7
Sitiveni i vonayavuga
1 Tovelomu bwaikina Sitiveni i velutolieni i vo, Tolu'ivonanidi i vonaga mogitana 'alo kebu?”
2-3 Sitiveni tovelomu bwaikina kaniselavo taiadi i vonedi i vo,
Tamakwavo wata ekwavo a na vonemi. Basenadiotoga tubuda Ebelamo i miamia Mesafotemia, bola kebu i da nago Elana, Yaubada Magemagetana i souyeni 'waineye i voneni i vo, Yamu 'aila'a 'u na 'iawedi wata yamu 'awalawa, 'u na nago tamu 'awalawa 'waineye bola a na vemu.’
4 Bega 'awalawa Kalidia i 'iaweni i nago 'atamana Elana 'waineye i mia. Mulieta Ebelamo tamana yawaina i 'a'ava Yaubada i voneni i kwekwe i mai yada 'awalaweye.
5 Tutuyanina 'waineye Yaubada kebu tamu fwayafwaya Ebelamo i da veleniga, kebu tamu yana fwayafwaya mogitanaga bani'odi 'iave 'ana bababa, we'e Yaubada i vona'awaufaufa 'waineye bola fwayafwayanina matatabuna i na veleni wata 'ana wauma faifaidi. Vona'awaufaufanina Yaubada Ebelamo i veleniga, siwe tutuyanina 'waineye kebu natunavo.
6 Yaubada yana vona side bani'odi Ebelamo 'waineye i vo, Bola 'amu wauma i na nagoi mali 'awalaweye, bei malamala 400 nagedie i na vetofolova-maimaiga wata vita i na veveluagadi tomotoga 'waidiega.
7 Siwe tomotoganidi bola vematavuloga a na veledi bega 'amu wauma i na viladi i na maia de'e 'awalawanina 'waineye i na 'odu'odu 'waikuye.’
8 Wata Yaubada Ebelamo i voneni i vo, 'Amu wauma matatabudi bunudi i na bobodi yaku veakutagona 'u vetumaganeniga 'ana tugusa.’ Mulieta Aisake i tubuga, 'aiata 'ana ve-8 'waineye Ebelamo bununa i boboi. Wata bani'odi tutuyanina Aisake natuna Iakobo i tubuga, mulieta Iakobo natunavo 'adi 12, taunidi tubudavo ta veve'ililibuyedi.”
9-10 Wata Sitiveni i vo,
Tubudavonidi taidi Iosefa i ve'unumagigieni i vekimwaneyeni mali tomotoga 'waidie bega i naweni Itifita bei i vetofolova-maimaiga. Siwe Yaubada i 'wea'weabuya yana veviga 'waidiega i 'ita'ita'ieni. Tamu 'aiata Itifita 'ana kini Felo, Iosefa i goleni i nago 'waineye wata bei Yaubada i 'ivaiseni, begaidi Felo i 'iseni yana sauluva 'atumaina wata ma yana nuamageta. Bega i silakai i vetoveimea yana vanuga 'ana tofolovavo wata 'awalawa Itifita matatabuna 'waidie.
11 Tutuyanina 'waineye Itifita wata Kenani 'waidie loka bwaikina i souyeni. Tubudavo kebu 'adi fata ava'aibe bei 'ani'ani i na veluagai.
12 Mulieta Iakobo vala i nogai 'ani'ani fuedi Itifita 'waineye bega natunavo i vetunedi i na kimwane wata i na viladi i na maia.
13 Tamu tutuya 'adi'adi i 'a'ava wata i viladi i nagoi 'ani'ani i na kimwane. Bei Iosefa taunina i sivemageseni enavo 'waidie, mulieta i veifufu Felo 'waineye yana 'aila'a faifaidi.
14-15 Iosefa enavo i vonedi i vo, 'Wa na nagoi tamada 'wa na voneni matatabumi 'wa na maia de'e bei ta na mia.’ I viladi tamadi i voneni bega Iakobo ma yana 'aila'avo matatabudi 75 i maia Itifita. Bei i miamiani mulieta Iakobo i wafa wata 'ifwaidi tubudavo.
