12
Nnap-nnəm ngga mmà unəm uga nnəm inok Inan
1 Nna nak te, ógənang, mmami ka̱ nchal wó ka̱kul mmak nrwa ìgwak Inan te, re ó yichi izər wó á na wa iya̱m ipapa iga nshi iga iriri va inəna̱n adak ro ya ka̱ ka̱t a. Iya̱m ipápà va Inan i məma̱n ka̱. Iya̱m va nna awop wo aga nnandər.
2 Kang ó təm apir ntəm va pa̱ səlak ka̱ nnap nnəm ngga apambin va̱ ta̱ lap ka̱t. Re ó ga̱ɓa̱n nnap nnəm wó ká̱ inənan ka̱ atak apir nrəng nnap mpipe. Nna chit te, ó nyi iya̱m va̱ Inan ɗom inəna̱n, ká̱ iya̱m va uza̱ i kəka̱m, ká̱ iya̱m va̱ kukur.
3 Ka̱kul nnap nnəna̱n va Inan na mi te, mmami ka̱ nla nnap ku únza̱ uzəntən wo nggo pa̱ kan unəm a yar ishi wò a ji nkam iya̱m va̱ uza̱ ka̱t. Iya̱m va̱ mà te, re unəm a yar ishi wò a mal dakdak ka̱ atak n-yi wò, a mal ka̱ nnap nnəna̱n va Inan na á na a.
4 Wa nva oga mɓan-izər pa̱ ɗongɗong gwang ká̱ izər pa̱ izəng te, oga mɓan-izər va̱ ta ka̱ nnəm apir inok pa̱ izəng ka̱t.
5 wantana ka̱ yi kpa. Ka̱ ashe aKəristi te, mmayi pa̱ kyak kang i gwang chit i nyang wa izər pa̱ izəng. Nza̱ uzəngtəng yi nggo te, uza̱ mɓan-izər awan wò.
6 Mmayi ka̱ aghan Inan aga nnyi nnəm nnap apir pa̱ ɗongɗong mà dakdak ka̱ nnap nnəna̱n va ma na yi. Ka̱kul nva̱ ta te, re i nəm inok ka̱. A yà pa̱ aghan aga nnyi nnəm nnap va̱ unəm ka̱ aga nnyi nla nnap-nlà va unəm ka̱m ka̱ atak Inan te, re uza̱ a nəm inok ka̱ ka̱ atak n-yi nna nnandər va uza̱ ka̱ a.
7 A yà pa̱ nnyi nnakshi ka̱ onəm te, re uza̱ a nakshi ka̱ onəm. A yà pa̱ nnyi nɗyang nnap-nlà Inan te, re uza̱ a ɗyang.
8 A yà pa̱ nnyi nnak ìgwak onəm i kam te, re uza̱ a nak ìgwak a kam onəm. A yà pa̱ nnyi nna iya̱m ka̱kul onəm va̱ ka̱ ashe nlan te, re uza̱ a na ká̱ ìgwak pa̱ izən. A yà pa̱ nnyi ngga ka̱ onəm te, re uza̱ a kpak oza̱ anyan ro a yà ka̱ ashishe ka̱t. A yà pa̱ nnyi nnyam nrwa ìgwak ónəm te, re uza̱ a nyám nzəng ka̱ nchang ìgwak.
Iwon ka̱ apal ishi ntəm onəm oga ngwa Inan
9 Re mma̱n a ya ngga nnandər. Iya̱m va ina pa̱ kpaktak te, o yan pa̱ gənggəng. Re o bur ka̱ nkam iya̱m va kpaktak inəna̱n a.
10 Ka̱pal-ishi nnap mma̱n ogənan oga ngwa Inan te, o ma̱n owan wo pa̱ gənggəng. Ka̱ apal nnap nna ichumchum ówan wo te, o nyan owan wo ka̱ nnəna.
11 Kan nzhin ká̱ inok a rwam wo ka̱t. O ma̱k apər ka̱ nnap ngga aruhu ka̱ nnəm inok aPonzhi-Yesu inəna̱n.
12 Re nnak-ìgwak wo ká̱ Inan a yà nzəng ka̱ ntəm ka̱ ashe nchang ìgwak. O ka̱r ìgwak ka̱ nɗaktak. O ɗak ka̱ ashe nnəm aduwa.
13 O ka̱mshi ogənan oga ngwa Inan va̱ ka̱ ashe nlan. O ka̱m onəmchən nzəng ka̱ mɓa̱n-awu ro ka̱t.
14 O far nnap nnəna̱n Inan ónəm va̱ ka̱ nnyan ká̱ wo. Kan o far iya̱m ɓá̱ngɓa̱ng óza̱ ka̱t. O far nnap nnəna̱n na óza̱.
15 Onəm va̱ ka̱ ashe nchang ìgwak te, o ka̱mshi oza̱ ka̱ ntəm ka̱ ashe nchang ìgwak va̱ ta. Onəm va̱ nnyi ka̱ ntəm ka̱ ashe nlak-ìgwak te, o sak oza̱ sak ka̱ nlak-ìgwak va̱ ta.
16 Kan o gbak izər ka̱t. O təm ntəm ikángkáng ká̱ izəzər. Kan o rup ká̱ ishi ka̱t. Inok a yen wa nsan nggo te, o nənəm. Kan o rən pa̱ aghan wo ka̱ nva̱ ka̱səsa̱l ka̱t ɗò ka̱t.
17 Onəm a nəm iya̱m ina awo te, kan o pyát akəkat ká̱ iya̱m ina ka̱t. O yar nrən-nnap ka̱ nnəm iya̱m va onəm pa̱ kpaktak i ma̱n ka̱ pa̱ inəna̱n a.
18 A yà pa̱ i nənəm te, ka̱ re ka̱ anung njiwo te, kò o təm ntəm ngga ikángkáng ka̱ onəm pa̱ kpaktak.
19 Ónəm mi oma̱nma̱n, kan o pyát akat nnap únəm ro ka̱t. O re kan mmən-ikum Inan i nyi ka̱ oza̱. Ka̱kul ma lir ka̱ ashe nnap-nlà Inan pa̱,
<<Mpyát akat nnap te, ka̱kul mi. Mi pyát akat nnap pyát.>>
20 Iya̱m va̱ mà pa̱ o nəm te, o nəm wa nva ma là ka̱ ashe nnap-nlà Inan pa,
<<A yà pa̱ ayan ka̱ nji unəm uga nyang ɓu te, wa kan na ká̱ iya̱m-nrì.
A yà pa̱ ndəng gba̱l na te, wa na ndəng á na a wa.
Ka̱kul ka̱ atak nnəm iya̱m inəna̱n va̱ ta á na te, i lok na wa unəm a nak amor apər á na ká̱ ishi.>>
21 Kan o ma̱n ina a nəm igwan ka̱ apal ishi wo ka̱t. Re o nəm igwan ka̱ apal ishi ina ka̱ atak nnəm iya̱m inəna̱n.