5
Alár Iya̱m Nlir ka̱ Izər Awa achindərchindər
1 N wong ka̱ iwu ka̱ apal kà̱ɗi te, n ya nnap-nlà va mmá lir ka̱ apal awá kang mmá chəndər, ka̱ ǹyel ka̱ apaɓur.
2 Te uma̱leka va̱ ta ɓəp mi pa̱, <<Iza̱ u ya yà?>> Te n là pa̱, <<N ya nlir ngga apal awa nchəndərchəndər, ngwuwang ashar ìsəm pa̱ ishatɗing kang mbəbal ashar pa̱ gba̱pchi ama̱n pa̱ tukun ka̱ ǹyel ka̱ apal.>>
3 Te uza̱ là á mi pa̱ <<Iya̱m nlir nchəndərchəndər ngga awá va̱ ta̱ ka̱ nlà ka̱ ngba̱k nro pa̱, nkpaktak unəm va̱ i nəm ayi te, mí ɓak na i fa, nro là pa̱, unəm va̱ i sóng anung ka̱ akwam te mí ɓak na i fa kpa.>>
4 UYawe uga nggatək là pa̱, <<Mi ga ǹre ǹre ka̱ nvyap ata̱ ka̱ ashe nzhi à nza̱ unəm nggo, uga ayi ka̱ uga nsóng anung ka̱ akwam ka̱ ashe aɗin mi. Iya̱m va̱ ta̱ i fa ka̱t, i təm ka̱ ashe nzhi va̱ ta i chwan oga akun ka̱ oga ipáng va̱ mmá me nzhi ata ka̱ kang.>>
Alár Achar ka̱ ashe Anàp
5 Te uma̱leka va̱ ka̱ yà ka̱ nlà nnàp ká̱ mi te, á fa là á mi pa̱, <<Wong ka̱ iwu dər iya̱m va̱ kà̱ ngga nfa.>>
6 N ɓəp pa̱, <<Iza̱ ta̱ yà?>> Te uza̱ na ama̱n pa̱, <<Nkatəp ngga mmá iya̱m à fa, kang ashishe yə́l ka̱ oga nnap mɓá̱ngɓa̱ng apambin.>>
7 Ma bol anung aɗəkɗək aga nkatəp va̱ ta te, n ya uchar təm ka̱ ashishe.
8 Uma̱leka là pa̱, <<Uchar va̱ ta̱ sat ka̱ɗor iya̱m iɓá̱ngɓa̱ng.>> Te uza̱ da̱n na tar ka̱ ashe nkatəp va̱ ta kang à gún ka̱ anunung aɗəkɗək va̱.
9 N wong ka̱ iwu te, n ya ochar pa̱ oparəm fa ka̱ ashe ìlulu, i yel i ɓa. Ayir ka̱ mpyep alyang oza̱. Oza̱ ka̱ alyang wa alyang oga igúlyat. Te oza̱ ɓa yar nkatəp va̱ ta, oza̱ wong ka̱ ɓa ga apaɓur.
10 Te n ɓəp uma̱leka va̱ ka̱ nlà nnàp ká̱ mi pa̱, <<Oza̱ yar nkatəp va̱ ta̱ i ga ka̱ kà̱ che yà?>>
11 Uza̱ là á mi pa̱, <<Oza̱ ka̱ ngga ka̱ kà̱ mbin aBabel, atak va̱ oza̱ i ga mme nzhi á na ka̱, kang ka̱ nva̱ngva̱ oza̱ i gba̱l ka̱ mme nzhi va̱ ta te, oza̱ i nak na ka̱ atak nchəcher.