10
Xaxilitareyaan bɔnɔna
1 Tugetugene faxaxin nɔɛ latikɔnɔnna xiri ɲaxuɛ nɛn.
Na kiini xaxilitareyana ndedi nɔɛ fekolonna nun binyen kalɛ nɛn.
2 Fekolonna xaxinla sigan kira faɲin nan xɔn,
koni xaxilitaren xaxinla sigan kira ɲaxin nan xɔn.
3 Xaxilitaren nɛma sigan tima kiraan xɔn,
xaxili mi a ma.
Birin a xaxilitareyaan toma.
4 Xa kuntigin xɔlɔ i xili ma,
i nama keli i ya walideni,
bayo maraxaran yulubi gbeen nan matangama.
5 N fe ɲaxina ndee toxi dunuɲa yi,
tantanna naxanye fata mangan na:
6 Fekolontarene tide gbeene sɔtɔma,
sɛnbɛ kanne yi lu tide xurine yi.
7 N bata konyine to soone fari,
mangane yi sigan ti e sanni alo konyine.
8 Naxan na yinla ge,
a birama nɛn na ra.
Naxan na yinna rabira,
saɲin nan na xinma.
9 Naxan na gɛmɛne maxɛtɛ,
na a maxɔlɔma nɛn e ra,
naxan wudin bɔma,
na nɔɛ a maxɔlɛ nɛn.
10 Xa bunbi mɛlɛnna dɛ mi a yi,
a mi raxanxanxi,
fɔ i xa i sɛnbɛn xun masa nɛn,
koni fekolonna feen nɔɛ dangu na ra.
11 Naxan fatan saɲin suxɛ,
na tɔnɔn nanse ra
xa saɲina a xin
benun a xa a suxu?
Xaxilimayaan nun daxuyana
12 Fekolonna falane rafexi hinanna nan na,
koni xaxilitarena falane bɔnɔn nan tima a ma.
13 A falane fɔlɔn xaxilitareyaan nan ma,
a raɲan daxuya ɲaxin ma.
14 Xaxilitaren falane rawuyama ayi nɛn.
Adamadiin mi a kolon
naxan fama ligadeni.
Nde a falɛ a xa
naxan fa ligama a xanbi?
15 Xaxilitarena wanla a xadanma nɛn,
bayo a yɛtɛɛn mi a kolon
a sigɛ taani kii naxan yi.
16 Yamanan naxan manga findixi foningen na,
gbalon na xa,
e nun naxan ma kuntigiye e waxatin birin nadanguma donse dondeni.
17 Sɛwan na yamaan xa
naxan manga findixi muxu binyene diin na,
naxan ma kuntigiye e dɛgema a waxatini,
e makoon naxan ma,
e mɔn mi manpaan minna radangu ayi.
18 Muxu narixina xalanben fɔnma nɛn.
Xa a mi walɛ, tulen soma nɛn a banxini.
19 Muxune sɛwa bande donna tima ɲaxaɲaxani,
manpaan yi e niini fan e ma.
Gbetin nan feen birin yabin na.
20 I nama mangan danga,
hali i miriyani,
i nama nafulu kanna danga i ya banxin kui,
bayo a luyɛ nɛn
alo xɔliin nan sa i xuiin naligama a xa,
a yi i ya falane yɛba a xa.