VE
Iesu Keliso yana ve Ioni 'waineye
'Eba kiavemageta
Tutuyanina Ioni i miamia Imula Fatimo, vanuga yogona nageneye, buki de'e i kilumi. Iesu i wafa i laka abame, bani'odi malamala 35 i 'a'avana, mulieta bukinina Ioni i kilumi. Buki de'e 'ana kiluma 'ana tutuye, Iesu 'ana tovetumaganavo veviga bwaikidi i veveluagadi Loma kabemani 'waidiega, siwe buki de'e 'wainega tovetumagananidi 'aivaita i veluagai, bega ma yadi venuafoufa'ala i vetoketoke.
Iesu i souyeni Ioni 'waineye, yana nuanua 'ana tovetumaganavo 'aila'a 7 faifaidi i veifufu. Wata 'awaie nani tulina tulina i na souyediga i sivemagesedi 'waineye. I vona'a'ava, naninidi Ioni 'isedi wata i nogaidi i kilumidi buki de'e 'waineye. Iesu i ve vona-awatabaiega Ioni 'waineye, bega 'adi 'aseta nuavogavoganidi.
Buki de'e 'ana nuanua bwaikina mageseye, Yaubada yana vetoketoke Seitani wata yana 'aila'a yaiaina 'waidie faifaina. I vetoketokega Keliso 'wainega, wata tomia fwayafwaya taunidi i tauyediga Seitani 'waineye i na leodi. I na leodi i na 'a'ava, nika abama wata fwayafwaya 'ivaudi i na 'idewadi, mulieta Yaubada yana 'Aila'a ma yadi sosoana i na mia-vagata Yaubada wata Iesu Keliso taiadi. Buki de'e 'ana 'idi side bani'odi.
Buki lamuna wata vekaiwa tovetumaganavo 'waidie. 1:1-8
Keliso i souyeni Ioni 'waineye. 1:9-20
Keliso yana vona tovetumagana 'aila'a 7 'waidie. 2:1-3:22
Lubulubu nunumina wata 'ana yogoyogona 7. 4:1-8:1
Anelose 7 yadi evulega 7 i yuvedi. 8:2-11:19
Tomotoga 'adi 'aitonu, 'aisaya kasikasisidi bani'odi. 12:1-13:18
'Ifwaidi ve. 14:1-15:8
Nani vitadi sakoidi ma 'aivoedi 7. 16:1-21
Yaubada 'atamana Babiloni, tomotoga 'aisaya kasikasisidi bani'odi, wata Seitani i leodi. 17:1-20:10
Tomotoga matatabudi yadi vonayavuga Yaubada 'waineye. 20:11-15
Abama, fwayafwaya wata Ielusalema 'adi 'ive'ivau. 21:1-22:5
Iesu yana vila-vaitugana faifaina. 22:6-21
1
1 Veifufunidi lubulubu de'e nageneye Yaubada yana 'anivelena Iesu Keliso 'waineye bega ava'ai sai'afoga i na souyediga, i sivemagesedi Yaubada yana tofolovavo 'waideye. Keliso yana anelose abamayega i vetunei yau Ioni yana tofolova 'waikuye bega naninidi i veku.
2 Nani matatabuna a 'isediga faifaidi a vonevonemi. De'e a lulu'ivonaga valanina i mai Yaubada 'wainega, wata vonanidi Iesu Keliso i lu'ivoneyedi 'waikuye.
3 Fai naninidi sai'afoga i na souyedi, aitoi Yaubada yana lu'ivona de'e i na lu'iawawaiga tovetumaganavo 'waidie 'eba sosoana 'waineye, we'e egavo vonanidi i na vinenegediga wata i na vematayakeyakediga 'eba sosoana 'waidie.
Ioni yana vona-vekaiwa tovetumagana 'waidie
4 Yau Ioni a vekaiwa 'omi tovetumaganavo 'ami 'aila'a tulina tulina 'wa miamiani 'atamana 'adi 7 'waidie, 'awalawa Eisia nageneye. Nuanuaku Yaubada, 'Anu'anununa wata Iesu Keliso, ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi. Yaubada kumanina miamia-vagaina, basenadi i miamia, 'asiau i miamia wata 'awaie i na mai, we'e 'anu'anunu 7 taiadi i miamia 'ana didiga 'ai'aiwabuna manawanega.
5 Iesu Keliso taunina ma 'ana vetumagana Yaubada 'ana 'aseta mogitana i lu'ivoneyeni, kumanina nagami i tovoi wafayega, wata tomia fwayafwaya 'ana kinivo 'adi Toveimea.
