LIURU KUU KUUN
90
Salmos 90—106
Joo ni kuia ka teku ñayiu
Ndakuantaꞌu Moisés nuu ia Dios
1 Maa ni kuu ia tavaꞌa ña jin san, vi Jitoꞌo san,
ndee jananaꞌa vi ndee kiuu vitna.
2 Ndee ama ka ja vi junkoo yuku, vi ja saꞌa ni ñuꞌu vi ñuyiu,
guaa ndee jananaꞌa vi guaa ndee kiuu sandiꞌi, maa ni kuu Dios.
3 Chi maa ni saꞌa ja ka nduu ñayiu ñuyaka,
nuu kachi ni: “Roon, ñayiu ñuyiu, chi vi nduu ron ñuyaka”.
4 Chi in mil kuia kuu na kuinio iku
ja inka ni yaꞌa nuu maa ni,
axi na kuinio ndesaa ni ore ja ni yaꞌa nuu jakuaa.
5 Te xnaa ni ñayiu na kuinio nuu kee teñuꞌu,
chi ka kui na ni kuinio in jani,
axi na ni kuinio yuku ja ni jite, te oo kuikuii tnoꞌo neꞌe.
6 Tnoꞌo neꞌe jaꞌnu, te jaa ita,
su tnoꞌo jañini xii, te yichi ndiꞌi.
7 Chi nuu kiti ini ni, te xnaa ña ni jin san,
te nuu kaꞌan xeen ni, te ka yuꞌu san.
8 Ni xneꞌe ni jakueꞌe ka saꞌa san nuu ni,
te ni ndaxtuu ni yika kuechi ja ka saꞌa yuꞌu san.
9 Chi ndiꞌi kiuu ja ka teku san kuaꞌan naa ja jaꞌa ja kiti ini ni,
te ñama yaꞌa kuia ja ka teku san, na kuinio nuu jaka ndaꞌu ini san.
10 Te kuia ja ka teku san kuu maa ni uni xiko uxi kuia,
te ñayiu inu ndakui ka kentakuei kuun xiko kuia.
Su visi kuaꞌa kuia ka teku san, su ndimaa ni ka satniuu ndee ndevaꞌa san,
te kuaꞌa tnundoꞌo tnuneni ka tnaꞌa san,
te kuia, chi ñama yaꞌa, te suni sein, chi ñama ka jiꞌi san.
11 Chi tu na in jini jandakui ndevaꞌa kuu ja kiti ini ni,
te kaꞌnu ndevaꞌa kuu ja kiti ini ni ja kuini ja vi koyuꞌu niꞌnu ña ñayiu jin ni.
12 Kaxtnoꞌo ni nuu san ja na vi kaꞌu san nasaa kiuu ka teku san,
nagua ja na vi niꞌi san tnoꞌo ndichi ni ja koo ini anu san.
13 ¿Nasaa ka kiuu te saa ndajiokuiin ni nuu ka oo san, vi Jitoꞌo san?
Kundaꞌu ini ña ni jin san ja ka jinokuechi san nuu ni.
14 Kaꞌan ndaꞌu kaꞌan kee ña ni nuu ndakiꞌin in kiuu in kiuu,
te na vi kokata san vi na vi kokusii ini san ndiꞌi ni kiuu ja ka teku san.
15 Ndataa ni tnoꞌo sii ini,
nagua kiuu ja ni tetniuu ni tnundoꞌo ni ka tnaꞌa san,
vi nagua kuia ja ni ka jini san jakueꞌe.
16 Xneꞌe ni tniuu kaꞌnu saꞌa ni nuu maa san
ja ka jinokuechi san nuu ni,
vi jayeꞌe jatajan ni nuu ndikin tata san.
17 Te na koo javii javaꞌa ni nuu in in san, vi Jitoꞌo san.
Saꞌa ni ja na kee guaꞌa tniuu ka saꞌa san jin ndaꞌa san.
Janjaan, saꞌa ni ja na kee guaꞌa tniuu ka saꞌa san jin ndaꞌa san.