19
Sunu sigina lan mangane ma
1 Ala nan a falaxi a n xa sunu sigini ito sa Isirayila kuntigine xa fa fala,
2 “I nga findixi yata gilɛ kɛndɛn nan na yatane tagi.
A yi saxi yata sɛnbɛmane nan tagi a diine maxurudeni.
3 A yi a dii xɛmɛ keden maxuru
naxan findi yata xɛmɛ sɛnbɛmaan na.
A yi fatan a se suxine yibɔɛ,
a yi muxune fan donma.
4 Siyane yi a xinla mɛ,
e yi sa a suxu yinla ra,
e wuren bira a ɲɔɛni,
e yi siga a ra Misiran yamanani.
5 Yata gilɛn to a kolon,
a a yi a diin legedenma fuun nin,
a yigi mi yi fa a ma,
a yi a dii gbɛtɛn sugandi,
a yi na fan findi yata xɛmɛ sɛnbɛmaan na.
6 A yi a masigama yatane tagi,
bayo a yi findixi yata xɛmɛ sɛnbɛmaan nan na.
A yi fatan a se suxuni bɔɛ,
a yi muxune fan donma,
7 a fu e kaɲa gilɛne ma,
a yi e taane findi yire rabeɲinxine ra.
Yamanan muxune birin yi yilanyilan a wurundun xuiin ma.
8 A rabilinna siyane yi keli a xili ma
yiren birin yi,
e yi yalaan nati a yɛɛ ra,
e yi a suxu yinla ra.
9 E yi wuren bira a ɲɔɛni,
e yi a balan wure sansanna kui,
e yi siga a ra Babilɔn mangan fɛma,
e yi a sa kasoon na
alogo a wurundun xuiin nama fa mɛ sɔnɔn Isirayila geyane fari.”
Sunu sigina lan manpa binla ma
10 “I nga yi luxi nɛn
alo manpa binla a yi tixi igen nan dɛ.
A yi bogixi,
a yifɔtɔnxi bayo igen yi gbo.
11 A yiine yi sabatixi,
e yi nɔɛ rafalɛ mangaya taxamaseri dunganne ra nɛn.
A yi tixi wudine xun ma,
a kuya wudine birin xa
a yiine fan yi wuya.
12 Koni a tala nɛn xɔlɔni,
a rawoli ayi bɔxɔni.
Sogeteden foyen yi a bogine xara
a yii faɲine yi ba a ma,
e xara, tɛɛn yi e gan.
13 Iki, a fa tixi tonbonna nin bɔxɔ xareni
min xɔnla dɛnaxan yi.
14 Tɛɛn bata a yiine li,
a yi a dɛɛne nun a bogine gan.
A yii sabatixi yo mi fa a ma sɔnɔn,
naxan nɔɛ rafalɛ manga dunganna ra.”
Sunu sigin nan na ra naxan daxa a sa alo wuga sigine lan e xa sa kii naxan yi.