IBELIU
Lubulubu de'e me Ibeliu faifaidi
'Eba kiavemageta
Lubulubu de'e me Diu faifaidi, kumanidiavo i vetumaganaga Iesu Keliso 'waineye. Bonadi 'ana wagava Ibeliu begaidi ta golegoledi ta vo, Me Ibeliu.” We'e lubulubu de'e 'ana tokiluma kebu ta da 'asetaiga aitoi i kiluma.
Fai me Ibeliu tovetumagana vita i veveluagadi Iesu 'ana tovedumwe'ai'ai 'waidiega, nuanuadi i na viladi yadi tafalolo tuatuaina 'waineye. Begaidi lubulubu de'e 'ana tokiluma i velu'ase'asedi i lubwainedi yadi tafalolo tuatuaina 'adi 'eda'eda i na bailedi, Iesu 'aiseotogina 'wainega yadi sauluva i na tonova Yaubada mataneye. Iesu taunina Yaubada Natuna bwaikaotogina we'e anelose, Yaubada yana tolu'ivonavo wata Mosese sai'afo. Wata i ve 'waidie tomotoga yadi sauluva kebu 'ana fata i na tonova Yaubada mataneye veimea 'adi vematayakayaka 'waidiega 'alo velomu tulina tulina 'waidiega. Iesu 'aiseotogina 'wainega Yaubada yada sakona i 'u'umidi. Fai taunina yada Tovelomu Bwaikina faifaida i mia-vagata Yaubada 'ana 'atagie, i lubwaineda yada sauluva tuatuaidi ta na bailedi, yada vetumagana ta na yato-vagasedi Iesu 'waineye. Lubulubu de'e 'ana 'idi side bani'odi.
Yaubada taunina i sivemageseni 'waideye Natuna 'wainega. 1:1-4
Keliso Yaubada yana anelose i vebwaika-'iawedi. 1:5-2:18
Keliso Mosese wata Iosua i vebwaika-'iawedi. 3:1-4:13
Keliso tovelomu i vebwaika-'iawedi. 4:14-7:28
Veakutagona 'Ivauna Keliso 'wainega Veakutagona Kumekumetana i vebwaika-'iaweni. 8:1-9:28
Keliso dayagina 'aisaya dayagidi i vebwaika-'iawedi, velomunina 'ana fata yada sakona i na 'u'umidi. 10:1-39
Vetumagana 'aiseotogina 'wainega yada sauluva i na tonova Yaubada mataneye. 11:1-40
Ma yada tokemaiga ta na vetumagana Keliso 'waineye wata ta na vematayakeyakeni. 12:1-13:19
Lubulubu 'ana tokiluma yana 'alanuai. 13:20-25
1
Yaubada yana nuanua 'waideye, 'ana Tosivemageta Iesu
1 Basenadiotoga Yaubada yana nuanua i veve tubudavo me Diu 'waidie. Tutuya fuedi 'eda'eda tulina tulina 'waidiega yana nuanua i sivemagesedi yana tolu'ivonavo 'waidie mulieta i lu'ivona tubudavo 'waidie.
2 Basenadi de'e bani'odi i veifufuyedi siwe 'asiau bega i na nagoga tutuya 'ana 'eba ve'a'ava 'waineye i veifufu 'waideye Natuna 'wainega. Natunanina 'wainega nani matatabuna i 'idewadi abame wata fwayefwayeye, wata i venua'ivineni bega naninidi i 'idewadiga i na veveimeyedi.
3 Yaubada yana 'ai'aiwabu mataududulina 'anununa 'ada fata ta na 'iseni Natuna 'wainega. Natunanina Yaubada i sala-'afo'afoi wata yana vona toketokena 'wainega nani matatabuna i veveimeyedi wata i 'i'isave'avinidi. We'e yana wafa 'wainega tomotoga yada sakona i lekoa'a'avadi mulieta ma yana veimea i miabui abame, Yaubada Toketokeotogina 'ana 'atagie.
4 Ma yana veimea i miabui bega taunina bwaikaotogina we'e anelose sai'afo. Wata 'ana wagava Yaubada i veleniga bwaikaotogina, kebu anelose 'adi wagava bani'odi.
Yaubada Natuna bwaikaotogina kebu anelose bani'odi
5 Vona mogitana ta 'asetai Yaubada Natuna bwaikaotogina, faifaina basenadiotoga i kilumi Yaubada yana Buki nageneye. Yaubada i vona Natuna 'waineye i vo,
'Omu Natuku,
yau Tamamu, 'asiau veimea a velemu.”
We'e kebu tamu tutuya de'e bani'odi i da voneyedi anelose 'waidie. Wata tamu tutuya Yaubada i vona Natuna faifaina i vo,
Yau Tamana,
we'e taunina Natuku.”
6 Yaubada Natuna kumanina nani matatabuna 'adi to'edakumeta, tutuyanina Yaubada Natuna i mieni fwayefwayeye, faifaina i vona i vo,
Yaku anelose matatabudi, i lubwainedi ma yadi ve'ililibu i na 'odu'odu 'waineye.”
7 Ta 'asetai anelose tomotoga bwaikidi fai Yaubada faifaidi i vona i vo,
Yaku anelose a 'idewadi, yadi lilide kaukau bani'odi,
taunidi yaku tofolovavo 'ai-'ala'alata bani'odi.”
8 We'e Natuna bwaikaotogina bega faifaina i vo,
'Omu Yaubada, yamu veimea 'ana didiga kebu 'ana 'eba ve'a'avaga i na 'eno-vagata.
'U veveimea, veimea tonovidi 'waidiega.
9 Sauluva tonovidi nuanuamu bwaikina, we'e sakona 'u vedumwe'ai'aieni.
Begaidi yau yamu Yaubada a venua'ivinemu,
a silakaimu wata veimea bwaikina a velemu,
'amu kiavesosoana, we'e emwavo 'adi ve'ililibu sai'afo.”
10 Wata Yaubada i vona Natuna 'waineye i vo,
'Omu Toveimea, 'eba velamu 'waineye fwayafwaya 'u 'idewai,
wata nimamuyega nani matatabuna abame i souyedi.
11-12 Naninidi 'a'a'avidi i na savovola, we'e 'omu 'u na mia-vagata.
I na venani-'avo'avovo talauma tuatuaina bani'odi.
Tomotoga talauma tuatuaina i na sakoga i na nunumi i na taweni, ma'itufa 'ivauna i na 'ewai.
Wata bani'odi fwayafwaya abama taiadi 'u na nunumidi we'e 'ivaudi i na souyedi.
We'e 'omu, 'asa'aiana 'amu 'isa'isanina, kebu 'u na vetuli, 'u na mia-vagata.”
13 Wata tamu tutuya Yaubada i vona Natuna 'waineye i vo,
Veimea a velemu bega 'u na miabui 'aku 'atagie,
i na nagoga 'amu gaviavo a na leodi bega 'u na veveimeyedi.”
We'e kebu tamu tutuya de'e bani'odi i da voneyedi anelose 'waidie.
14 Vetuma anelose egavo? Taunidi 'anu'anunu, Yaubada yana tofolovavo i vevetunedi bega egavo 'ita'ita'i i na veluagaiga i 'i'ivaisedi.