10
Iesu i vona-awatabai sifi 'adi kali faifaina
1-2 Wata Iesu i vonedi i vo, A vona mogitana 'waimie, to'isave'avina sifi 'aiaseye yana 'aisaya 'adi mosomoso i veve'anidi, lovane i vevedodogidi 'adi kalie, bei wata i 'i'isave'avinidi. 'Ai'edi to'isave'avinanina nuanuana i na lukuga, 'awa 'waineamo i lukuluku, we'e 'ai'edi tamu aitoi kebu 'awa 'waineamo i na lukuga kaliamo i na nakikila, taunina to'ainike wata tovainago.
3 Tutuyanina to'isave'avina sifi nuanuana yana 'aisaya i na nawedi, 'awa 'ana to'isave'avina i vonevoneni saiboda i sisibaleni, mulieta to'isave'avinanina yana sifi 'aitamogana 'aitamogana 'adi wagaveamo i tayatayamidi.
4 Tutuyanina i sousouyedi to'isave'avina i kumekumeta we'e yana 'aisaya mulineye i delideli fai bonana i nogaya'inanai.
5 'Aisayanidi kebu 'adi fata tamu tomogo mulineye i na nagoi, bola bonana i na bavuyeni i na ve'aladegadega.”
6 De'e vona-awatabainina 'wainega Iesu i veifufu 'waidie, siwe kebu nuadi i da magetadi.
7 Begaidi Iesu i vo, A vona mogitana 'waimie, yau sifi 'adi kali 'ana 'awa.
8 Basenadi mali tomotoga nuanuadi i na veto'isave'avina igodina taunidi i da mai Yaubada 'wainega, tomotoganidi tovainago wata to'ainike, begaidi yaku sifi kebu bonadi i da nogaya'inanadi.
9 'Asa'aiana kumaniku 'awa. Egavo i na vetumagana 'waikuye, i na luku 'waikuyeamo a na 'ita'ita'iedi wata a na 'i'isave'avinidi bani'odi to'isave'avina sifi yana 'aisaya i nunawedi i veve'anidi wata i mimaiedi 'adi kalie.
10 Tovainago i na maiga, vainago'ava, 'ainike'ava, 'ivesako 'aisedi faifaidi i na mai. Yau a maiga tomotoga mia 'ivauna wata 'atumaina a na veledi bega i na sososoana, wata kebu tamu nani faifaina i na vevenuafouviga.”
Iesu to'isave'avina sifi 'atumaina
11 Wata Iesu i vonedi i vo, Yau to'isave'avina sifi 'atumaiku, begaidi yawaiku a na tauyeni a na wafa yaku sifi 'adi 'ita'ita'i faifaina.
12 'Ai'edi tamu tomogo i na vetofolova sifi i na 'i'isave'avinidi, fai taunina kebu tonisifi 'ai'edi 'ou'ou kasikasisina i na 'iseni i na mimaiga bola i na degalovedi, 'ou'ounina kasikasisina sifi i na ovadi i na ve'aladegadega.
13 Tofolovanina i dega fai taunina kebu tonisifi, begaidi kebu faifaidi i da vetafewa i folovamo tutula faifaina.
14-15 Yau to'isave'avina sifi 'atumaiku. Tamada i 'asetaku wata yau a 'asetai, wata bani'odi yaku sifi a 'asetadi wata i 'asetaku. Fai taunidi yaku sifi, yawaiku a na tauyeni a na wafa 'adi 'ita'ita'i faifaina.
16 We'e 'ifwaidi yaku sifi tulidie i miamiani, kebu de'e kalinina nageneye. I lubwaineku kumanidiavo wata a na miedi, 'adi fata bonaku i na nogai, a na luvetubamidi 'aila'a 'aitamogana we'e 'adi to'isave'avina 'aitamogana.
17 Tamaku i nuakalikalieku bwaikina fai tauniku a tauyeku 'awaie a na wafa, siwe wafanina 'wainega wata yawaiku a na veluaga-vaitugani.
18 Kebu tamu aitoi 'ana fata yawaiku i na dabai, yau taunikuna a na tauyeni. Fai ma yaku veimea wata ma yaku toketokena 'aku fata yawaiku a na tauyeni, wata 'aku fata yawaikunina a na veluaga-vaitugani. Tamaku yana veimea 'waikuye side bani'odi.”
19 Iesu i vona'a'ava, mulieta vonanina faifaina me Diu 'aila'a wata i 'idia.
20 Fuedi i vona i vo, Vona mogitana yaiaina i agei i ve'wava'wava. Kebu bonana 'wa na nogai.”
21 We'e 'ifwaidi i vo, Iesu yana vona 'ana nogaya kebu bani'odi tomogo yaiaina i ageiga yana vona. Yaiaina kebu 'ana fata tomatasako i na 'ive'atumaia Iesu i 'idewaiga bani'odi.”
