Mbeɗe sáka kuni fie Galasiri 5

Ì ɗaa sùo-rì ɓa koy ɓay tul bol kusol na mbǎa

1 *Krisi na tina naari saa ɓil koy ɓay haŋa náa káwri ɓáy tul naari ɓa tusuɛ! Munu zu lɛ, ì mgba sùo-rì ŋgɔ-ŋgɔŋ ɓay káw ɓáy tul-rì, a í nzɛ ɓáy sùo-rì ɓay yḭ́i í vi ɓa koyri na mbǎa. 2 Ɓi Pol na, mì ɓaa ha rì ta-taŋ: zaɗka ì kuŋ ŋgori ɓay haŋa Ŋgɛrɛwṵru ka kɔ rì ɓa nzoɓri ká ì ɗo ɓáy zaɗɛ nzɛɗɛm ká nun-ɛ lɛ, fe ká Krisi ɗaa na ɗo ɓa fe ká gɔr hɔy ká nun-rì. 3 Mì baka rì ɓa kḭ faa ɓal ba mbḭw na rɔɓay: nzoɓ ha̰a ha̰a ká ha ri kuŋ ni ŋgori na, ɗo nun haŋa ni ɗaa vu mbom ɓo tul *bol kusol na ɓáy nzi-ɛ ŋgiɗ bele. 4 Ɓaarì ká ì nzaa faa ɓay haŋa Ŋgɛrɛwṵru ka kɔ rì ɓa nzoɓri ká i ɗo ɓáy zaɗɛ nzɛɗɛm ká nun-ɛ ɓáy faa ɗáa vu mbom ɓo tul bol kusol na, zaɗka ì ɗaa munu lɛ, ì naa sùo-rì ká luo Krisi, a í naa sùo-rì ká ɓil law kere Ŋgɛrɛwṵru na nda̰w. 5 Roo lɛ, naari na, náa hiiri ɓay haŋa Ŋgɛrɛwṵru ka ha̰ náa ɗori ɓáy zaɗɛ nzɛɗɛm ká nun-ɛ. Ɓa fe ká náa ɗáari law naari te ɗi nzokɗo, a náa gíyaŋri feke na kekeke ɓáy hṵrusuo Tem Law Pie ká ɗaa peɗ ká ɓil law naari ɓáy faa mbika law na. 6 Zaɗka náa zuɔri ziŋ Zezu Krisi na, *kúŋ ŋgori, mase kúŋ ŋgori ya hɔy kara, ɓe ze ɓa fe ya, roo lɛ, fe ká ndaɗ ɓamba na ɓa mbika law ká ɗaa fe ɓáy faa law ini.

7 Pola na, ì ɗaa fe ndaɗ ɓamba. A wa̰a, timbɛɗɛ key na, nzoɓ ve ze ɗaa puu ɓo pol-rì ha rì ɗaa vu mbom ɓo tul tusuɛ ɓay na mbǎa lɛ? 8 Ì kɔ, ɓay ká i ɓaa í sǔruke tigba̰a-ri ɓay mbáke tul-rì na, uru saa luo Ŋgɛrɛwṵru ká ɗi rì na ya. 9 Sim ɓay ɓáa nzoɓri ɓaa mii: «Tumbom ndḭi hɔy tuo ɓo mbii lɛ, mbii fṵ riw bele*.» 10 Ɓi na, mì kɔ lɛ, ɓaarì ká ì zuɔ ziŋ Zezu Krisi na, ì ti yḭ́i í ker ɓay kḭ ɓoɗ ya. Mì kɔ nda̰w, nzoɓ ká ɗo fɛ́rɛ tul-rì na, ze ka ɓa na nzoɓ ḭi ḭi hɔy kara, Ŋgɛrɛwṵru a ɗáa ɓay ɓo tul-e ha̰ ni kɔ sɛkɛ fe.

11 Yṵ-iri, zaɗka ɓa ɓi ze mì ka-káa kúŋ ŋgori ɓaŋguɔ mí ɓaa mii, ɓa fe kere na wa̰a, ɓay ḭi nda̰w rɔɔ, i ɗaa nun-i tuɔ síe mini key ɓáy lɛ? Zaɗka mì ɗaa munu lɛ, káa Ɓay Kere ká mì kaa se tul Krisi ká i ɓer ni ɗo tul puu say huɗ na, ti ɓá ŋguɗ puu téke ɓal nzoɓ mbḭw ya. 12 Nzoɓ nuri ká i yɔklɔ kér ɓay ɓaarì ku na, mì hii ɓay haŋa ri se ɓáy peɗ ɗáa ɓari na ɓa pola pola ɓo, í lo gum ri mgbum!

