32
Ǹyə́ng ikú ka̱kul aFirona
1 Kà̱ nra ngga nggəshi ka̱ ape aga agba̱pchi ama̱n pa̱ parəm, kà̱ ìzun iga igba̱pchi ama̱n pa̱ parəm te, uYawe là nnap ká̱ mi pa̱,
2 <<Á ya anəm, yə́ng ikú ka̱kul aFirona uponzhi uga aMasar, là á na pa̱,
<< <U nak ishi ɓu wa ìlir ka̱ ashe oga mbín,
mmaɓu wa ìzhantar ka̱ ashe ìwá,
u fa ka̱ ashe oga awang ɓu,
u kulung ndəng ka̱ oga ashar ɓu,
kang u vyap oga awang oza̱.
3 << <Ka̱kul nva̱ ta te, uNəm uga nzhi uYawe là pa̱,
<< <Mi nak nggatək onəm i màng ìcha mi ka̱ apal ɓu,
kang oza̱ i dapchi ɓu ka̱ ashe ìcha mi.
4 Kang mi màng ɓu ka̱ apambin, ka̱ apal nzam mi màng ɓu.
mi nak nkpaktak inyil iga agbagba apaɓur i təm ka̱ apal ɓu,
kang mi nak nkpaktak izhé iga anyin i rí ka̱ izər ɓu.
5 Mi pəl ìzhe ɓu ka̱ apal oga aɓam,
mi yə́l oga nwangsang ka̱ akúm ɓu.
6 Mi zuk nchə̀r ɓu kà̱ mbin i nang ka̱ apal oga aɓam,
kang i yə́l oga awang.
7 Awalang va̱ mi tutur ɓu, te mi gún apaɓur,
kang mi nak izhán i kpa̱r,
mi gún alum ka̱ ìlulu,
kang ape nnyi te i ghan atak ka̱t.
8 Nkpaktak iya̱m iga nnghan atak iga apaɓur mi nak i kpa̱r ka̱ apal ɓu,
kang mi nak atak akpá̱rkpà̱r ka̱ apambin ɓu, uNəm uga nzhi uYawe á là.
9 Mi lak igwák ônəm pa̱ makmak, awalang
va̱ m ɓa ka̱ nzhì ka̱ apal ɓu ka̱ ashe oga mbín,
ka̱ ashe oga mbín va u nyi ka̱t.
10 Mi nak onəm pa̱ makmak i tán,
kang oponzhi oza̱ i tán ka̱ ayər ka̱kul ɓu,
ka̱ awalang va̱ n tur ndokchi mi kà̱ mpyal oza̱.
Oza̱ i tán ka̱ nza̱ awalang nggo,
udanggo ka̱kul irirì wò,
kà̱ nra ngga nru ɓu.
11 << <Ka̱kul uNəm uga nzhi uYawe là pa̱,
<< <Ndokchi aponzhi oga aBabel i ga nfə́r ka̱ apal ɓu.
12 Mi nak nggatək onəm ɓu i tak ka̱ atak ndokchi onəm kamkam,
nkpaktak oza̱ oga nnəm ayər ka̱ ashe mbín.
Oza̱ i nak nrup ká̱ ishi aMasar i sat atak lakchi,
kang nkpaktak nggatək onəm ɓu i zhì.
13 Mi zhì nkpaktak iya̱m nkəkang va̱ ka̱ anung oga awang,
ashar anəm ka̱t te aji iya̱m nkang,
ro yà va i kulung ndəng lap ka̱t.
14 Mi nak ndəng oza̱ i yà pa̱ zara̱ra̱,
mi nak oga awang oza̱ i nang wa mmì mpyet,
mmami uNəm uga nzhi uYawe n, là.
15 Awalang va̱ mi nak mbin ngga aMasar i təm agúng,
kang awalang va̱ mi kap mbin va̱ ta ká̱ nkpaktak iya̱m
va̱ yə́l ka̱ ashishe,
kà̱ ilum va̱ mi gbá̱ng nkpaktak onəm va̱ ka̱ shishe,
te oza̱ i nyi pa̱ mmami na uYawe.>
16 <<Nnap nshì ikú va̱ nnà ta̱, ovan ochar mbín i shì ka̱ apal aMasar, ká̱ nkpaktak nggatəkgatək, oza̱ i shì á na. Mmami, uNəm uga nzhi uYawe, n là.>>
Mí nəm igwan ká̱ oga aMasar
17 Kà̱ nra ngga ngba̱pchi ama̱n pa̱ tukun ngga ape, kà̱ ìzun iga igba̱pchi ama̱n pa̱ parəm te uYawe là nnap ká̱ mi pa̱,
18 <<Á ya anəm, yə́ng ka̱kul nggatək oga aMasar. Wa da̱n oza̱ nzəng ká̱ ovan ochar oga mbín nkamkam, kà̱ mbin ngga avəng, ká̱ oro va̱ kwangtal ga chit ka̱ ashe awap á.
