3
Jon Anô Hithik Avîlanô henang Wapômbêng ya ambô
(Mat 3:1-12; Mak 1:2-8; Jon 1:19-28)
1 Hêndêng sondakbêng lauming be lambahevi atu be king Sisa Taibelias heyaŋging Lom me Pontius Pailat hîmô hîtôm Judia ining gavana, me Helot Antipas heyaŋging Galili, me yang molok Pilip heyaŋging Itulia lêk Takonitis, me Lisanias heyaŋging Abilene,
2 me Anas lo Kaiapas îmô hîtôm kwandôk bêng îmbôk da. Hêndêng wak êng me Sekalaia nakandung Jon hîmô long thiliv me Wapômbêng hêv ya ambô hêndêng yêni.
3 Êng me Jon hê eveng long takatu be hîmô bidong ŋanam Yelodan me henang vo avîlanô ende kapôlôŋing lîlîng be ithik ŋanam vo Wapômbêng tem nêŋgêv loho ning kambom vê.
4 Hevong bêng hîtôm plopet Aisaia bôk hekavu hîlôk ya kapua nena,
“Kaêk te helam heveng long thiliv nena,
‘Ôpôpêk loŋdaŋlê vo Anômbêng êlêm,
me opesang be nimbutak thêthôp vo yêni.
5 Uthivung kolong sapêng thing
me onde dumlôlê sapêng pesa be nimbutak kalông.
Me opesang loŋdaŋlê lêkgwak be nimbutak thêthôp
me loŋdaŋlê hethak be hîlôk me opesang be nimbutak thêthê mavî.
6 Me avîlanô pîk sapêng tem injê Malatine atu be Wapômbêng hêv hêlêm ya ku.’ ” Aisaia 40:3-5
7 Avîlanô bêng anông ê hêndêng vo nithik loho metom henang ethak loho nena, “Môlô me bôyîv kambom nali! Osong nena tem ya thik môlô vo ôsôv injêk Wapômbêng ya la maning e? Mî anông!
8 Be ditu môlô ning kombom iŋgik thô imbing nena lêk ole kapôlômim lîlîng yôv. Me dô lemim êŋgêv auk te be onang ethak amda nena, ‘Ablaham me yoô ning bumalô, be ditu yoô me avîlanô thêthôp.’ Mî. Ya hanang ethak môlô nena Wapômbêng hîtôm nimbua valu takiti be nepesang Ablaham limi ethak.
9 Iyam lêk hêk alokwang ondong yôv vo alokwang takatu be mî hik anông mavî amî me tem ende li be îmbôk ethak amela.”
10 Me avîlanô nômbêng atu be elaŋô ya ambô enang ik yêni ling nena, “Tem yoômbong ômbête?”
11 Me Jon henang nena, “Opalê atu be ya kwêv yi hîmô me nêŋgêv yang êndêng ôpyang atu be kwêv mî. Me opalê atu be ya nôm hîmô me nêŋgêv doho êndêng ôpyang atu be nôm mî.”
12 Me ŋa iwa takis doho êlêm vo Jon ithik loho imbing be enang ik yêni ling nena, “Kîdôŋga, tem yoômbong ômbête?”
13 Me Jon enang ethak loho nena, “Môlômbua takis îtôm Lom ining anômbêng henang yom me dô umbua doho oyang êyômô imbing andô.”
14 Me ŋa vovak doho enang ik yêni ling hiving nena, “Me tem yoômbong ômbête?”
Me henang ethak loho nena, “Lemim êŋgêv nena ovong ku alêla be êv môlô vuli ethak vithê me ditu hîtôm yom. Me dô môlômbong avîlanô êkô be êŋgêv ining valuseleng êndêng môlô andô. Lêk dô ômbî ambô oyang ethak avîlanô takatu be mî evong kambom te amî vo umbua ining valuseleng andô.”
15 Avîlanô Islael thak êv maleŋing vo Mesaya nena tem nêlêm. Be ditu êyê Jon hevong ku takêng be leŋing êv nena betha Mesaya atu ma.
16 Metom Jon henang ethak loho nena, “Ya hathik môlô hethak ŋanam, metom ôpatu be tem nembeng ya yam me ya lêklokwang me bêng anông vo yînîng. Yêni me anô lêk athêng bêng me ya me ya hamô ŋa ku oyang vimbing, be mî hîtôm ya pole ya vakapô bokgôp ya yak vê amî. Yêni tem nithik môlô ethak Lovak Matheng lêk amela.
