19
Ǹyə́ng ikú ka̱kul onəm oga mpyal aIsa̱rila
1 <<Shì ìpyang ka̱kul onəm oga mpyal oIsa̱rila.
2 Là pa̱,
<< <Unang ɓu ìlir ìchar ìkamkam
ka̱ ashe oga ilìr.
Uza̱ ra kà̱ ishimshe ivan ilìr
kang i nak ishi ká̱ ivan wò.
3 Uza̱ kang ìzəngtəng ka̱ ashe ovan wò,
á nyáng iya ìlir ìnunggwan.
Te á ɗyáng nkpán ìzhe,
kang à ri unəmləbər.
4 Oga mbín fe izəzər
kang mmá kpán na ka̱ ashe ache oza̱.
Oza̱ dàp na ká̱ nzwar
ga ká̱ kà̱ mbin aMasar.
5 Nva̱ngva̱ ìnang ìlir va̱ ta ya pa̱ ò lòk ka̱ anung mwang
nnak ìgwak wò ru chit,
te uza̱ yar ìro kà̱ɗi ka̱ ashe ovan wò,
uza̱ kang na nyáng ìya ìlir ìnunggwan.
6 Te ìya ìlir va̱ ta ga̱ɓa̱n kà̱ ishimshe oga ilìr,
uza̱ nyáng ìya ìlir ìnunggwan.
Uza̱ ɗyáng nkpán ìzhe,
uza̱ ri unəmləbər.
7 Uza̱ vyap oga atak mbwam oza̱ akamkam.
Uza̱ nak oga itong oza̱ təm agúng.
Mbin va̱ ta ka̱ iya̱m va̱ ka̱ ashishe
fe aɗuɗum te ayər nəm oza̱.
8 Te mbín ɓa ka̱ apəpal,
kà̱ nza̱ ichwór nggo.
Oza̱ mang ìcha á na,
mmá kpán na ka̱ ashe ache oza̱.
9 Oza̱ kpán na ká̱ ayok, oza̱ dàp na ká̱ nzwar,
kang à ɓa ka̱ na ûPonzhi oga aBabel.
Oza̱ nak na ka̱ ashe nzhi ìkan,
le kang mmá fe aɗuɗum
ka̱ apal oga aɓam aIsa̱rila lap ka̱t.
10 Unang ɓu wa ìba̱ngba̱ng ka̱ ashe ìram ìba̱ngba̱ng ɓu,
mmá ɓál ka̱ anung ndəng,
á wár awár kang à chak igóng,
ka̱kul ndəng kúr na kúr.
11 Oga igugong kám
á mal ìdari aponzhi mal.
Á rup ɓa ga
ka̱ apal nkpaktak igóng.
Mmá ya na ka̱ atak ìrurup,
ka̱ atak ǹyə́l igugong.
12 Te mmá tutur na ka̱ ashe nlak ìgwak,
mmá mandar ka̱ mbin.
Ayə́r aga asa̱l awu alum wom na,
mmá tok oga awuwar.
Igugong ikamkam wom,
apər pwák na.
13 Kang ǹyangmata̱ mmá ɓál ka̱ ashe nzam,
kà̱ mbin nwomwom va yà ká̱ ndəng ka̱t.
14 Te apər fa ká̱ izər igugong,
kang à ri awuwar.
Ìgong ìkamkam ìro re ka̱ izəzər
iva mal ìdari àponzhi ka̱t.>
Nshì ìpyang ta̱, á yà nnap-nshì ngga aɗor chit.>>