105
Ala nun a yamana fe
Taruxune Singen 16.8-22
1 Ɛ Alatala tantun. Ɛ yi a maxandi.
A bata naxan liga, ɛ na fala siyane xa.
2 Ɛ bɛtin ba a xa,
ɛ yi a tantun bɛtine yi,
ɛ yi a kabanako feene birin fala.
3 Ɛ ɛ kanba a xili sariɲanxini.
Naxanye birin Alatala fenma,
ne xa sɛwa.
4 Ɛ ɛ yɛɛ rafindi Alatala nun a sɛnbɛn ma,
ɛ lu a fenɲɛ waxatin birin.
5 A wali faɲin naxanye ligaxi
e nun a kabanako feene
nun a kitin naxanye saxi,
ne fe xa rabira ɛ ma,
6 ɛ tan Iburahima bɔnsɔnna,
a walikɛne,
ɛ tan Yaxubaa diine,
Ala naxanye sugandixi.
7 A tan nan Alatala ra, en ma Ala.
A tan nan bɔxɔn birin kitisaan na.
8 A ɲɔxɔ luma a layirin xɔn ma nɛn
han habadan,
e nun a falane fe han mayixɛtɛ wuli keden,
9 e nun a layirin naxan xidi e nun Iburahima tagi,
a yi a kɔlɔ Isiyaga xa.
10 A mɔn yi a ragidi Yaxuba ma sariyan xɔn,
a findi habadan layirin na Isirayila kaane xa.
11 A naxa, “N Kanan yamanan soma nɛn
ɛ nun i yixɛtɛne yii ɛ kɛɛn na.”
12 E mi yi wuya nun.
Xɔɲɛ dando nan tun yi e ra na yamanani.
13 E yi kelima nɛn siyana nde yɛ
e siga nde gbɛtɛ yɛ,
e keli yamanana nde yi
e siga nde gbɛtɛ yi.
14 Koni a mi tinɲɛ
muxu yo xa e ɲaxankata.
A mangane rakolon nɛn e fe yi, a naxa,
15 “Ɛ nama fefe liga n ma muxu sugandixine ra.
Ɛ nama fefe ɲaxi liga n ma nabine ra.”
16 Ala yi fitina kamɛn naso e yamanani,
a yi e donseen birin ɲan.
17 Koni Ala yi xɛmɛna nde rasiga a yamaan yɛɛ ra.
Yusufu nan yi na ra
naxan mati konyiyani.
18 E yi yɔlɔnxɔnna sa a sanne ma,
e wuren bira a kɔɛ.
19 Han na waliyiya falane yi kamali
a naxanye ti.
Alatalaa falan yi a yita
a a ɲɔndi.
20 Nanara, mangan yi a beɲin,
naxan yi siyane xun na,
na yi a xɔrɔya.
21 A yi Yusufu lu a yamanan xun na.
A yi lu mangan yii seene birin xun na,
22 alogo a xa a kuntigine matinxin a waxɔnna ra,
a yi na fonne xaran fe kolonna ma.
23 Nayi, Isirayila yi fa Misiran yi,
Yaxuba yi dɔxɔ Xami bɔnsɔnna yamanani.
24 Ala yi dii wuyaxi fi a muxune ma.
E sɛnbɛn yi gbo ayi dangu e yaxune ra.
25 A yi Misiran muxune bɔɲɛn masara,
Isirayila yamaan yi raɲaxu e ma.
E yi a walikɛne ɲaxankata feni tɔn.
26 A yi a walikɛɛn Musa rasiga e ma
e nun Haruna, a naxan sugandixi.
27 E yi Alaa taxamaseri magaxuxine liga e yɛ,
e a kabanako fe wanle kɛ
Xami bɔnsɔnna yamanani.
28 Ala yi dimin naso na yamanani.
E mi yi nɔɛ na yamarin matandɛ.
29 A yi e igene findi wunla ra,
e yɛxɛne birin yi faxa.
30 E yamanan birin yi findi xunɲɛne ra.
Mangana banxin birin yi rafe xunɲɛne ra.
31 Ala yi xɛnne nun sosone yamari,
e yi mini yamanan birin yi.
32 A yi balabalan kɛsɛne ragodo e ma,
Galanna yi godo a yamanan birin yi.
33 Ala yi e manpa binle kala
a yi yamanan wudine birin magira.
34 A yi tuguminne fan yamari,
e yi fa,
suɲɛn naxanye mi yi nɔɛ yatɛ.
35 E yi yamanan se ɲingine birin don.
E yi e donseen birin don.
36 Ala yi e dii singene birin faxa yamanani,
naxanye findixi e yixɛtɛ sɛnbɛn na.
37 A yi Isirayila yamaan namini Misiran yamanani,
e gbetin nun xɛmaan xali,
muxu yo mi bira e bɔnsɔnne yɛ.
38 Misiran kaane yi sɛwa e keli feen na,
bayo e yi gaxuxi e yɛɛ ra han!
39 Ala yi kundaan so a muxune xun na.
N yi tɛɛ dɛgɛn ti e yɛɛ ra
alogo a xa e lu kɛnɛnni.
40 E Ala maxɔdin,
a yi dɔmɛne nun donseene ragodo e ma
keli kore, e lugo.
41 A yi fanyen bɔ, igen yi mini a yi,
a yi godo tonbonni alo xude wunla,
42 bayo a fala sariɲanxina fe rabira nɛn a ma
a naxan ti Iburahima xa, a walikɛna.
43 A yi a yama sugandixin namini Misiran yi,
e ɲaxan, e sɔnxɔ sɛwani.
44 A yi siya gbɛtɛne bɔxɔn so e yii,
e yama gbɛtɛne wali xɔnna sɔtɔ e kɛɛn na,
45 alogo e xa a tɔnne suxu,
e yi a sariyan birin suxu.
Tantunna Alatala xa!