mwol, nkye taaŋ nsil alà ayàfuur ngye imwol akà Isàlɛl? » 7 Yɛsu kafuur naa: « Kà bɛ anki lan'kwo muyöb taaŋ anà ilä kàsi Nzam unsà ikɔ̈b ande. 8 Wɛɛ bɛ làsàwal ngwal taaŋ usyetyà Dweelà In'kyɛɛl udu a bɛ. Bɛ làsàkal ambäl amɛ u Yɛlusàlɛm, uboo a Yuday lanswà, u Samalya tii u ntsüü a mɛɛn. » 9 Utaaŋ kàmay nde mutɛn abwɛy, laa bun'sɛɛn ba, Antööm bàkäl mukun'lerà. Itööm mwɛy kyun'fwee u mii aba. 10 Umpal bàkäl ba mulerà u du ntsü kàkyen Yɛsu, kà imbürà, ba bàmɛn abaal bɔ̈ɔ̈l bàŋambwaar ipfɛy a pɛɛl bàŋàmbar apà ba, 11 waa bàtɛn a ba naa: « Baar a Ngalilɛ, ntɔn nkye lan'mbar bɛ apà mulerà u du? Yɛsu wa bàmàlalwom wà mubeenà du, afàsyefurà asànaa lun'mɛn bɛ mubeenà. »

Ikyee a Yudasi

12 Antööm bàlwomà u mɔŋ bàfàbel naa mɔŋ a in'te a olive, ba bàfurà Yɛlusàlɛm. Mɔŋ awà wà tsütsü a Yɛlusàlɛm kà isii a kilɔmɛtre mwɛy. 13 Mpal bàkɔlà ba, ba bàläär u suk adu, ikal bàfakööŋà ba. Ba bàkäl Petɔlà, Ywan, Zyak anà Andrɛ, Filipo anà Tuma, Bàtɛlàmay anà Màtay, Zyak mwan a Alefɛ, Simɔn Ŋinaŋ, anà Yudà mwan a Zyak. 14 Ba banswà bàkyer afabweyà mbɔɔn ntɔn muyamà, anà akaar, anà Màlye ngwän a Yɛsu anà atɔŋ ande.

15 Kà ilä abin, alɔŋki bàköŋ bàkal kà isii a nkam a an'kwem mɔ̈ɔ̈l. Petɔlà kàmbarà uboo a ba, waa kàtɛn a ba naa: 16 « Atɔŋ, yubwaŋ naa ndaa kàtɛn Dweelà In'kyɛɛl uboo Un'kaan ikwe: u mun a David, nde kàtɛn kusà ntɔn Yudasi mbuur kàtwääl baar ntɔn mukɔr Yɛsu. 17 Ntɔn nde kàkäl umwɛy uboo a bi, nde sye kàkyer awal kab uboo a isal bipɛ. 18 Nde kàsöm mɛɛn a ngim kàyälà nde Yɛsu. Nde kàbü kwo un'tswe lingyɛl, ndür ande yàbarà uboboo, in'swà ande myanswà waa myàpää. 19 Baar a Yɛlusàlɛm banswà bàkyer ayöb ndaa ayin: lalan bàbeelà ba mɛɛn aman u ndaa aba naa "akɛldamà", iswaŋà naa "mɛɛn a an'kil". 20 Wɛɛ, làwem ndaa bàsön uboo a un'kaan a an'diim:

"Wɛy ndwà ande ikäl ipɔl, mbuur ukɔɔn abilà kwo."

Waa bàfàkwɛy naa:

"Wɛy mbuur asin uwɛl buur ande." 21 Abun, bye anà baar bàyikyeenà anà bi taaŋ lanswà kàyilyaaŋà Mwol abi Yɛsu kusà a bi 22 sɛmà ilä kun'dümà Ywan tii ilä kàlwomà nde uboo a bi. Lalan mbuur awun ayàkal mbäl ntɔn ngwiiyà a Yɛsu. »

23 Ba bàswɛŋ baar bɔ̈ɔ̈l: Yɔsefi bàfabeelà naa Barsàbas, bun'pɛ sye ikɔb naa Mbuur a balàbal, anà Màtyas. 24 Apan ba bàsi ngyamàkà yi: « Ngye, Mwol, ngye akyàyöb mpem a baar banswà. Iswɛŋ uboo a atɔŋ bà bàbɔ̈ɔ̈l ngye nà an'sɔɔl 25 ntɔn muwal uboo a isal a Antööm ikal kàsàwɛy Yudasi ki ntɔn mukyà ikal kàsɔ̈ɔ̈l nde. » 26 Ungö apan ba bàtɔ̈ɔ̈m löb, löb waa làbü udu a Màtyas. Nde mbuur kàtüüb anà Antööm bàkwem aŋimwɛy.