17 Me hevalong ya sala vo nethong ini wit be nîtîtînîng vo kôpik lêk limbalôm sapêng eŋgololong endebe nitup êm. Mîng nimbua ya anông be ni tak îmô melak kapô, metom ya kôpik me nîmbôk ethak amela atu be mî nema amî.”
18 Me Jon enang ambô bêng anông hiving vo niŋgik avîlanô leŋing ling me henang Wapômbêng ya Ambô Mavî hêndêng loho.
19 Lêk hethang Galili ning Anômbêng Helot hethak ya kombom kambom takatu be hevong be henang nena, “Bisête be huwa aviyam yanavî Helodias hîtôm vônîm?”
20 Êng me Helot evong kambom yang hethak loŋbô nena hetak Jon hîlôk kalaondong.
Jon hithik Yisu
(Mat 3:13-17; Mak 1:9-11; Jon 1:32-34)
21 Waklavông atu be Jon hithik avîlanô me hithik Yisu hiving. Hithik yôvêm me Yisu heteng mek me leng hikê.
22 Me Lovak Matheng hîlôk be hêlêm nang menak bôbô be hêyô hîmô yêni. Me kaêk te hêlêm nang leng be henang nena, “Ong me yînîng wakna atu be ya leng hiving anông. Me ya leng mavî anông hethak ong.”
23 Yisu ya sondakbêng me hîtôm 30 ma me hevong ya ku muŋdaluk heveng avîlanô maleŋing. Me avîlanô eyala nena yêni me Josep nakandung.
Josep me Heli nakandung.
24 Me Heli me Matat nakandung.
Matat me Livai nakandung.
Livai me Melki nakandung.
Melki me Janai nakandung.
Janai me Josep nakandung.
25 Josep me Matatias nakandung.
Matatias me Amos nakandung.
Amos me Nahum nakandung.
Nahum me Esli nakandung.
Esli me Nagai nakandung.
26 Nagai me Mat nakandung.
Mat me Matatias nakandung.
Matatias me Semen nakandung.
Semen me Josek nakandung.
Josek me Joda nakandung.
27 Joda me Joanan nakandung.
Joanan me Lesa nakandung.
Lesa me Selubabel nakandung.
Selubabel me Sealtiel nakandung.
Sealtiel me Neli nakandung.
28 Neli me Melki nakandung.
Melki me Adi nakandung.
Adi me Kosam nakandung.
Kosam me Elmadam nakandung.
Elmadam me El nakandung.
29 El me Josua nakandung.
Josua me Eliesel nakandung.
Eliesel me Jolim nakandung.
Jolim me Matat nakandung.
Matat me Livai nakandung.
30 Livai me Simion nakandung.
Simion me Juda nakandung.
Juda me Josep nakandung.
Josep me Jonam nakandung.
Jonam me Eliakim nakandung.
31 Eliakim me Melea nakandung.
Melea me Mena nakandung.
Mena me Matata nakandung.
Matata me Natan nakandung.
Natan me Devit nakandung.
32 Devit me Jesi nakandung.
Jesi me Obet nakandung.
Obet me Boas nakandung.
Boas me Salmon nakandung.
Salmon me Nason nakandung.
33 Nason me Aminadap nakandung.
Aminadap me Atmin nakandung.
Atmin me Alni nakandung.
Alni me Heslon nakandung.
Heslon me Peles nakandung.
Peles me Juda nakandung.
34 Juda me Jekop nakandung.
Jekop me Aisak nakandung.
Aisak me Ablaham nakandung.
Ablaham me Tela nakandung.
Tela me Naho nakandung.
35 Naho me Seluk nakandung.
Seluk me Leu nakandung.
Leu me Pelek nakandung.
Pelek me Ebel nakandung.
Ebel me Sela nakandung.
36 Sela me Kainan nakandung.
Kainan me Alpaksat nakandung.
Alpaksat me Sem nakandung.
Sem me Noa nakandung.
Noa me Lamek nakandung.
37 Lamek me Metusela nakandung.
Metusela me Inok nakandung.
Inok me Jalet nakandung.
Jalet me Mahalalel nakandung.
Mahalalel me Kenan nakandung.
38 Kenan me Enos nakandung.
Enos me Set nakandung.
Set me Adam nakandung.
Adam me Wapômbêng nakandung.