83
Ka ndakuatu ñayiu ja na chituu ña ia Dios
Yaa ni tee Asaf
1 Ma kasi yuꞌu ni, vi Dios, ja ma kaꞌan ni,
te ni ma kendoo titiꞌi ni.
2 Chi ni ka kuvaa ñayiu ka kaꞌan uꞌu ña jin ni,
te ni ka ndakoo ñayiu ka skexiko ña siki ni.
3 Chi ka ndatnoꞌo yuꞌi ja vi ndakoi siki ñayiu ñuu ni,
vi ka ndatnoꞌi ja vi ndakoi siki ñayiu jito jini maa ni, vi Dios.
4 Te ka kachi: “Neꞌekuei ni te na vi xnao jin, nagua ja ma vi koo kai ñuu yaꞌa,
nagua ja ma vi kondakaꞌan saꞌun ka ña jin ñayiu Israel”, ka kachi.
5 Chi ni kintnaꞌa tnoꞌo ka ndatnoꞌi, te invaa ni tnoꞌo ka kaꞌin,
te ni ka saꞌi in tratu ja vi ndakoi siki ni, vi Dios.
6 Te sui ka kuu tatatnoꞌo Edom vi tatatnoꞌo Ismael,
vi ñayiu ñuu Moab vi ndikin tata Agar,
7 vi ñayiu Gebal vi ñayiu Amón, vi ñayiu Amalec,
vi ñayiu filisteo vi ñayiu ka oo ñuu Tiro.
8 Te suni ndee ñayiu Asiria ni ka kututu jin ñayiu yun,
te ni ka chituu ñai jin ñayiu ka kuu tatatnoꞌo Lot.
9 Saꞌa ni jin ñayiu yun, vi Dios, nagua ni saꞌa ni jin ñayiu ñuu Madián
vi nagua ni saꞌa ni jin Sísara vi jin Jabín yute Cisón.
10 Te ni xnaa ni de nuu nani Endor,
te ni ka teꞌi yiki kuñu de ja ni ka nduu jaꞌan nuu ñuꞌu yun.
11 Saꞌa ni jin tee ka kuu nijaꞌnu yun nagua ni saꞌa ni jin Oreb vi jin Zeeb.
Saꞌa ni jin ndiꞌi tee ka tatnuni yun nagua ni saꞌa ni jin Zeba vi jin Zalmuna,
12 chi ni ka kachi de: “Na vi saꞌa jajion nuu oo ite maa ia Dios”.
13 Saꞌa ni, vi Dios, ja na vi kiotuu de na kuinio in yutnu tindiki ja jiso ña tikacha,
axi na kuinio ndaꞌa yichi ja xtechi ña tachi,
14 axi na kuinio ñuꞌu ja teñuꞌu in tinduu kaꞌnu,
na kuinio yaa ñuꞌu ja teñuꞌu yúku nuu ka oo yutnu.
15 Te saa sondikin ni ñayiu yun jin sau xeen ni,
vi siuꞌu ni ñayiu jin tikacha ni.
16 Saꞌa ni ja na vi ndukanoo ndevaꞌa ñayiu yun,
nagua ja na vi ndanduku ñai jin ni, vi Jitoꞌo san.
17 Te siun ni na vi kendoo kanoi vi na vi kunu nuu ini,
te vi ka kukanoi, te na vi kui.
18 Te na vi kuni ñayiu yun ja maa ni kuu Jitoꞌo,
te maintnoꞌo maa ni oo ndee sukun, siki ndiꞌi ja oo ñuyiu.