85
Xneꞌe ni ja kundaꞌu ini ña ni, vi Dios
Yaa ni ka tee ndikin tata Coré
1 Guaꞌa ndevaꞌa Jitoꞌo kuu ni jin ñayiu ñuu ni, vi Dios,
chi ni saꞌa ni ja ni ka ndajiokuiin ndikin tata Jacob nuu ni ka oi ñuu ñayiu ni ka kaꞌan uꞌu ña.
2 Te ni jakaꞌnu ini ni jakueꞌe ka saꞌa ñayiu ñuu ni,
vi ni xnaa ni ndiꞌi yika kuechi.
3 Te ni yaꞌa ini ni jin ja kiti ini ni,
te tu ka kiti ini ndevaꞌa ni nuu in in san.
4 Ndasaꞌa ña ni inka jichi, vi Dios, ja kuu ni ia skaku niꞌnu ña,
te ma kokiti ini ka ni nuu in in san.
5 Chi ¿a vi siun ni kokiti ini ni nuu in in san?
¿Te a vi nikaa nikiꞌin ni kokiti ini ni?
6 ¿A ma ndataa ni tnoꞌo ndee ini,
nagua ja na vi ndusii ini ñayiu ñuu ni?
7 Neꞌe ni, te kundaꞌu ini ña ni, vi Jitoꞌo san,
te skaku niꞌnu ña ni.
8 Te konini san tnoꞌo ja kaꞌan Jitoꞌo Dios,
chi kaꞌan ya ja vi koo mani ñayiu ñuu ya vi ñayiu ka saꞌa ndaa nuu ya,
nagua ja ma vi ndukueꞌi ja vi ndajiokuiin vi saꞌi taka jakueꞌe.
9 Chi jandaa ja yatni ñuꞌu oo ia Dios ja skaku niꞌnu ya ñayiu ka yuꞌu niꞌnu ña jin ya,
nagua ja koo ja yeꞌe tajan ya nuu ñuo.
10 Te vi nukuntnaꞌa ja ndaꞌu ini ya jin tnoꞌo ndaa,
te vi ndakanu niꞌnu tnaꞌa tniuu ndaa jin jamani.
11 Te kute tnoꞌo ndaa nuu ñuꞌu,
te vi kunio tniuu ndaa ndee andivi.
12 Chi tetniuu Jitoꞌo kuaꞌa sau,
te vii ndevaꞌa vi kuvaꞌa nuu ñundeꞌio.
13 Te kokoxnoꞌo tniuu ndaa nuu ya kiꞌin
ja kosavaꞌa ichi nuu kiꞌin ya.