19 Là ôza̱ pa̱, <Ó ɓyen ó ji uda yà? Ó kwangtal ó ra ka̱ onəm oga achè amulur.>
20 Oza̱ i tak ka̱ ìshimshe oro va̱ mmá gbá̱ng ká̱ ndokchi. Ka̱kul mmá tutur ndokchi chit ka̱kukul. Mmá wur na ká̱ nkpaktak nggatəkgatək.
21 Okamkam oga mpyal ìkum i là nnap á na ka̱ ashe aShəwol nzəng ká̱ ovəngva̱ ka̱m ishishi pa̱, <Oza̱ táng mbin chit, oza̱ ra pa̱ kwák ká̱ onəm oga achè amulur, ova̱ mmá gbá̱ng ká̱ ndokchi.>
22 <<UAshur uwa ka̱ ta, ká̱ nkpaktak nggatəkgatək, oga awap nggatəkgatək va̱ mmá gbá̱ng ká̱ ndokchi gáng na.
23 Oga awap oza̱ təm kà̱ nkur aShəwol. Kang nkpaktak nggatəkgatək gáng awuwap. Mmá gbá̱ng nkpaktak oza̱ ká̱ ndokchi. Òmà nak ayər ônəm ka̱ apambin.>>
24 <<AElam uwa ka̱ ta, kang nkpaktak nggatəkgatek gáng awuwap. Mmá gbá̱ng nkpaktak oza̱ ká̱ ndokchi. Oza̱ kwangtal ga ka̱ ashe awap ká̱ achè amulur, òmà nak ayər ônəm ka̱ apambin. Kang oza̱ yar ìwuswa nzəng ká̱ oro va̱ kwangtal ga chit ka̱ ashe awap á.
25 Oza̱ nəm alyér á na ka̱ ashe onəm okukú ká̱ nkpaktak nggatəkgatək, nkpaktak oga awuwap gáng na, nkpaktak oza̱ onəm oga achè amulur, ova mmá gbá̱ng ká̱ ndokchi. Oza̱ ka̱ yà i nak ayər ônəm ka̱ apambin. Ǹyangmata̱ te oza̱ kà̱ ǹyar ìwuswa nzəng ká̱ oro va̱ kwangtal ga chit ka̱ ashe awap, mmá ɓut oza̱ ka̱ ashe oro va̱ mmá gbá̱ng.
26 <<Mbín aMeshek ka̱ aTubal òma ka̱ ta, ká̱ nkpaktak nggatək oza̱, nkpaktak oga awap oza̱ gáng oza̱. Nkpaktak oza̱ onəm oga achè amulur, ova mmá gbá̱ng ka̱ ndokchi, oza̱ va ka̱ nak ayər ônəm ka̱ apambin.
27 Oza̱ ra dát ká̱ onəm oga nnyi nlung ìkum omatmat ka̱t, ova táng ga ashe aShəwol ká̱ iya̱m ìkum oza̱, ova ra ká̱ oga ndokchi oza̱ ka̱ avəng oga ishi oza̱, nggwanggwang oza̱ iya̱m iga nkuk akup oza̱. Onəm oga nnyi nlung ìkum va̱ ta̱ nak ayər ônəm ka̱ apambin.
28 <<Kang mí chwan ɓu, áMasar, ɓu ra ka̱ ashe onəm oga achè amulur, ká̱ ovəngva̱ mmá gbá̱ng ká̱ ndokchi.
29 <<UEdom uwa ka̱ ta, ká̱ oponzhi wò, ká̱ nkpaktak onəm oga mpipyal, ova ka̱ yà ká̱ nkpaktak ìkam oza̱, i ra ká̱ oro va̱ mmá gbá̱ng ká̱ ndokchi, ká̱ onəm oga achè amulur, ovəngva̱ táng chit ka̱ ashe awap.
30 <<Nkpaktak onəm oga mpyal oga mpal òma ka̱ ta, ká̱ nkpaktak onəm oga aSidon. Oza̱ táng chit ka̱ ashe ìwuswa ká̱ ovəngva̱ mmá gbá̱ng, ka̱kul nkpaktak ayər va̱ oza̱ nak ka̱ atak ìkam oza̱. Ǹyangmata̱ te, oza̱ ra onəm oga achè amulur ká̱ oro va̱ mmá gbá̱ng ká̱ ndokchi. Kang oza̱ yar ìwuswa nzəng ká̱ oro va̱ táng chit ka̱ ashe awap.
31 <<Awalang va̱ uFirona i ya oza̱ te ìgugwak i ra ka̱kul nggatəkgatək. UFirona ká̱ nkpaktak onəm ìkum wò, mmá gbá̱ng ká̱ ndokchi, uNəm uga nzhi uYawe à là.
32 Káp ká̱ nva̱ pa̱ n nak uza̱ ná ayər ónəm ka̱ apambin, ká̱ nnà te uza̱ i ra ká̱ onəm oga achè amulur, ká̱ ovəngva̱ mmá gbá̱ng ká̱ ndokchi, uFirona ká̱ nkpaktak nggatəkgatək, uNəm uga nzhi uYawe à là.>>