24
1 I nama mila muxu ɲaxine fe xɔn.
E yɛ lu xɔnla nama i suxu.
2 Amasɔtɔ e gbalo feen nan yitɔnma e bɔɲɛni,
fe ɲaxin nan minima e dɛ.
3 Banxin tima fe kolonna nan xɔn,
a sabatima xaxinla nan xɔn.
4 Banxin nafema hɛrisigɛ kɛndɛne nun se faɲine ra
fe kolonna sabun nin.
5 Fe kolonne sɛnbɛn gbo han!
Kolonna muxun naxan yi,
na fangan xun masama nɛn.
6 Amasɔtɔ fɔ muxun xa a miri ki faɲi
benun a xa mini yɛngɛ sodeni.
Nɔɔn sɔtɔma maxadi muxu wuyaxi nan baraka yi.
7 Xaxilimayaan gbo xaxilitaren ma,
a mi falan tiyɛ taan fonne malanni.
8 Naxan fe ɲaxini tɔnma,
na xilima nɛn a kɔtɛ ɲaxin kanna.
9 Xaxilitareyana miriyane findixi yulubin nan na.
Magele tiin naɲaxuma nɛn muxune tagi.
10 Xa wɛkilɛn ɲan i yi gbalon lɔxɔni,
sese mi i fangan na.
11 Muxune xunba naxanye xalima e faxadeni,
i yi muxune rakisi naxanye faxamatɔ a ra.
12 Xa i a fala, i naxa,
“Nxu mi yi a kolon,”
naxan bɔɲɛne fɛsɛfɛsɛma,
na mi ɲɔndin kolonɲɛ ba?
Naxan i niin kantanma,
na mi a kolon ba?
13 N ma diina,
kumina nde kɔn bayo a fan.
Kumi dɛngbɛn ɲaxun i dɛ.
14 Fe kolonna fan na kii nin i niin xa.
Xa i a sɔtɔ,
i hɛrin sɔtɔma nɛn yɛɛn na,
i mi yigitɛgɛma.
15 Muxu ɲaxine,
ɛ nama dɔxɔ muxune yɛɛ ra
e suxu xinla ma tinxin muxun konni,
ɛ fu a dɔxɔden ma.
16 Bayo tinxin muxun nɔɛ birɛ nɛn dɔxɔɲa ma solofere
a mɔn yi keli.
Koni muxu ɲaxine birama nɛn gbaloni keden na.
17 I nama ɲaxan xa i yaxun bira.
Xa a dagalanɲɛ ayi,
i nama sɛwa i bɔɲɛni
18 alogo Alatala nama na to,
na yi raɲaxu a ma,
a yi ba xɔlɔxi i yaxun ma.
19 I nama xɔlɔ muxu ɲaxine fe ra,
i nama mila e seene xɔn.
20 Amasɔtɔ fe ɲaxi rabaan mi hɛrin lima a yɛɛ ra.
Muxu ɲaxine lɛnpun tuma nɛn.
21 N ma diina, gaxu Alatala yɛɛ ra
e nun mangana,
i nama lu muxu murutɛxine yɛ.
22 Amasɔtɔ e tɔrɔn kelima nɛn sanɲa ma kedenni.
Nde nɔɛ a kolonɲɛ
Ala nun mangan halagin naxan nagidima?
Fekolonne fala gbɛtɛne
23 Fekolonne mɔn ito nan falaxi:
A mi lan muxune xa rafisa e bode xa kiti sadeni.
24 Naxan na a fala muxu ɲaxin ma,
a naxa, “I tinxin,”
yamaan nan na kanna dangama,
siyane yi xɔlɔ a xili ma.
25 Koni naxan na muxu ɲaxin yalagi,
na lanxi.
Duba gbeen nan na kanna xa.
26 Yabi tinxinxin ɲaxun
alo marafan sunbuna.
27 I ya wanle rakamali tanden ma,
i yi i ya xɛɛne yitɔn,
na xanbi ra i fa i ya banxin ti.
28 I nama i adamadi boden tɔɲɛgɛ,
i wulen nan sama a xun ma ba?
29 I nama a fala, i naxa,
“A to bata a liga n na,
n fan xa a ɲɔxɔn liga a ra,
n muxun birin saren fima a wanla nan na.”
30 N dangu nɛn muxu narixina nde a xɛɛn dɛxɔn ma,
xaxilitarena nde nakɔ yirena.
31 Xalone bata yi mini yirena ngaani,
sɛxɛ ɲaxine yi xɛɛn birin ma,
a gɛmɛ sansanna bata yi bira.
32 N to na to,
n yi a rakɔrɔsi,
n yi na feen sa n bɔɲɛni,
n yi xurun sɔtɔ.
33 I na i sa,
yeriyerinna yi dangu i ma ndedi,
i xi ndedi,
i yi i yiine filin e bode ma ndedi,
34 yiigelitɔyaan yi baga i ma
alo mafu tiina,
e nun setareyana alo muɲadena.