Iesu Keliso ta na subisubiai, kumanina i nunuakalikalieda, wata dayaginega i yavuda yada sakona 'waidiega.
6 I silakaida bega yana 'Eba Veimea nageneye ta miamia wata ta vevetofolova Tamana Yaubada faifaina, 'asa'aiana 'ida yana tovelomu. Mogitana Iesu Keliso ta na subisubiai, taunina magemagetana wata toketokeotogina, kebu i na 'a'avaga i na mia-vagata. Vona mogitana, yaku nuanua bani'odi.
7 'Wa 'isanawe, sino waowa 'wainega i mimai.
Tomotoga matatabudi i na 'iseni, 'ana to'ailovena taiadi.
'Awalawa 'aitamogana 'aitamogana 'ana tomia
i na vemogai faifaina.
Ava'ai a voneyeniga, vona mogitana yaku nuanua bani'odi.
8 'Auvea Yaubada i vo, Yau kumaniku lamukwaikwaituna wata kaluna, kebu 'aku 'eba velamuga wata kebu 'aku 'eba ve'a'avaga. Yau toketokeotogiku 'asiau a miamia, basenadi a miamia wata 'awaie a na wai.”
Keliso i souyeni Ioni 'waineye
9 Yau tatami Ioni, ma fuedeye vita ta veveluagadi Iesu faifaina, ma fueda yana 'Eba Veimea nageneye ta miamiani, wata yana 'aivaita 'wainega ta totokemaigeda. Yaubada yana Vona a lulu'ageyeni wata Iesu faifaina a lulu'ivona begaidi i 'ive'aviniku i yatoku Imula Fatimo 'waineye.
10 'Aiata Tafalolo, 'Auvea yana 'Aiata 'waineye, a 'odu'odu nika 'Anu'anununa i ageku mogitana nika tamu bona mulikuye a nogai bani'odi evulega butu'aina bwaikina.
11 Bonana a nogai i vo, Ava'ai 'u na 'iseniga 'u na kilumi lubulubu 'waineye, 'u na vetunei i na nago tovetumaganavo 'adi 'aila'a i miamiani 'atamana 7 'waidie i na lu'iawawai. 'Atamananidi side 'adi wagava. Efeso, Simena, Feligamo, Taiatala, Sadisi, Filadofia, Lodisia.”
12 A sivilaku a na 'iseni aitoi kumanaga i veveifufu, nika mageta 'eba yato golida 7 a 'isedi.
13 Kamwadie tamu tomogo a 'iseni 'ana 'isa'isa kumanina i vetomotogaotoga, 'ana talauma manamanawena 'avalanega i obu 'ageneye, we'e bulava golida 'afauneamo.
14 Nava'auna 'ana lau'avu i kumeta bani'odi labia fwa'ena 'alo bunebune founa, matana 'aninamanamalidi bani'odi 'ai-'ala'alata.
15 We'e 'agena 'aninamanamalidi bani'odi tamu kainumu yadayadalina i da luyauyauta 'ai-'ala'alata nageneye, bonana 'ana nogaya bani'odi kuvakuvala butu'aina.
16 'Ana 'atagie 'ubwana 7 we'e 'awaneye kefata kainumu nigona ma vi'avi'aina. Maigina mataududulina 'wa da vo inala i da vulaoga.
17 Tutuyanina a 'iseni a lumata'afufu 'ageneye 'wa da vo a da wafa. 'Ana 'atagi i yatoi tomogokuye i voneku i vo, Kebu 'u na kolologa. Yau 'eba velamu wata 'eba ve'a'ava.
18 Yau kumaniku tomia-vagata. Basenadi a wafa siwe a yawasa, tutuya matatabuna kebu a na 'a'avaga a na mia-vagata. Wafa wata towafa yadi 'eba mia, yau 'adi Toveimea.
19 Begaidi nuanuaku naninidi 'u 'ise'isediga, faifaidi 'u na kiluma. Naninidi 'akonadi i souyediga wata naninidi 'awaie i na souyedi.
20 'Ubwana 7 'aku 'atagie wata mageta 'adi 'eba yato golida 7 'adi 'aseta givagivadi. 'Adi nuanua side bani'odi. 'Ubwana 7 taunidi Yaubada yana anelose 7, tovetumaganavo i miamiani 'atamana 7 'waidie 'adi to'isave'avina, we'e mageta 'adi 'eba yato 7 taunidi tovetumagana 'adi 'aila'a 7.”