13
Law ini
1 Ze, mì ɗo ɓáy fe ini ɓáa nzaa ɓay nzoɓri ɓoɗ ɓoɗ ɓáy nzaa ɓay leɗ nzaapeɗri ká nulue hɔy kara, zaɗka law ini ti law-i ya lɛ, ɓay ɓáa ɓiri na ɗo ɓa fe ká gɔr hɔy munu ɓa bagum ká i haŋ wɔɓ wɔɓ, mase, tul fe ká i nda kpǔɔ kpǔɔ.
2 Ze, mì ɗo ɓáy fe ini ya̰aŋa ɓay saa nzaa Ŋgɛrɛwṵru, mase, mì kɔ sa̰w feri riw bele ká Ŋgɛrɛwṵru ɗaa ɗo zaɗ muni, a mí ɓa bawda nzoɓ fe kɔ́kɔ, mase mì ɗo ɓáy mbika law ká ɓay sóroke kuo ɗo zaɗ kḭ kara, zaɗka law ini ti law-i ya lɛ, mì ɗo ɓa fe ká gɔr hɔy.
3 Ze, mì fa̰a feziŋa ɓiri riw bele, mí leke ha̰ nzoɓ kṵkuri, a mí tay sùo-i ɓáy huu hɔy kara, zaɗka law ini ti law-i ya lɛ, fekeri ku na ɗaa fe mbḭw ha̰ mì ya.
4 Nzoɓ law ini na, iki law-ɛ; nzoɓ law ini na, ɓa nzoɓ law kere. Ka ɓa nzoɓ ɗáa law ɓo tul fe nzoɓ ya nda̰w, ka ɓa nzoɓ ndáka giri ya nda̰w, a ɓa nzoɓ siika sùo ya nda̰w pi.
5 Nzoɓ law ini na, ɗaa fe ɗáa sahoy ya nda̰w, a ɗaa ha̰n ya nda̰w, ka ha̰ nun-ɛ sḭ̀i ŋga̰w ŋga̰w ká tul nzoɓ ya nda̰w, a mgba tul ŋga̰ni ɓay ya nda̰w pi.
6 Nzoɓ law ini na, ɗaa suoriya ká tul fe ka̰aya ya, roo lɛ, ka záy sùo-ɛ ká tul tusuɛ ɓay.
7 Nzoɓ law ini na, sṵu law-ɛ ká tul feri riw bele, a ɗaa law-ɛ ɓo tul Ŋgɛrɛwṵru ɓaŋguɔ, a kaw nzokɗo ɓay tul yṵ-ɛri, a iki law-ɛ ká tul feri riw bele.
8 Law ini na gbṵke tiya. A ya̰aŋa ɓay saa nzaa Ŋgɛrɛwṵru na gbṵke ɗo ɗi. Ɓáa nzaa ɓay kḭri ká nzoɓ laa ya na kara a gbṵ́ nda̰w, a kɔ́kɔ sa̰w feri na hɔy kara a gbṵ́ nda̰w pi.
9 Naari na, náa kɔ́ri sa̰w feri ndḭi hɔy nda̰w, a ya̰aŋa ɓay saa nzaa Ŋgɛrɛwṵru hɔy kara, náa ya̰ari ndḭi hɔy nda̰w pi.
10 A roo lɛ, zaɗka fe ká ɗo ɓáy zaɗɛ nzɛɗɛm na tḭi lɛ, fe ká náa kɔ́ri ndḭ-ndḭi hɔy na a zékre.
11 Zaɗka mì tɔ̀ŋ leɗ ɓáy na, ɓay ɓáa ɓi, kér ɓay ɓi ɓáy mbii ɓay ɓáa ɓi na, ɗo munu ɓa taa leɗ. A roo lɛ, zaɗka mì vi ɓa ŋgɛrɛnzoɓ ro na báyḭi lɛ, mì pɔŋ fal fe ɗáa leɗri na riw bele ɓa fal.
12 Timbɛɗɛ key na báyḭi lɛ, fe ká náa kɔ́ri na ɗo munu ɓa tem fe ká nzoɓ kɔ ɗo nun-ɛ kputul key hɔy. A lɛ, namke na, náa kɔ́kɔri fekeri na ɓáy nun naari gbak gbak. Timbɛɗɛ key lɛ, mì kɔ sa̰w fekeri na ndḭ-ndḭi ɓáy. A namke na vi lɛ, mì kɔ́kɔ feri riw bele na *taŋ kaɗ kaɗ munu ká Ŋgɛrɛwṵru hɔy kara kɔ mì taŋ kaɗ kaɗ.
13 Ɓe ze, timbɛɗɛ key na, feri ɓa say ze ɗo key: ɗáa law ɓo tul Ŋgɛrɛwṵru nda̰w, ɗáa law nzokɗo te tul fe nda̰w, rɔɔ law ini nda̰w pi. Roo lɛ, ká sakra feri ká say key na, fe ká ndaɗ ɓamba kal taa ha̰wri na, ɓa law ini.