Nlir nnap-nlà aBulus ônəm Inan oga
AAfisa
1
1 Nlir nnap-nlà va̱ ta̱ fa ka̱ atak aBulus va ka̱ atak nɗom Inan kang uza̱ ta̱l unəm uga nre aYesu kəristi a. A fa na a ga atak wo onəm Inan oga Afisa. Onəm va zhing ka̱ nna nnandər ká̱ uYesu Kəristi pa̱ makmak a.
2 Re nnap-nnəna̱n ka̱ nra ìgwak aPo yi Inan ká̱ uPonzhi yi uYesu Kəristi a təm nzəng ká̱ wo.
Nnap-nnəna̱n ngga aRuhu ka̱ ashe aKəristi
3 Re ma na aɗəngchi Înan va uwa kpa Inan ká̱ uPo aPonzhi yi uYesu Kəristi a. Uza̱ nak nnap nnəna̱n ngga aruhu ayi ka̱ nza̱ apir nnap-nnəna̱n ngga apaɓur nggo chit ka̱ atak aKəristi.
4 A mà dakdak wa nva uza̱ ka̱ yak yi matmat ya na ma nəm apambin chit ka̱t, na i tong onəm nəna̱n ka̱ mpipyal. Onəm va ya ka̱ mpat ro ka̱ pa̱ ɗa̱p ka̱t.
5 Ka̱kul mma̱n na te, uza̱ nak chit təm pa̱ i tong ovan wò ka̱ atak áYesu kəristi a mà dakdak ka̱ nɗuɗom.
6 Na i na aɗəngchi ichumchum nnap nnəna̱n nəna̱n va uza̱ na yi ka̱ atak ayen wò uma̱nma̱n a. Uza̱ nəm mɓál awo ka̱ ka̱t, uza̱ na yi ká̱ imwa.
7 Ka̱ atak ikú aYiyen na kan i ya nka̱mshi ka̱ nyar nnap-mɓá̱ngɓa̱ng va mà dakdak ka̱ nnap nnəna̱n Inan va mak pa̱ gənggəng.
8 Nnap-nnəna̱n va uza̱ zuk ayi na mí zuk ka̱ anung aba̱ng.
9 Ka̱kul ka̱ aghan amakmak ka̱ nnyi uza̱ nyám nnap mbwambwam wò ayi a mà dakdak ka̱ nɗom nnəm iya̱m va igugwak ɗom wa nva uza̱ ɗom nnənəm ka̱ atak aKəristi.
10 Iya̱m va̱ ta̱ pa̱ kpaktak Inan ɗa̱mshi na alulum a ɓa chu te, uza̱ a nak uKəristi a yà ishi ka̱ apal ishi iya̱m pa̱ kpaktak ka̱ ashe apaɓur ka̱ apambin.
11 Ka̱ ashishe na kan i tong onəm oga ngwur *akup Inan. A təm chit pa mà dakdak ka̱ nɗom nnəm iya̱m va uza̱ ɗom nnənəm. Uza̱ va i nəm nkpaktak iya̱m va mà ka̱ na a.
12 Mmayi va̱ i ɓan nnak ìgwak ká̱ uKəristi mpyal te, ma nak chit təm kan ma kyep yi chit kpa pa̱ i təm ntəm ngga nna aɗəngchi ichumchum chumchum.
13 Ka̱ nva̱ngva̱ ka̱ o fe nnap-nlà ngga nnandər va̱ nnap-nlà Inan ngga nchang nfe ngga nka̱mshi wo te, ma kun ishi ká̱ wo ka̱ ashe aKəristi chit na kpa. Kang ka̱ nva̱ngva̱ o na nnandər ká̱ uKəristi te, ma ɓàp wo ka̱ aRuhu-Nəna̱n va ma ka̱ sar nnap-nləla chit a.
14 ARuhu va̱ ta nna nak chit təm pa̱ ngwur iya̱mkup va̱ i ga ngwuwur te, a təm chit wa nnà ta har i ga i chu ilum va̱ i wur ka̱. Na a sat iya̱m iga nna aɗəngchi ichumchum chumchum.
Aduwa ka̱kul aghan Inan ka̱ nnyi
15 Ka̱kul nva̱ ta te, ka̱ nfe nnap nna nnandər wo ká̱ uPonzhi yi uYesu Kəristi na n fe byet, nzəng ka̱ nfe nnap apir mma̱n va̱ mmawó ka̱ mma̱n nkpaktak onəm Inan te,
16 nna n kap chit ka̱ nna aɗəngchi Înan ka̱kul wo ka̱t, nzəng ka̱ nrəng wo ka̱ ashe aduwa mi.
17 Mi far pa̱ Inan va uwa Inan aPonzhi yi uYesu Kəristi, uPon uga ichumchum te, uza̱ a na aRuhu wò awo aga aghan ká̱ aga nnyam ipir nnap.
18 Mmami ka̱ nchal pa̱ anung igwák wo a tul na o nyi apir nnak ìgwak va̱ Inan wór wo ka̱kukul, na o nyi mmak iya̱m kukup iga ichumchum va ka̱kul onənəm.
19 Na o nyi mmak ichumchum chumchum va iro yà wanta lap ka̱t kpa a. Ichumchum va ka̱ nnəm inok ka̱ ashe yi onəm va i na nnandər na ka̱ na a. Ichumchum va̱ ta̱ a mal dakdak ka̱ nkam Inan mmakmak
20 va uza̱ nak nəm inok ka̱ ashe aKəristi ká̱ ilum va̱ uza̱ won ka̱ na ka̱ atak ikú uza̱ na atak ntəm á na ka̱wo ari wò ka̱ ashe apaɓur.
21 UKəristi təm ka̱ ta ka̱ nnəm iponzhi ka̱ apal ishi nkpaktak nnap iponzhi, ká̱ ichumchum, ká̱ ìkàm, ka̱ ngək. Aɗiɗin na ji nza̱ aɗin nggo va mí wór pa̱ kpaktak ka̱ ashe nra va̱ ta̱ ka̱ nra ngga mɓa.
22 Inan nak nkpaktak iya̱m chit ka̱ avəng ichumchum chumchum. Uza̱ yichi na îkilisiya na uza̱ a ta̱l ishi ka̱ apal ishi iya̱m pa̱ kpaktak.
23 Ikilisiya iyà izəzər, nkúr anung nkpaktak inok anəm va uwa ká̱ ishi wò nkùr nnap pa̱ kpaktak a.