7
Fekolonna
1 Xili kanyaan fisa latikɔnɔn kɛndɛn xa,
muxun faxa lɔxɔn dangu a bari lɔxɔn na.
2 A fisa i siga ɲandeni
benun i xa siga sɛwa bande dondeni,
bayo sayaan muxune birin yɛɛ ra,
niiramane birin lan
e yi xaxili sɔtɔ na ma.
3 Sɔxɔlɛn fisa gelen xa,
bayo yɛtagin na yifɔrɔ,
na muxun xaxinla maliyɛ nɛn.
4 Fekolonne bɔɲɛn darixi ɲanden nan na,
koni xaxilitarene bɔɲɛn darixi ɲaxaɲaxa yiren nan na.
5 A fisa muxun yi fekolonna maxadin namɛ,
benun a xa xaxilitarene sigin namɛ.
6 Bayo xaxilitarene gele xuiin luxi nɛn
alo ɲanla budo xuiin tɛɛni tunden bun.
Fe fuun nan na fan na.
7 Fekolonna na ɲaxankatan ti,
na a findima xaxilitaren nan na,
dimi yi seene na rasuxu mayifuni,
na muxun bɔɲɛn natantanma nɛn.
8 Feen naɲanna dangu a fɔlɔn na.
A fisa muxun yi sabari
benun a xa waso ayi.
9 I nama mafura xɔlɛ,
bayo bɔɲɛ gbeen xaxilitarene nin.
10 I nama a fala, i naxa,
“Nanfera waxati danguxine fisa iki xa?”
Bayo na maxɔdinna mi kelixi fekolonna xan yi.
11 Fekolonna nun kɛɛn tɔnɔn birin lan,
bayo a muxune malima dunuɲa yi.
12 I na lu fekolonni,
na i ratangama nɛn alo gbeti kanyana,
i na fe kolon,
na fekolonna i luma nɛn i nii ra.
13 Alaa wanla mato:
A na naxan yidɔxɔ,
nde nɔɛ a ratinxinɲɛ?
14 I xa sɛwa waxati faɲini,
i yi i miri tɔrɔ waxatini,
bayo Ala nan e firinna birin daxi.
Nanara, adamadiin mi nɔɛ sese yɛɛ toɛ fe famatɔne fe yi.
15 N bata feen birin to n ma dunuɲa yi gidi fufafuni.
Tinxin muxuna ndee halagima e tinxinyani,
ɲaxudena ndee yi siimaya xunkuyen sɔtɔ e ɲaxuyani.
16 I nama i ya tinxinyaan nadangu ayi,
i nama i yɛtɛ findi fekolon gbeen na.
Nanfera i yɛtɛ rahalagima?
17 I nama ɲaxuyaan nadangu ayi,
i nama findi xaxilitaren na.
Nanfera i faxɛ
benun i ya waxatin xa a li?
18 A lan i yi kedenna suxu
hali i mi boden beɲin,
bayo naxan na gaxu Ala yɛɛ ra
na feen birin yiminima nɛn.
19 Fekolonna xaxilimaan sɛnbɛ soma nɛn
dangu yamana kan fu ra taani.
20 Tinxin muxu yo mi dunuɲa yi
naxan fe faɲin ligama a mi yulubi liga.
21 I nama i tuli mati falan birin na,
alogo i nama i ya walikɛɛn xuiin mɛ,
a i rayelefuma.
22 Bayo i a kolon i bɔɲɛni,
i tan yɛtɛɛn bata muxune rayelefu sanɲa ma wuyaxi.
23 N bata na feene birin fɛsɛfɛsɛ fekolonna xɔn,
n yi a fala, n naxa,
“N fekolonna sɔtɔma nɛn,”
koni a mɔn makuya n na.
24 Sese a ra, a makuya pon!
A tilin mumɛ! Nde nɔɛ a toɛ?
25 Nayi, n bata kata fekolonna famu feen nun a fɛsɛfɛsɛ feen
nun a fen feen na e nun feene bunna,
alogo n xa a famu a xaxilitareyaan nan ɲaxuyaan na,
fa fala daxuyaan mi fan.
26 N bata a kolon
a ɲaxanla naxan luxi alo luti ratixina,
naxan bɔɲɛ findixi yalaan na,
naxan yiine luxi alo yɔlɔnxɔnna,
na xɔlɔ dangu sayaan na!
Muxun naxan Ala kɛnɛnxi,
na tangama nɛn a ma,
koni yulubi kanna a suxuma nɛn a ra.
27 N tan, karamɔxɔna,
n na ito nan toxi,
n to feene fɛsɛfɛsɛxi keden keden yɛɛn ma,
alogo n xa feene bunna yɛɛ to.
28 N mɔn feene yɛ fenma,
koni n munma a yɛɛ to singen.
N xɛmɛ kɛndɛ kedenna nan toxi xɛmɛ wuli keden yɛ,
koni n mi ɲaxalan kɛndɛ keden peen toxi ɲaxanle yɛ.
29 Koni, n na ito nan to:
Ala adamadiine da nɛn, e fan,
koni e tan bata kɔtɛ wuyaxi fen.