9
UDawuda ka̱ uMefiboshet
1 N̂da nro te, uDawuda ɓəp pa̱, <<Unəm uro uwa yà lap ka̱ ashe nzhi aShawulu pa̱ na n nyám nnap nnəna̱n á na ka̱kul aJonatan ɗò?>>
2 Ukpari aShawulu uro uwa yà aɗiɗin pa̱ uZiba, oza̱ ɓa ka̱ na ka̱ atak aDawuda. Kang uponzhi ɓəp na pa̱, <<Mmaɓu na uZiba ɗò?>>
Te uza̱ ma̱n pa̱, <<Mmami na ukpari ɓu, áponzhi.>>
3 Uponzhi ɓəp na pa̱, <<Unəm uro uwa yà lap ká̱ irirì ka̱ ashe nzhi aShawulu pa̱ na n nyám nnap nnəna̱n Inan á na ɗò?>>
Te uZiba na ama̱n ûponzhi pa̱, <<Uya aJonatan ununggwan uro uwa yà, uva gurumgurum ka̱ ashar pa̱ kpaktak.>>
4 Te uponzhi ɓəp pa̱, <<Uza̱ ka̱ che yà?>>
UZiba na ama̱n pa̱, <<Uwa ya ka̱ aLo Debar, ka̱ nzhi àMakir, uya aAmiyel ununggwan.>>
5 Te uPonzhi uDawuda nak pa̱ mma ga mma ɓa ká̱ na ka̱ nzhi àMakir uya aAmiyel ununggwan ka̱ aLo Debar.
6 Awalang va̱ uMefiboshet uya aJonatan ununggwan ukaka aShawulu ɓa ka̱ mpyal àDawuda te, uza̱ kuchi ka̱ mbin uza̱ na ichumchum á na.
Te uDawuda là pa̱, <<ÁMefiboshet.>>
Kang uza̱ na ama̱n pa̱, <<Mmami nata̱, ukpari ɓu.>>
7 Te uDawuda là á na pa̱, <<Kang ayər a nəm ɓu ka̱t, mi ga nnyám nnap nnəna̱n a ɓu ka̱kul apo ɓu uJonatan. Mi ga nna nkpaktak iram va̱ iji akaka ɓu uShawulu a ɓu, kang ɓu ri iya̱m-nrì nzəng ká̱ mi ka̱ atebəl pa̱ ɗəkər.>>
8 Te uMefiboshet kuchi ka̱ɗi, kang uza̱ là pa̱, <<Uda ukpari ɓu yà? U nyám nnap nnəna̱n á mi, mmami va pa̱ vyakshin á.>>
9 Te uponzhi wór ukpari aShawulu uZiba, kang uza̱ là á na pa̱, <<N na ûkaka anəm uga nzhi ɓu chit nkpaktak iya̱m va̱ iji aShawulu ká̱ nzhizhi.
10 Mmaɓu ká̱ ovan ɓu onunggwan ká̱ okpari ɓu ó wap iram á na, kang ó ɓa ká̱ iya̱m iram ûkaka anəm uga nzhi wó, na a ya iya̱m-nrì. Kang uMefiboshet, ukaka anəm uga nzhi ɓu, i ri iya̱m-nrì nzəng ká̱ mi pa̱ ɗəkər.>> UZiba ká̱ ovan onunggwan pa̱ ogba̱pchi ama̱n pa̱ tukun, kang ká̱ okpari ìsəm pa̱ ìparəm.
11 Te uZiba là ûponzhi pa̱, <<Iya̱m va̱ u là ûkpari ɓu pa̱ kpaktak te, mi nənəm, ánəm uga nzhi.>> Te uMefiboshet ri iya̱m-nrì ká̱ uponzhi pa̱ ɗəkər ka̱ atebəl, wa uzəngtəng ka̱ ashe ovan aponzhi onunggwan.
12 UMefiboshet uwa yà ká̱ uyen ununggwan uɓwakan aɗiɗin pa̱ uMika. Kang nkpaktak onəm va̱ ka̱ ashe nzhi àZiba te, tong okpari aMefiboshet.
13 UMefiboshet təm ka̱ aUrushelima ka̱kul pa̱ ɗəkər te, uza̱ i ri iya̱m-nrì ka̱ atebəl aponzhi. Uza̱ gurumgurum ka̱ nkpaktak ashar.