7
1 Awalang va kpaktak mmá ɗom ntàn arwa áIsa̱rila te,
mpat aEfrayim ká̱ nnap mɓá̱ngɓa̱ng oga aSamariya i pwa,
Ka̱kul nnandər oza̱ yə́l awo ka̱t,
unəm uga ayi i chwan atak,
kang onəm oga nra anyimnyal i vyat onəm ka̱ asa̱l.
2 Ká̱ nnà te, oza̱ nak ishi ká̱ pa̱,
mi rəng nkpaktak nnap mɓá̱ngɓa̱ng oza̱ rəng ka̱t.
Ǹyangmata̱ te, nnap nnəm oza̱ gáng oza̱
mmami kà̱ ǹyəya.
3 Oza̱ i nak ìgwak i chàng uponzhi ká̱ nnap mɓá̱ngɓa̱ng oza̱,
kang onəm oga mpyal ká̱ akwam oza̱.
4 Nkpaktak oza̱ onəm oga nnəm mmai,
Nɗom mmai oza̱ wa ìgəng iga ngwàng iya̱m ìva á sur pa̱ gənggəng,
ìva onəm oga ngwàng iya̱m re nɗa̱mshi apəpər,
kà̱ mɓan nkal mma̱k á ga chu nfifyil.
5 Kà̱ ìlum àponzhi te,
ncè gbá̱ng onəm oga mpyal,
uza̱ gwang awo ká̱ onəm lákchilàkchi.
6 Ka̱kul ìgwak oza̱ sur wa ìgəng ìga ngwàng iya̱m,
oza̱ i ra anyimnyal ka̱ ashe ìgwak.
Nlak ìgwak oza̱ i ri pa̱ shìriri nkpaktak ìzwam,
ká̱ anung ìpin te, i ri wa aməlam apər.
7 Nkpaktak oza̱ sur wa ìgəng ìga ngwàng iya̱m,
Oza̱ i zhì onəm ochumchum oza̱.
Nkpaktak oponzhi oza̱ tàk chit,
unəm uro yə́ng á mi ka̱t.
AIsa̱rila gwang ishi ká̱ oɗyanəm
8 UEfərayim gwang ishi wò ká̱ onəm,
uza̱ yà chit wa nzənkəng nva mmá ga̱ɓa̱n ka̱t.
9 Oɗyanəm ri nkəkam chit uza̱ nyi ka̱t,
kang izwál fa á na kpa uza̱ nyi ka̱t.
10 Ǹrup ká̱ ishi oIsa̱rila nyám nnàp ka̱ apal ishi oza̱,
káp ká̱ nnà te oza̱ yang ká̱ nle atak áYawe, Inan oza̱,
kang ka̱ ashe nkpaktak iya̱m va̱ ta̱ te, oza̱ mwo na ka̱t kpa.
11 Te uEfərayim wa ìləkpar ìpərəkpərək, i rəng nnap ka̱t,
oza̱ wór aMasar, kang oza̱ ga aAshur.
12 Nva̱ oza̱ i yà kà̱ ngga te, mi màng ìcha mi ka̱ apal oza̱,
mi dapchi oza̱ i vàng wa ìnyil ìga apaɓur,
Mi nyám ntàn oza̱ ka̱kul iya̱m iɓá̱ngɓa̱ng iva̱ oza̱ nəm.
13 Álak ká̱ oza̱ chit, ka̱kul oza̱ chəng atak mi,
nzhì nà nji oza̱ ka̱kul oza̱ fa iya̱mkak ká̱ mi.
N ɗom pa̱ ń fa ká̱ oza̱, ká̱ nnà te oza̱ náp akwam ka̱ apal mi.
14 Oza̱ yə́ng á mi ká̱ ìgwak pa̱ ìzəng ka̱t,
nva̱ oza̱ i yə́ng ka̱ apal alyer oza̱ á.
Oza̱ i chal ìchər oza̱, ka̱kul ìpirkur ká̱ ndəng ìba̱ngba̱ng ǹsámsàm ,
oza̱ ɓut ishi oza̱ le re atak mi.
15 Mmami nà n ɗyang iya̱m óza̱ kang n kam ìgwal óza̱,
ká̱ nnà te, oza̱ ran iya̱m iɓá̱ngɓa̱ng ka̱ apal ishi mi.
16 Oza̱ ga̱ɓa̱n asəm á mi,
oza̱ yà chit wa ìjang ìga nlàm atak.
Onəm oga mpyal oza̱ i tàk ka̱ atak ndokchi,
ka̱kul nvyap ngga aɓələm oza̱.
Oza̱ i təm iya̱m iga nnáp avyal,
kà̱ mbin aMasar.