2 CORINTIOS
Introducción:
Na penájeca San Pablo huacára'aca najló marí puráca'aloji yucuna marí:
Júpimi San Pablo i'ijnari apú pajimila nacojé, apú pajimila nacojé que. Tupana puráca'alo yucuna i'imacana nacú ri'ijnaqué. Ehuá riphaca pajimila Corinto ejo i'imacá. Re riyuró mequetana, ri'imacáloje Jesucristo yucuna najló rehuá penaje. Ri'imá riyucuna najló. Raú ne'iyajena queño'oñó Jesucristo ja'apiyá jema'acana. Necá penájemina rehuíña'ata palá Tupana puráca'alo nacú, nema'acáloje ra'apiyá penaje. Rehuíña'ata ne'emacá ejomi ra'apaña necá, ri'imacáloje riyucuna ajopánajlo penaje. E caja ehuaja ajopana piño i'imaño rehuá. Necá caja jehuíña'ataqueño necá Tupana nacú. E'iyonaja napechu queja nehuíña'atajica necá. Majopeja nemájica. Necá quemaño marí que nanacuhuá: “Jesucristo huacára'acarena naquiyana huecá” que. Naca'átaque ne'iyajé, napechu i'imacá piyá palá Pablo nacú, ripuráca'alo nacú hua'até. Aú caja napechu i'imá Pablo nacú: “Majopéjari japi ricá.” Caja uncá nephala ra'apí raú. Marí que napechu i'imacale rinacu, rihuacára'a najló puráca'aloji. Ripura'ó richayo, nahue'epícaloje quehuácaca Jesucristo huacára'acarena naquiyana huani ri'imacá. Rihuata nahue'epica Tupana puráca'alo ricá ra'apátacare najló i'imacá. Uncá ripechu queja calé rimacá najló nacaje nacú i'imacá. Uncá rihuátala ajopana ina'uqué apichátaca napechu quehuácaje puráca'aloji liyá. Iqui'i rihuátaca necá. Rihuata ne'ejnataca napéchuhua quehuácaje puráca'aloji nacú. Aú calé rihuacára'a najló marí puráca'aloji.
1
Jesucristo ja'apiyá jema'ajeño i'imaño Corinto e i'imacá. Najló San Pablo huacára'ari marí puráca'aloji:
1 Pablo nucá. Tupana a'arí nucá Jesucristo huacára'acarena naquiyana penaje. Caja queja Tupana huátaca nu'umacá. Nucá, Timoteo hua'até huacára'año ijló marí puráca'aloji pajimila Corinto ejo. Jesucristo ja'apiyá jema'ajeri caja Timoteo. Jesucristo ja'apiyá jema'ajeño caja icá. Tupana a'acárena rile'ejena ina'uqué penájena icá. Piyuque Tupana le'ejena ina'uqué, Acaya te'eré ehuá i'imacáñojlo huahuacára'a marí puráca'aloji.
2 Tupana Huara'apá. Nuhuata i'imacá ripalamane, Hue'emacana Jesucristo palamane hua'até. Nuhuata caja Tupana la'acá ipechu palá. Ñaqué caja nuhuátaca Jesucristo la'acá ipechu palá.
Pablo amaca chapú caje yajhué yucuna marí:
3 Palani huani Tupana. Hue'emacana Jesucristo jara'apá ricá. Huara'apá caja ricá. Rihue'epí huamu'ují. Hua'ajini ra'apátaca huapechu ujhuí caje liyá.
4 Tupana pala'atari huapechu huamaca aú que'iyapé chapú caje yajhué. Marí que rila'acá huecá palá, huapala'atácaloje ajopana pechu ñaqué caja penaje. Ripala'ataca huapechu i'imacá que caja huapala'ataca napechu chapú caje yajhué amácana liyá.
5 Jesucristo pechu chuhuá hue'emacale, huamaca cajrú chapú caje yajhué. Riloco'opáneje caja ripala'atá huapechu.
6-7 Nala'á huecá chapú, hua'apátacale Tupana puráca'alo ajopánajlo, ajopánajlo que. Ijló caja hue'emá riyucuna i'imacá. Ra'apiyá jema'acana aú i'imaó capichácajo liyá. Riyucuna i'imacana jimaje nala'á huecá chapú. Tupana pala'atari huapechu palá chapú caje yajhué huamácare liyá. Apala ijña'á chapú caje yajhué panacu huajña'acá panacu que caja. Ripala'ataca huapechu riliyá, que caja ripala'atájica ipechu riliyá. Marí que ri'imacale ijló, huahue'epí palá i'imajica.
8 Nojena, huahuata ihue'epica meque íqui'ica huamaca chapú caje yajhué Asia te'eré ehuá. Cajrú nala'acá huecá chapú rehuá i'imacá. Caja uncá meño'ojó huajña'alá panacu ri'imacá. Caja huapechu i'imá huanacuhuá: “¿Ají caje aú ja chi huacapichajo?”
