8
UYesu uponzhi nnap nshi iya̱m awop Înan mpipye
1 Iya̱m va̱ pa̱ wat pa̱ mmayi ka̱ nləla te, nna ta̱. Pa̱ nna i ya ká̱ uponzhi onəm oga mpyal awop uva ka̱ ntəm ka̱wo ari itok iponzhi Inan ka̱ ashe apaɓur.
2 Uza̱ ka̱ nnəm inok ka̱ ashe atak yə́ryər aga Nzhi Inan nchumchum. Atak va aghal aga awa aga nnandər va unəm a ka̱ ka̱t. UPonzhi Inan a ka̱.
3 Nza̱ uponzhi onəm oga mpyal awop nggo te, ma kyer na pa̱ uza̱ a yichi imwa ká̱ iya̱m ipápà iga nshi. Ka̱kul nva̱ ta te, nkpak pa̱ uza̱ a yà ká̱ iya̱m va uza̱ i yichi.
4 Ka̱ yà pa̱ uza̱ ka̱ apambin te, uza̱ ka̱ yà unəm uga nshi iya̱m awop ka̱t. Ka̱kul onəm oma yà nyal va i yichi imwa va̱ nnap-mpakpak aMusa là pa̱ ma na a.
5 Oza̱ ka̱ nnəm inok ka̱ ashe atak yə́ryər va fa izər na pa mwan ka̱ aga ashe apaɓur. A sat wa ala̱ka̱n aga apaɓur na pa kùk. Ka̱kul uMusa ɓan nka aghal aga awa va̱ ta te, Inan là á na pa̱, <<Nakshi pa̱ dakdak na u ka̱ a mal izər ka̱ nkpaktak iya̱m va ma nyám aɓu ka̱ apal aɓam a.>>
6 Inok va̱ uYesu Kəristi ya te, a ɓyen ji imatmat ji pa̱ gənggəng. Ka̱kul nsar nnap-nlà va̱ uza̱ pa anung ka̱ sat unəm uga ishimshe te, a dar mmatmat dar. Ka̱kul ma pak ka̱ atak nsar nnap-nlà va ɓyen ji mmatmat ji a.
7 Ka̱ ya pa̱ nsar nnap-nlà mmatmat va̱ ta ga̱n ka̱ atak ro ka̱ pa̱ ɗa̱p ka̱t te, ma ka̱ ɗak ka̱ mpəpar ka̱t.
8 Inan ya mpat oza̱ ya nva̱ uza̱ là pa̱,
<<Ilum ya ka̱ mɓa mmami uPonzhi Inan n là.
Ilum va mi sar nnap-nlà mpipye ka̱ onəm oga aIsa̱rila ka̱ akum ìjili aYahuda.
9 I yà wa mmatmat nva ka̱ n sar ka̱ okəka oza̱ ka̱t.
Nna ka̱ ashe nra va̱ n dap oza̱ ndapdap ka̱ awo mi, na ń fa ka̱ oza̱ ka̱ ashe mbin aMasar a.
Ka̱kul oza̱ tong pa̱ kwák kpak iya̱m va̱ n sar ká̱ ishimshe mi ka̱ oza̱ ka̱t.
A nak te, n ga̱ɓa̱n asəm n na ôza̱.
Mmami uPonzhi Inan n là.
10 Nsar nnap-nlà va ta̱ mi sar ka̱ oIsa̱rila.
Mmami uPonzhi Inan ka̱ nla pa̱ nra va̱ ta i ɓa i chu te, mi nak oga nnap-mpakpak mi ka̱ ashe nrəng nnap oza̱.
Mi lir oza̱ ka̱ anung igwák oza̱.
Mi ta̱l Inan oza̱.
Oza̱ nnyi te, i tong onəm mi.
11 Oza̱ i təm ka̱ nɗyang iya̱m ówan oza̱ oga atak azəngtəng ka̱ oza̱ lap ka̱t.
I nak te, unəm ro i təm ka̱ nla ûwan wò pa̱, <Nyi Inan> ka̱t.
Ka̱kul nkpaktak oza̱ i nyi mi nyi.
I ɓan ká̱ unəm va yen ji har i ga i chu unəm va ji pa̱ kpaktak.
12 Ka̱kul mi nyám nrwa ìgwak ôza̱ ka̱ apal ishi ina oza̱.
Mi rəng nnap-mɓá̱ngɓa̱ng oza̱ ka̱t.>>
13 Ka̱ atak ngwór nsar nnap-nlà va̱ ta̱ pa̱ mpipye te, ya uza̱ nak ngga ngəshi ta̱l ngbakgbak chit. Iya̱m va pa̱ kpaktak inunok ka̱ nkùr kan ka̱ ngbak kpa te, i gba̱ng nva̱n ka̱t te, mí ya lap ka̱t. I watar watar.