16 Basenadiotoga Ebelamo i miamia Sekemu, tamu fwayafwaya i kimwanei Emoli 'ana wauma 'waidiega. Tutuyanina Iakobo wata Iosefa i wafaga tomogodi i nawedi fwayafwayanina 'waineye i ve'ufadi.”
Sitiveni i veifufu me Diu yadi souyagi faifaina
17 Wata Sitiveni kaniselavo i vonedi i vo,
Malamala fuedi i 'a'ava tubudavo i miamia Itifita, 'adi 'aila'a i vebwaika-'afo'afo wata Yaubada yana vona'awaufaufa Ebelamo 'waineye bola 'awalawa Kenani tubunavo i na veledi, 'ana tutuya i vevelilivana.
18 Mulieta tamu kini i tovoi Itifita i veimeyeni, Iosefa i bavuyeni fai basenadiotoga i wafa.
19 Kini tubudavo i vekaliedi wata tutuya vitana i veledi. I lulukakadedi bega natudiavo wala'aie i yatoyatodi i wafawafa.
20-21 Tutuyanina 'waineye tamu kwamana i tubuga 'ana wagava Mosese, taunina 'atumaiotogina Yaubada mataneye. Weta'i 'aitonu nagedie inana wata tamana i giveni vanuge, mulieta i sivemageseni Felo natuna vevinena i fayayeni, i taulai 'wa da vo bani'odi natuotogina.
22 Me Itifita yadi nuamageta matatabuna Mosese i veni, begaidi ma yana 'aseta. Yana vona 'adi nogaya 'atumaidi wata yana folova toketokena.”
23 Wata Sitiveni i vo,
Tutuyanina Mosese 'ana malamala 40 i vevenua'ivina nuanuana i na nago yana tomotogavo me Isileli i na fogedi.
24 I nago tamu tomogo Itifita i 'iseni tomogo Isileli i nikenikei, bega Mosese iana i 'ivaiseni tomogo Itifita i nikei i wafa.
25 Yana nuanua i vo 'ako enavo 'akonadi i 'asetai bola Yaubada i na 'ivaiseni bega i na 'ita'ita'iedi me Itifita 'waidiega, kebu wata i na folova-maimaiga, siwe kebu i da 'asetaiga.
26 I 'atai wata i nago me Isileli 'adi 'ailuga i 'isedi i vevetalaga, Mosese nuanuana ma iana i na veiana bega i vonedi i vo, 'Wa 'ailove, we'e iamu awale tauni'avada 'wa vevetalaga?’
27 Igodi i da talabodedi nika tomogonina vetalaga i vesivauliga Mosese i bifeleni i vo, 'Omu kebu tamu aitoi i da silakaimu bega 'u na vetoveimea 'waimeye wata yada sauluva 'wainega 'u na veveimeyema.
28 Bogi tomogo Itifita 'u nikei i wafa, yau wata igodi nuanuamu 'u na nikeku.’
29 Tutuyanina vonanina Mosese i nogai i dega Itifita 'wainega i nago 'awalawa Midiani. Kumanina mali tomotoga, siwe bei i nagi i venatuna, natunavo iavetadi 'adi 'ailuga.
30 Malamala 40 i 'a'ava, Mosese i nunago sali'avu'avuye 'Oya Sainai lilivaneye, nika tamu anelose i souyeni 'waineye 'ai-'ala'alata nageneye.
31-32 I 'iseni welavi yauyauvina i 'ala'alata, nuana i vogani i nago lilivaneye nuanuana i na 'isadewai. 'Auvea bonana i nogai i vo, Yau tubumwavo yadi Yaubada. Ebelamo, Aisake wata Iakobo yadi Yaubada.’ Mosese ma yana kololo i tatava, kebu nuanuana i na 'ise'iseni.