9 Ina'uqué nenoca queja huahue'epica huanacuhuá raú. Marí que ri'imacá huajló, Tupana chojeja calé huapechu i'imacáloje caphí penaje. Ricá hue'epiri piyuque caja taca'acaño macápo'otacana. Richojeja calé huapechu i'imá caphí. Uncá huachojó calé huapechu i'imá caphí.
10 Tupana i'imatari huecá naliyá, nenoca piyá huecá. Ri'imataje piño huecá ñaqué caja. Richojé huapechu i'imá caphí, ri'imatácaloje piño huecá riliyá penaje.
11 Ipura'ó Tupana hua'até huanacu. Cajrú ina'uqué pura'ajico ee Tupana hua'até huanacu, cajrú caja ina'uqué quemájeño Tupánajlo “Palá pila'acá huecá” que. Marí que nemájica rijló, rila'ajica aú huecá palá.
Uncá Pablo i'ijnalá Corinto ejo nachaje yucuna marí:
12 Palá huani huapechu huanacuhuá, huahue'epícale huala'acá palá huani ina'uqué nacú marí eja'ahuá chu. Hue'emaqué ijhua'até huacajé, palá huani huala'ajica e'iyohuá. Tupana a'aqueri huañaté, hue'emacáloje ijhua'até palá huani raú penaje. Uncá huecó calé huala'á icá palá. Tupana palamane aú palá huala'acá icá.
13 Huahuacára'a ijló puráca'aloji lana'aquéjami me'etení, ipura'acóloje rijhua'até penaje, ihue'epícaloje ricá penaje. Uncá me'echuje calé huapuráca'alo huahuacára'acare ijló. Nuhuata jema'acá ricá palá.
14 Caja ihue'epí huecá huejápaja. Jesucristo iphájica majó huacajé, ipechu i'imajé pu'ují huanacu, huapechu i'imacá inacu que caja.
15 Nuhue'epí pu'ují huapechu panacuhuácaca. Aú calé nuhuata ichaje i'ijnacana, ipechu i'imacáloje pu'ují raú penaje. Iyamá pe notá'acajla ichaje i'ijnacana i'imacá.
16 Nupechu nacú ri'imá ichaje i'ijnacana Macedonia te'eré ehuá ja'apácana. Eyá nunacuhuá nuhuata icá ehuá ja'apácana. Raú icá a'acajla nojló nacaje, nu'ujnacáloje piño Judea te'eré ejo penaje.
17 Marí que nuhuátaca ichaje i'ijnacana. Apala marí que ipechu nunacu: “Uncá ñaqué calé ripechu. Majopeja ripajlaca,” que ca'ajná ipechu nunacu. Uncá iyamá chuhuá calé nupechu, numacáloje “nu'ujnajé” que, “uncá nu'ujnalaje” que ca'ajná. Necá, uncá jema'alaño Tupana ja'apiyá, iyamá chuhuá napechu. Uncá ñaqué calé nupechu.
18 Tupana hue'epiri méqueca huapechu nacú ri'imacá. Rihue'epí uncá huemalá iyamá chuhuá ricaja caja nacú.
19 Uncá Tupana I'irí, Jesucristo, quemalá iyamá chuhuá ricaja caja nacú. Quehuaca huani Jesucristo quemacá pajluhuaja puráca'aloji chuhuá. Silvano, Timoteo, nucá, quele i'imaño riyucuna ijló i'imacá.
20 Jesucristo palamane aú Tupana a'arí huajló nacaje, Tupana quemacare nacú ina'uquejlo i'imacá. Tupana quemari huanacu i'imacá, rila'acáloje huecá palá penaje. Jesucristo palamane aú ri'imá ñaqué huajló. Palá huani Tupana la'acá huecá. Hue'emacá aú riyucuna ajopánajlo, hue'emá caja palá Jesucristo la'acare huecá yucuna najló.
21 Tupana la'arí huapechu caphí. Rila'á caja ipechu caphí Jesucristo chojé. Ra'á caja huecá rile'ejena ina'uqué penaje ijhua'até.
22 Tupana a'arí huajló Ripechu huená que'ená penaje. Raú iná hue'epí rile'ejénaca huecá. Raú caja iná hue'epí ra'ajica piño huajló piyuque nacaje yurícaro huajlojé penaje.
23 Uncá jo'ó nu'ujnalá ichaje Corinto ejo nupechu nacú ri'imacá que. Tupana hue'epiri nájeca uncá nu'ujnalá ichaje. Uncá nuhuátala inaquiyana huajácana pu'uhuaré nala'acare chona. Aú calé uncá jo'ó nu'ujnalá ichaje.
24 Uncá huahuátala ijló quemacana: “Marí que ipechu i'imajica nacaje nacú.” Uncá huahuátala marí que quemacana ijló, huahue'epícale ipechu i'imacá Tupana puráca'alo chojé caphí. Huahuata iñaté a'acana, ipechu i'imacáloje pu'ují, me'etení ipechu i'imacá chaje raú penaje.