6
Isirayila xili fena Ala ma
1 Ɛ fa be,
en xɛtɛ Alatala ma!
Amasɔtɔ a bata en yibɔ,
koni a mɔn en nakɛndɛyama nɛn.
A bata en garin,
koni a en maxɔlɔdene maxidima nɛn.
2 Xii firin na dangu,
a en niin birɛ en yi mɔn,
a xii saxandeni a en yitɔn,
en yi lu a yɛtagi.
3 En xa Alatala kolon,
en bira a kolonna fɔxɔ ra.
Alo kuye yibaan to fama,
a fan minima nɛn kɛnɛnni yati!
A fama nɛn en xa
alo tulen ɲɛmɛn na,
alo furu tulen naxan bɔxɔni kunma.
4 N nanse ligama ɛ tan na,
Efirami bɔnsɔnna?
N nanse ligama ɛ ra,
Yuda bɔnsɔnna?
Ɛ hinanna luxi nɛn
alo xɔtɔn ma kundana,
alo xiila naxan yolonma
a xuya ayi mafurɛn!
5 Nanara, n na ɛ yɛngɛma nɛn nabine ra,
n na ɛ faxama nɛn n dɛɛn fala xuine ra.
N ma kitine fixa alo kɛnɛnna.
6 Amasɔtɔ hinanna rafan n ma dangu saraxan na.
Ala kolonna dangu saraxa gan daxine ra.
7 E bata layiri kala alo adamadiine,
nayi e bata n yanfa.
8 Galadi taan nafexi fe ɲaxi rabane nan na,
han wuli funfune toma ayi.
9 Alo mafu tiin naxanye muxune legedenma luxunni,
saraxarali ganla fan bata faxan ti Siken taan kiraan xɔn,
e gbalone raba.
10 N bata fe ɲaxine to Isirayila yamaan yɛ:
Efirami bɔnsɔnna bata yalunyaan liga,
Isirayila bɔnsɔnna e yɛtɛ raxɔsima.
11 I tan fan, Yuda,
se xaba waxatin nagidixi i xa,
n na fa n ma yamaan suxu muxune ra waxatin naxan yi.