33 Wata 'Auvea Mosese i voneni i vo, 'Amu 'ageyafayafa 'u na ta'idi fai bei 'u tovotovoiga fwayafwaya tabutabuna.’
34 Yaku tomotoga Itifita 'waineye i miamiani yadi veviga bwaikina a 'iseni mogitana wata yadi taivonavona a nogai bega a obuma a na 'ita'ita'iedi. Begaidi de'e 'wainega a na vevilamu 'u na nago Itifita.”
35 Wata Sitiveni i vona kaniselavo 'waidie i vo,
Side bani'odi, me Isileli Mosese i vedumwe'ai'aieni, i voneni i vo, 'Omu kebu tamu aitoi i da silakaimu bega 'u na vetoveimea 'waimeye, wata yada sauluva 'wainega 'u na veveimeyema.’ 'Ai-'ala'alata wata anelose 'waidiega Yaubada Mosese i vetunei me Isileli 'waidie, bega kumanina 'adi to'edakumeta wata 'adi to'ita'ita'i.
36 I nago tomotoganidi i vagavaidi Itifita 'wainega malamala 40 nagedie i yabedi sali'avu'avuye. Itifita 'waineye, Eyaga Yamoyamoina 'waineye wata sali'avu'avuye 'eba nuavogana wata 'eba nua'ewa fuedi i 'idewadi.
37 Mosese kumanina me Isileli i vonedi i vo, Bola Yaubada tamu yana Tolu'ivona i na vetunei 'waimie yau bani'odi. Taunina yada tomotoga 'waidega i na silakai.’
38 Tamu tutuya Mosese wata tubudavo me Isileli i miava'auta sali'avu'avuye. Bei 'Oya Sainai 'waineye tamu anelose Yaubada yana Vona i lu'ivoneyeni Mosese 'waineye. Vonanina Mosese i veleda i na 'eno-vagata.”
Sitiveni i veifufu me Isileli Yaubada i vedumwe'ai'aieni faifaina
39 Wata Sitiveni i vona kaniselavo 'waidie i vo,
Tubudavo i vedumwe'ai'ai kebu Mosese i da vematayakeyakeni, nuanuadi i na viladi Itifita.
40 Begaidi tomotoganidi Mosese tatana Eloni i voneni i vo, Mosese basenadi i vagavaida Itifita 'wainega i laka 'Oya Sainai 'waineye, siwe kebu ta da 'asetai voke i vuyo. Nuanuama kumaea 'u na 'idewadi bega 'waidie ta na 'odu'odu, taunidi i na 'edakumeseda.’
41 Eloni yadi vona i nogai tamu kumaea i 'idewai, 'ana 'isa'isa bani'odi bulumakau natudi wata i sakali. Sakalinina 'waineye tamu 'aisaya i nikei i kabuni kumaea faifaina bega i sosoana-'afo'afo fai taunidi 'adi 'idewadewa 'waineye ma yadi subia i 'odu'odu.
42 Fai Yaubada i vedumwe'ai'aieni nuanuadi kumaea, begaidi Yaubada i bailedi, i tauyedi 'ubwana 'waidie i na 'odu'odu. I 'a'avana mulieta sauluvanina faifaina Yaubada yana tolu'ivona Emosi i kilumi Yaubada yana vona i vo,
Me Isileli, malamala 40 nagedie sali'avu'avuye 'aisayayega 'wa vevelomu,
siwe kebu 'wa da 'odu'odu 'waikuye.
43 Ma'itufa yami yaubada-vekavekali 'wa yabeyabedi.
Yami kumaea Moleki ma 'ana lau'weta wata kumaea 'ubwana Lifani faifaina,
ma yami subia 'waidie 'wa 'odu'odu.’
Begaidi me Babiloni a na tauyedi i na 'ive'avinimi i na nawemi yadi 'awalaweye i na veimeyemi.’ ”
44 Wata Sitiveni i vo,
Basenadiotoga tubudavo Vadavada Tabutabuna i yabeyabeni sali'avu'avuye, vadavadanina i 'idewaiga ava'ai Yaubada Mosese i awave'ede'edeni wata i veni 'ana 'isa'isa bani'odi.
