16
Moyaba Yerusalɛn xandima nɛn
1 Moyaba mangane yi a fala, e naxa,
“Ɛ yɛxɛɛne rasiga Yuda yamanan mangan ma,
sa keli Sela tonbonni,
siga Siyon geyaan fari.”
2 Moyaba ɲaxanle bata baan gididen li Arinon yi.
E luxi nɛn alo xɔliin naxanye e gixi,
naxanye kedixi,
e makuya e tɛɛn na.
3 Moyaba kaane yi a fala Yerusalɛn kaane xa, e naxa,
“Nxu maxadi,
i fena nde ragidi.
Yanyi tagi sogen bun,
i nininna xa so nxu xun na
alo kɔɛna, i nxu kantan.
Nxɔ muxu gixine luxun,
i nama gi muxune yanfa de!
4 A lu nxɔ muxu gixine xa e dɔxɔ ɛ konni,
dɔxɔden so e yii e ratangɛ halagi tiin ma dɛnaxan yi.
Naxan nxu ɲaxankatama,
na mi luma habadan,
halagin fama nɛn a dandeni.
Naxan nxu yɛngɛma,
na kelima nɛn yamanani.
5 Nayi, i ya mangayaan sɛnbɛn sɔtɔma nɛn hinanna xɔn,
Dawuda yixɛtɛna nde yi mangayaan naba lannayani,
kitisaan naxan kiti kɛndɛn fenma
naxan sɔbɛ soxi tinxinna ma.”
Yerusalɛn mi nɔɛ Moyaba maliyɛ
Yeremi 48.29-36
6 Nxu bata Moyaba kaane wasona fe mɛ
naxan gbo han,
e nun e yɛtɛ yigboon
nun e wason nun e yɛtɛ yitena.
Koni e yɛtɛ matɔxɔma fuun nin.
7 Nanara, Moyaba kaane gbelegbelema sununi
e yamanana fe ra,
e birin e wuga xuini tema.
E kutunma nimisani Kiri-Haresɛti taa kalaxina fe ra.
E bata tunnaxɔlɔ e ma fefe!
8 Xɛsibɔn xɛɛne bata kala,
alo Sibima manpa binle.
Siyane mangane bata manpa bili yɛbaxine yibodon
naxanye bogine yi sigama han Yaasɛri taani,
e xuya tonbonna xun xɔnna ra,
e yiine yi sigaxi han Fɔxɔ Daraan kidi ma.
9 Nanara, n wugama Yaasɛri kaane xɔn
Sibima manpa binle fe ra.
Ee! Xɛsibɔn taan nun Eleyale taana!
N na n yɛɛgen nagboma ayi nɛn ɛ ma!
Yɛngɛn xuiin bata mini ɛ manpa bili nakɔne yi,
e nun ɛ se xaba daxine yi.
10 Sɛwan nun ɲaxaɲaxan bata ɲan wudi bili nakɔne yi.
Sigi sa xuiin nun sɛwa xuiin mi fa mɛma
nxɔ manpa bili nakɔne yi.
Muxu yo mi fa manpa bogine igen bama,
n bata danna sa sɛwa xuiin na.
11 Nanara, n bɔɲɛn wugama Moyaba fe ra.
N ma mawuga xuiin luxi nɛn
alo bɔlɔn xuina sununi.
N kutunma Kiri-Haresɛti taana fe ra.
12 Nxu Moyaba yamaan toma xadanɲɛ
e suxure kide matexine yi,
e yi so e suxure banxine yi maxandi tideni,
koni na tɔnɔ yo mi na.
13 Alatala bata yi na fala Moyaba kaane xili ma.
14 Iki Alatala naxa, “Benun ɲɛɛ saxan yatɛ xa dangu, Moyaba muxu gbeene nun a yama gbeen yarabima nɛn, fangatare dando gbansan yi lu e nii ra ne yɛ.”