Iesu me Diu i vedumwe'ai'aieni
22 Malayaubanie me Diu fuedi i va'auta Ielusalema tamu sakali i 'idewai. Sakalinina 'adi 'eba tolinuata'i wata yadi 'eba nuave'avina, basenadi mali tomotoga yadi Vanuga 'Eba Velu'ui i 'ivesakoi we'e i 'idewa-vaitugani faifaina.
23 Tutuyanina 'waineye Iesu i nago Vanuga 'Eba Velu'ui 'waineye, i yabayaba Kini Solomoni yana Masi'eda 'waineye.
24 Me Diu i 'iseni i maia i tovififineni i voneni i vo, Tutuya manamanawena 'a vevenuanaluga yamu vona faifaidi. 'Asiauotoga nuanuama 'u na vona tonovina 'waimeye, mogitana 'omu Keliso Yaubada 'ana Venua'ivina 'alo kebu?”
25-26 Iesu i vo, 'Akonadi a vonemi siwe kebu 'wa da vetumaganekuga. Folovanidi toketokedi a 'i'idewadiga Tamaku yana veimea 'wainega, 'wa da 'isedi 'wa da 'asetai yau a mai Yaubada 'wainega, siwe kebu 'wa da vetumagana fai 'omi kebu yaku sifi.
27 Yaku sifi mogitana bonaku i noganogai, 'aitamogana 'aitamogana a 'asetadi wata i yoyogo'wailiku.
28-29 Mia 'atumaina wata miamia-vagaina a veleveledi bega kebu i na wafaotoga. Kebu tamu aitoi 'ana fata i na 'iaweloveku, fai Tamaku kumanina sifinidi i velekuga toketokeotogina, tomotoga 'ifwaidi kebu bani'odiga. Kebu tamu aitoi 'ana fata i na sieloeloku Tamada yana 'isave'avina 'wainega.
30 Tamada wata yau, 'asa'aiana 'aitamogana.”
31 Vonanina faifaina me Diu kileu i 'ewadi igodi i da luvewafai basenadi bani'odi.
32 Siwe Iesu i vonedi i vo, Folova fuedi 'atumaidi wata toketokedi a 'i'idewadi, Tamada yana awave'eda'eda 'wainega. Folovanidi 'waidiega, ava'ai folovaga faifaina 'wa 'i'ikasikasisi bega 'wa na nikeku?”
33 Me Diu Iesu yana vona i tutuli i vo, Yamu folova 'atumaidi faifaidi 'ako kebu 'a da nikemuga, siwe fai 'u vona-uvi'agala Yaubada 'waineye. 'Omu tomogo-'avo'avovo siwe igodi 'u vo, Yau Yaubada.’ ”
34 Iesu i vonedi i vo, Basenadiotoga i kilumi Yaubada yana Buki nageneye, bukinina 'wa veve'ililibuyeni bwaikina, Yaubada i vona toveimea i venua'ivinediga 'waidie i vo, 'Omi tomotoga 'asa'aiana taunimi yaubadanimi.’
35 'Akonadi ta 'asetai Yaubada yana Buki i na 'eno-vagata wata kebu tamu sai'afo vekali nageneye, we'e toveimeanidi Yaubada yana Vona i nogai, Yaubada i goledi yaubadavo.
36 Yaubada tomotoga i fali-yaubadedi, we'e yau a vo, Yau Yaubada Natuna,’ i lubwaineku fai i venua'ivineku i vetuneku a mai tomia fwayafwaya 'waimie, begaidi kebu a da vona-uvi'agala Yaubada 'waineye.
37 'Ai'edi Tamaku yana folova kebu a da 'i'idewadiga, i lubwainemi kebu 'wa da vetumagana 'waikuye, siwe fai Tamaku yana folova a 'i'idewadi i lubwainemi 'wa na vetumagana 'waikuye.
38 Kebu nuanuami 'wa na vetumagana 'waikuye, siwe fai folovanidi toketokedi a 'i'idewadiga, i lubwainemi 'wa na vetumaganedi bega 'wa na 'aseta-'atumaia, yau Tamada 'ana labilabina wata Tamadanina i labilabiniku.”
39 Iesu yana veifufunina faifaina, to'edakumetavo igodi i da 'ive'avini basenadi bani'odi, nika i 'iawedi i nago.
40 Iesu i vilai i damana Ufa Iolidani vi'ainega i miamia, basenadi bei Ioni tomotoga i bafitaisodi.
41 Tomotoga fuedi i maia Iesu 'waineye, 'aise'avadi i veifufu i vo, Ioni kebu tamu folova toketokena i da 'idewai, siwe nani matatabuna basenadi i veifufuyediga Iesu faifaina, 'akonadi 'adi mogitana i souyedi.”
42 Begaidi tomotoga fuedi i vetumagana Iesu 'waineye taunina Yaubada 'ana Venua'ivina.