45 Mulieta tubudavo Vadavada Tabutabuna natudiavo i veledi. Tutuyanina Iosua i 'edakumesedi i 'ewa-vuvueni wata Yaubada i 'ivaisedi mali tomotoga i sogiedi yadi fwayafwaya i elodi. Bei me Isileli i miamiani fwayafwayanina 'waineye wata vadavadanina i 'enoga i nago tutuyanina tubuda Devida i souyeni.
46 Devida yana sauluva 'atumaina Yaubada mataneye, begaidi Yaubada i nuakalikalieni. Wata Devida i velu'ui Yaubada 'waineye i vo, Yaubada, 'omu basenadiotoga Iakobo i 'odu'odu 'waimuye, 'u da tauyeku yamu Vanuga 'Eba Velu'ui a da yogoni.’
47 Yaubada kebu i da tauyeni we'e natuna Solomoni vanuganina i yogoni.
48 Siwe tomotoga 'adi 'a'aiyogona Yaubada Bwaikaotogina kebu yana 'eba mia. Begaidi tamu tolu'ivona Yaubada yana vona i kilumi i vo,
49 Vanuganidi 'wa yogoyogonidiga yau 'Auvea kebu i da lubwaineku,
kebu 'ana fata bei a na miaga.
Abama yaku 'eba mia,
fwayafwaya 'ageku 'adi 'eba yato wata yaku 'eba veimea.
50 Naninidi 'wa da vo yau kebu a da 'idewadiga.’ ”
51 Wata Sitiveni me Diu to'edakumetavo i vonedi i vo,
'Omi tutuya fuedi Yaubada yana vona 'wa baibaileni. 'Wa nogai siwe 'wa kwayega, kebu 'wa da vematayakayaka. 'Omi 'asa'aiana tubudavo yadi sauluva 'wa 'ewa-'afo'afoi. Tutuya fuedi 'Anu'anunu Magemagetana yana folova 'waimie 'wa tatalabodeni.
52 Tubudavo Yaubada yana tolu'ivonavo matatabudi i vedumwe'ai'aiedi veviga i veledi, kebu tamu i da vesauluva-'atumaieni. Basenadiotoga Yaubada yana tomata'aulelevo i vetunedi i vona-samula yana Tofolova Magemagetana yana mai faifaina, siwe tubumiavo i nikedi i wafa. We'e tutuyanina yana Tofolovanina i le'wa 'omi 'wa 'etogiluveni wata 'wa luvewafai.
53 'Omi kumanimiavo Yaubada yana veimea 'wa 'ewadi anelose 'waidiega siwe kebu 'wa da vematayakeyakedi.”
Side bani'odi Sitiveni yana lau'age i ve'a'avai.
Sitiveni i lukileuya
54 Me Diu yadi to'edakumetavo Sitiveni yana vona i noganogaiga gadodi i 'alasedi i nuasako bwaikina 'waineye.
55 Siwe Sitiveni 'Anu'anunu Magemagetana i agei mogitana bega i 'isalaka abame, i 'iseni Yaubada yana mageta mataududulina wata 'ana 'atagiega Iesu i tovotovoi.
56 I vo, Mataku 'wa na velugai. Abama i 'anikililia a 'iseni Iesu kumanina i vetomotogaotoga, ma yana veimea i tovotovoi Yaubada 'ana 'atagiega.”
57-58 Tanigadi i 'ibodadi wata i vegolegole Sitiveni bonana i lutavutavuni. I lilide i tovififineni i 'ive'avini i yo'ei i obuyeni mwalilige bei i lukileuya. Sitiveni 'ana tovevita kumanidiavo to'ainike 'adi talauma i talata'idi, i 'etokwauya tamu tubuau 'ana wagava Saulo i 'isave'avinidi.
59 Tutuyanina i nikenikei Sitiveni bonana bwaikinega i velu'ui i vo, 'Auvea Iesu, 'anu'anunuku a tauyeni 'waimuye 'u na 'ewai.”
60 'Agena i vetufano'uyedi wata i vegole i vo, 'Auvea, yadi sauluva sakoina 'u da nuatavuni.” I vona'a'ava nika yawaina i 'a'ava.