2
aMowap
1 UYawe là pa̱,
<<aMowap nəm nnap mɓá̱ngɓa̱ng chit dədan,
nkpak pa̱ ń nyám ntàn á na.
Ka̱kul uza̱ shì akúp áponzhi uga aEdom nyáng nchwang
2 Mi re apər ka̱ aMowap,
i pwák akamsəlang aKeriyot.
Onəm oga aMowap i kú ka̱ ashe nzwar nnap nnəm,
kà̱ ìlum va̱ onəm oga nlung ìkum i bà ká̱ mɓúr agbəshi.
3 Mi dərkən uponzhi oza̱,
kang mi gbá̱ng nkpaktak ovan oponzhi nzəng ká̱ na.>>
UYawe à là.
AYahudi
4 Iya̱m va ta̱ uYawe là,
<<Onəm oga aYahudi nəm nnap mɓá̱ngɓa̱ng chit dədan.
Ka̱kul oza̱ yang nnap mpakpak mi, oza̱ kpak nnap nla mi ka̱t,
oza̱ wop ichər va okəka oza̱ ká̱ wop,
kang à nak oza̱ re asa̱l aga nnandər.
5 Mi re ǹre ká̱ apər áYahudi,
na á pwák oga akamsəlang aUrushelima pa̱ chatchat.>>
AKwali Inan ka̱ apal OIsa̱rila
6 UYawe là pa̱,
<<Onəm oga aIsa̱rila nəm nnap mɓá̱ngɓa̱ng chit dədan,
mi re oza̱ pa ka̱t, nkpak pa̱ ń nyám ntàn óza̱.
Ka̱kul oza̱ yáp mbwai ká̱ onəm onəna̱n.
Onəm oga nkun nnyi te, oza̱ yáp ká̱ oza̱ á kúr mbwai akwàp ka̱t.
7 Oza̱ tòng ishi onəm oga nkun
wa mɓwang mbin
Oza̱ bwam nnandər onəm va mmá kà̱r.
UYen ká̱ upo wò i ga atak nra kà̱ uyen ɓyen uzəngtəng,
wa nnà ta oza̱ vyap aɗin mi ayə́ryər.
8 Ka̱ atak awop oza̱ te oza̱ i ra ka̱ apal ìlukwan
va oza̱ ka̱m ndatdat ka̱ anung akat va̱ oza̱ ná.
Ka̱ ashe nzhi inan oza̱ te,
oza̱ wa ndəng ìba̱ngba̱ng ǹsámsàm va mmá mwa nkpán ká̱.
9 Ká̱ nnà te, n zhì oAmori ka̱ mpyal oza̱,
káp ka̱ nva̱ pa̱ oza̱ rup wa ichir,
kang oza̱ kam wa akún asida,
n zhì awar oza̱ ka̱ apal
ká̱ alə̀ng oza̱ ka̱ akum le.
10 Mmami na kpa n fa ká̱ wo ka̱ ashe mbin aMasar,
kang n lə́p mpyal a wo ka̱ ashe ǹzam izun ìsəm pa̱ ineɗing
na o wur iya̱m akúp ká̱ mbin aAmori.
11 N yak ovan wo oro tong onəm oga nlà ìchu Inan,
oro te oNaziri.
Mwote pa ka̱t ɗak ɓo oga aIsa̱rila?>>
UYawe à ɓəp.
12 <<Te o nak oNaziri wa ncè kang
o dáng onəm oga nlà ìchu Inan kà̱ nləlà.
13 Dər, ǹyangmata̱ mi ga nkà̱r wo
wa nva̱ mí byachi akeke ipəri ká̱ nsar ikur.
14 Onəm oga nchəng ashar ka̱ ashe wo i zhì.
Onəm okankam ka̱ ashe wo i tong nku.
Onəm oga nlung ìkum i nyi nka̱mshi ishi oza̱ ka̱t.
15 Ovan oga ijang i yà ká̱ ntong ka̱t.
Onəm oga nchəng ashar ka̱ ashe oza̱ i yà ká̱ mbar ka̱t,
kang onəm oga ipəri ìkum i ka̱mshi ishi oza̱ ka̱t kpa.
16 Kà̱ ìlum va̱ ta onəm oga nkam ìgwak
i chəng ká̱ ìjili ìbwat ka̱kul irirì oza̱,>>
uYawe à là.