13 A ɓaarì yṵ-iri laa lɛ, ɓay ká se tul bol kusol na, Ŋgɛrɛwṵru ɗí rì ɓay haŋa rì kaw ɓáy tul-rì. Roo lɛ, ì ha̰ káw ɓáy tul-rì na, ka vi ɓa faa ká ɓay ɗáake fe ká kɔn naysuo hii ya. Ì ha̰ law ini ze ka ɗo ɓil law-rì í ɗáake peɗ ha̰ kḭ ɓa lie ɓa lew, 14 ɓay ḭi lɛ, bol kusolri riw bele na mbṵ tul-e mbḭw hɔy mii: «Mu híi kṵ-ɔ munu ká sùo-ɔ ɓo kḭ.» 15 Ì nzɛ ɓáy sùo-rì nda̰w rɔ! Zaɗka ì hii kḭ ya, rɔɔ í zɔrɔ kḭ ɓáy ɓay haɗ haɗ lɛ, ì ɓíɛ kḭ kaɗ kaɗ bele.

Ì ha̰ Tem Law Pie ka nda faa pol-rì

16 Munu zu lɛ, ɓay ká mì ɓáa ha rì na ze ɗo key: ì ha̰ Tem Law Pie ze ka nda faa pol-rì. Zaɗka ì ɗaa munu lɛ, ì ti ɗáa fe ká kɔn naysuo hii na mbǎa. 17 Tusuɛke lɛ, fe ká kɔn naysuo hii na, tuŋ fe ká Tem Law Pie hii na ŋgereŋ ɓa fal. A fe ká Tem Law Pie hii na laa lɛ, tuŋ fe ká naysuo hii na ŋgereŋ ɓa fal na nda̰w. Ɓari siɗi bele na i tuŋ kḭ tuŋ ŋgereŋ ha rì ziŋ faa ɗáa fe kereri ká ì hii ɓay ɗáa na ya. 18 Roo lɛ, zaɗka Tem Law Pie nda faa pol-rì lɛ, *bol kusol na ɗo ɓáy hṵrusuo ká tul-rì mbǎa. 19 Feri ká nzoɓri hii ɓay ɗáa ɓáy kɔn naysuo-ri na ɗo ta-taŋ: ɗáa nun pie nda̰w, ɗáa fe ḭ̌m nda̰w, séke simseɗ taa gɔɓ gɔɓkeri nda̰w, 20 púo wṵruri nda̰w, ɗáa fe ɗáa mgbḭiri nda̰w, fṵ́y kḭri nda̰w, rɔɔ ɗáa rɔɗi ziŋ kḭ nda̰w pi. Nzoɓkeri ku na, i ɗaa sere ziŋ kḭ nda̰w, i ɓa nzoɓ law fá̰a nda̰w, í ɓa nzoɓ kɔ́kɔ nun fe nda̰w, a í ɓiɛ kḭ kaɗ kaɗ í te ɓil kḭ taŋ zúɔ kḭ nda̰w pi. 21 I ɓa nzoɓ ɗáa kɔn fe nda̰w, nzoɓ ɗáa sùo-ri ɓa koy him nda̰w, nzoɓ fe sṵm luyeri nda̰w, rɔɔ i ɗaa fe kḭri ɓoɗ ɓoɗ ká rìi fe niri key na nda̰w pi. Mì baka rì timbɛɗɛ key munu ká mì baka rì ká pola na ɓáy. Ɓari ká i ɗo ɓil fe niri key ɓaŋguɔ na, i ti ɗoko sakra nzoɓri ká Ŋgɛrɛwṵru re mbay ká tul-ri na ya. 22 Roo lɛ, zaɗka Tem Law Pie ze nda faa pol-rì lɛ, feri káʼa híi ɓay haŋa nzoɓri ɗaa na ze ɗo key: kɔ́kɔ nzoɓ ɓa nzoɓ nun nda̰w, ɗáa suoriya nda̰w, káw ɗɛkɛkɛ nda̰w, íki law ká tul nzoɓri nda̰w, ɗáa kere nda̰w, mgbaka ini nda̰w, rɔɔ ɗoko tul ɓay nda̰w pi. 23 Kaʼa ɓá nzoɓ law huoke lɔm nda̰w, a ɓa nzoɓ kɔ́kɔ faa mgbaka sùo-ɛ nda̰w pi. Bol kusol tuŋ fe niri key na ŋgereŋ ya! 24 Ɓari ká i ɓa taa Zezu *Krisi na, i pɔŋ ɗáa kɔn fe naysuo na riw bele munu rìi fe ká i ɓer ni ɗo tul puu say huɗ. 25 Munu ká Tem Law Pie ze ha̰ náa kǎwkeri ɓáy kumnun na, ndaɗ ɓay haŋa ni ka nda faa pol naari, a kíɛ naari simseɗ kere. 26 Ì vi ɓa nzoɓ siika sùo-rì ya, ì ŋgákla kḭ a í ɗaa sere ziŋ kḭ ya nda̰w.