106
Feni bmanigil SOMOL ngak e girdi’ rok
1 Ngan pining e sorok ngak SOMOL!
Ngan pining e magaer ngak SOMOL, ni bochan e ba manigil;
t’ufeg rok e ba manemus.
2 Mini’ e rayag rok ni nge weliy gubin e pi maang’ang nike rin’.
Mini’ e ra gaman e sorok ni nge pining ngak?
3 Nge felan’ e pi’in yad be fol ko tin keyog,
pi’in gubin ngiyal’ ma yad ma rin’ e tin ni bfel’.
4 SOMOL, dab mu pagtalig ko ngiyal’ ni ga ra ayuweg e girdi’ rom,
mu unegeg ngorad nnap’an ni ga ra ayuwegrad.
5 Mu pageg ngug guy e girdi’ rom ni nge fel’ rogorad
mug un ko felfelan’ ko nam rom,
u fithik’ e uf uf ko pi’in nib mil farad ngom.
6 Kug denengad ni bod ni i rin’ e pi chitamangimad kakrom;
ku’ug pired ni gamad ba kireb ma ba kireb e leam romad.
7 Pi chitamangimad ni kakrom u Egypt e der nanged fan e pi maang’ang ni i rin’ Got;
ra paged talin feni yo’or yay ni i dag Got e t’ufeg rok ngorad,
miyad cheal ngar togopluwgad ngak e en ni Gubin ma Rayag Rok u rom ko fare gi day ni Red Sea.
8 Machane aywegrad, ni bod rogon ni micheg,
ni bochan e nge dag feni gel gelngin.
9 I non ko day ni Red Sea,
me mlik’;
me pow’iy e girdi’ rok ngar th’abed nga barba’ u daken e but’ nib mlik’.
10 I ayuwegrad u pa’ e pi’in i fananikayrad,
I ayuwegrad rok e pi to’ogor rorad.
11 Ma pi to’ogor rorad e ra limachgad;
dariy ta’ab bagayad ni magach.
12 Ma aram me mich u wan’ e girdi’ rok e thin ni i micheg
miyad tangnag e sorok ngak.
13 Machane de n’uw nap’an miyad pag talin e tin ke rin’
mra ngongolgad ni dakur son niged e fanow rok.
14 Ra uyngol gad u lan e ted ni desert
miyad sikengnag Got;
15 ma aram me pi’ ngorad e tin yad be ning,
machane miki pag ba m’ar nib gel nge yib nga fithikrad.
16 U rom u daken e ted e i awan’rad riy ngak Moses
nge Aron, ni fare tapigpig nib thothup rok SOMOL.
17 Ma aram me mab e but’ nge ful’ Dathan
me tharey Abiram nge chon e tabnaw rok;
18 me yib e nifiy nga but’ nga daken pi chongin
nge urufiy e pi girdi’ ni kireb nem.
19 Ra ngongliyed ya’an ba fak e garbaw ni pumo’on ko gol u Sinai
ngu’ur tedfan e re liyos nem;
20 ra thilyeged fel’ngin Got nib maluplup’ ra’en,
nga ba liyos ni ya’an ba gamanman nma kay e pan.
21 Ra paged talin Got ni ir e ayuwegrad
ko pi maang’ang ni i rin’ u Egypt.
22 Rib th’ab feni manigil e pin’en ni i ngongliy u rom!
Ginan’uy ko pin’en ni i rin’ ko fagi day ni fithingan e Red Sea!
23 Nap’an ni yog Got nra thang owchen e girdi’ rok,
me Moses nike mel’eg ni tapigpig rok, e sak’iy nga thilin e girdi’ nge Got
nge taleg e damumuw rok Got ndabi thang owcharad.
24 Ma aram mar dabuyed fare nam nib manigil,
ni bochan e de mich u wun’rad e n’en ni micheg Got.
25 Ra pired u lan e tent rorad ngu’ur gun’gun’gad
ma dar motoyilgad ngak SOMOL.
26 Ma aram mri ginangrad nib almarin
ni ra thang e pogofan rorad u lan e ted
27 me wereg e pi’in owcherad ko pi nam i yan,
nge pagrad ngarm’ad u lan e pi nam ni gathi nam rorad.
28 Ma aram e girdi’ rok Got e un i tayfan Baal u Peor
miyad un i kay e maligach ni kan pi’ ngak e pi got ni yad ba yam’.
29 Ra k’aringed e damumuw ngak SOMOL ko pi ngongol rorad,
me bugor ba m’ar nib ubchiya’ u fithik’rad.
30 Machane me sak’iy Finehas ngalang nge gechignag e pi’in bbuch e rorad,
ma aram me tal fare m’ar.
31 Ka’aram me par nga lanin’uy i Finehas ni be’ nib manigil
ni dab ni pag talin e chiney iyan e ngaram.
32 Fapi alublub nu Meribah e aram gin ni k’aring fapi girdi’ e damumuw ngak SOMOL riy
ngri magawon Moses ni bochrad.
33 Ra k’arnged e damumuw ngak me non ndakiyag ni tal nge leam.
34 Dar thanged owchen e girdi’ ko fapi nam,
ni bod ni yog SOMOL ngorad ni ngar rin’ed,
35 ma aram mu ur mabgolgad girdi’en fapi nam
miyad un nga yalrad.
36 Girdi’ rok Got e ra uned i tayfan e pi liyos,
ni aram tapgin e riya’ ngorad.
37 Ra pi’ed pifakrad ni pagel nge ppin
ni maligach ngak e pi liyos nu Kanaan.
38 Ra li’ed fapi bitir ni dariy e n’en ni kar bucheged,
nge ta’ay fare but’ ko mathang pogofan ni un tay riy.
39 Miyad ta’ay nigedyad ko pi ngongol rorad
miyad par nda ku ra yul’yul’gad ngak Got.
40 Ma aram me damumuw SOMOL ngak e girdi’ rok;
nge sonogor ngorad.
41 Me pagrad nga pa’ e pi nam,
nge gagiyeg nagrad e pi to’ogor rorad.
42 Ri gafgow nagrad e pi to’ogor rorad
miyad par nga tan pa’rad.
43 Bo’or yay ni ayuweg SOMOL e girdi’ rok,
machane yad e ra turguyed ni ngar togopluwgad ngak
ngar mak’gad nga fithik’ e denen.
44 Yug aram rogon machane ma motoyil SOMOL ngorad nnap’an ni yad ra yor ngak,
me changar ko gafgow nike yib ngorad.
45 Bochrad me yib ngan’ e m’ag rok u thilrad,
ma bochan e t’ufeg rok nib ga’ me waer e damumuw rok.
46 Me gagiyegnag urngin e pi’in be gafgow nagrad
nge kireban’rad ngorad.
47 SOMOL ni Got romad, mu ayuwegmad,
ngam fulwegmad nggu chuwgad u fithik’ e pi nam,
ya nge yag ni gu pininged e magaer
magmad pining e sorok nga fithngam nib thothup.
48 Ke sorok SOMOL, ni Got nu Israel;
ngad pininged e sorok ngak e chiney i yan ndariy n’umngin nap’an!
Nge gubin e girdi’ ma nge lungurad, “Amen!”
Ngan pining e sorok ngak SOMOL!